Όταν μπιαντιόλα εκ μαξίμι, μπορεί τι ανέλ μπαρί χαρά αλλά μπορεί τι ανέλ μπελιάς-ντα κο αντρόγυνος. Σαρ νεβό ντατ ντα νεβί ντάι, μπορεί τι αβέλ τουμένγκε δύσκολος όταν κα αγαβέν ότι κα ντεν ο πιο μπουτ χρόνος ντα ι πιο μπουτ ζορ τουμαρέ νεαυτόσταρ για τι μπαριαρέν ι χουρντές. Επειδή αζομάν να κα σοβέν λατσσές ντα κα αλλάνελ τουμαρί ψυχολογία, μπορεί τι τθερέν αναστάτωση τουμαρέ παντριάτε. Ο ντούι-ντα πρέπει τι κερέν αλλαγές εμ για τι αρακχαβέν ι μαξιμίς εμ για μα τι χαλάντιβελ τουμαρί παντριά. Σαρ βοηθίνενα-τουμέν ο συμβουλές σο τθερέλα η Αγία Γραφή τι νακχαβέν ανταλά δυσκολίες;

ΣΟ ΒΑΚΕΡΕΛΑ Η ΑΓΙΑ ΓΡΑΦΗ: «Η αγάπη μουκχέλα ντουρ ι χολί ντα σικαβέλα λατσσιπέ». Επίσης «να ντικχέλα πο συμφέρον, να νευριάνελα». (1 Κορινθίους 13:4, 5) Σαρ νεβί ντάι, ισί λογικός τι αρακχαβέν μπουτ τουμαρέ χουρντές. Αλλά τουμαρό ρομ μπορεί τι νιωθίνελ ότι παρατιντέν-λες. Οτθάρ, μα μπιστρέν ότι βοβ-ντα τθερέλα ανάγκη τουμαρί προσοχή. Όταν να χολιάνενα ντα σικαβένα λέσκε λατσσιπέ, κα βοηθίνεν-λες τι νιωθίνελ ότι τθερένα-λες ανάγκη ντα ότι βοηθίνελα βοβ-ντα κο μπαριαριπέ κι μαξιμίσκο.

«Τουμέν, μουρσάλεν . . . τι τζουβντιόν λέντζαρ αντικάς σαρ σικλιλέν λένγκε». (1 Πέτρου 3:7) Πρέπει τι αγαβέν ότι τουμαρί ρομνί κα ασχολίντιβελ πιο μπουτ ι μαξιμίσαρ. Ο νεβέ ευθύνες σο τθερέλα μπορεί τι ανέν λάκε νεύρα, τι κχινιαρέν-λα, ατζέ-ντα τι ανέν λάκε κατάθλιψη. Κα αβέν φαρ σο μπορεί τι νευριάνελ τουμέντζαρ, αλλά τουμέν προσπαθίνεν τι ατσσόν ήρεμοι, επειδή «οντουβά σο να χολιάνελα εύκολα ισί πιο λατσσό οντουλέσταρ σο ισί ζουρανό». (Παροιμίες 16:32) Προσπαθίνεν τι αγαβέν σαρ αισθάντιβελα ντα αντικάς κα βοηθίνεν-λα οτθέ σο τθερέλα ανάγκη.​—Παροιμίες 14:29.

ΣΟ ΜΠΟΡΙΝΕΝΑ ΤΙ ΚΕΡΕΝ:

• Νταντάλεν: Τι βοηθίνεν τουμαρέ ρομνιά κο μπαριαριπέ κι μαξιμίσκο, ατζέ-ντα αρατί. Τσσιναβέν γιαβερέ πραγματένταρ για τι νακχέν πιο μπουτ σαάτια τουμαρέ ρομνιάσαρ ντα ι χουρντέσαρ

• Νταγιάλεν: Όταν τουμαρό ρομ μανγκέλα τι βοηθίνελ-τουμέν τι αρακχαβέλ ι μαξιμίς, μουκχέν-λες τι βοηθίνελ. Άμα κερέλα λάθη, μα ντεν λέσκε βίκος, αλλά λατσσιμάσαρ σικαβέν λέσκε σο τι κερέλ

ΣΟ ΒΑΚΕΡΕΛΑ Η ΑΓΙΑ ΓΡΑΦΗ: «Κα αβέν εκ σώμας». (Γένεση 2:24) Παρόλο σο μπαριλί τουμαρί φαμιλί ι χουρντέσαρ, τι ντεν-τουμέν γκοντί ότι τουμαρέ ρομέσαρ ή τουμαρέ ρομνιάσαρ συνεχίνενα τι αβέν «εκ σώμας». Τι κερέν σο νακχέλα τουμαρέ βαστέσταρ για τι ατσικιαρέν τουμαρί παντριά ζουρανί.

Τουμέν, τζουβλιάλεν, τι ευχαριστίνεν τουμαρέ ρομές σο βοηθίνελα ντα στηρίνελα-τουμέν. Ο σουκάρ λάφια μπορίνενα τι ανέν λατσσιπέ τουμαρέ φαμιλιάτε. (Παροιμίες 12:18) Τουμέν, μουρσάλεν, τι βακερέν τουμαρέ ρομνιάκε καζόμ μανγκένα-λα ντα καζόμ σημαντική ισί τουμένγκε. Τι ισαρέν-λα επειδή προσοχίνελα ι φαμιλί.​—Παροιμίες 31:10, 28.

«Ο κάθε εκ τι ντικχέλ, όχι πο συμφέρον, αλλά ι γιαβερέσκο». (1 Κορινθίους 10:24) Τι κερέν πάντα ο πιο λατσσό σο μπορίνενα τουμαρέ ρομέσκε ή τουμαρέ ρομνιάκε. Σαρ αντρόγυνος τι κερέν λάφι, τι ισαρέν ντα τι ασουνέν ο εκ ι γιαβερές. Εμ ο ρομ εμ η ρομνί πρέπει τι αγαβέν ο σεξουαλικές ανάγκες σο τθερένα σαρ αντρόγυνος ντα τι ικανοποιήνεν ο εκ ι γιαβερές. Η Αγία Γραφή βακερέλα: «Μα στερίνεν-λες ο εκ κατά γιαβέρ, αλλά σάντε όταν κα αποφασίνεν-λες ο ντούι-ντα». (1 Κορινθίους 7:3-5) Οντουλέσκε, κάνα κα αβέν σάντε τουμέν ο ντούι, κερέν λάφι ξεκάθαρα ανταλέ πραγμάσκε. Άμα κα κερέν υπομονή ντα κα αγαβέν ο εκ ι γιαβερές, τουμαρί παντριά κα αβέλ πιο ζουρανί.

ΣΟ ΜΠΟΡΙΝΕΝΑ ΤΙ ΚΕΡΕΝ:

• Τι αρακχέν χρόνος σάντε τουμένγκε ι ντουένγκε

• Τι σικαβέν χουρντέ πραγματέντζαρ τουμαρέ ρομέσκε ή τουμαρέ ρομνιάκε ότι μανγκένα ο εκ ι γιαβερές, σαρ για παράδειγμας τι γραφίνεν χάνικ σουκάρ λάφια ή τι ντεν εκ δωράκι

ΣΟ ΒΑΚΕΡΕΛΑ Η ΑΓΙΑ ΓΡΑΦΗ: «Χουρντιαρέλα μπερί τζανέσα ι Ντεβλέσκε λάφια, σο μπορίνενα τι κερέν-τουτ σοφός για τι σώντιβες». (2 Τιμόθεο 3:15) Σκεφτίνεν πιο τζανγκλέ σο κα κερέν για τι σικλιαρέν τουμαρέ μαξιμίς. Βοβ μπορίνελα τι σικλιόλ πιο μπουτ πράγματα οντουλένταρ σο αμντίνενα, ατζέ-ντα προτού τι μπιαντιόλ. Ενώ ισί ατζέ αντρέ κο περ, ασουνέλα τουμαρί φωνή ντα αγαβέλα οντουλά σο αισθάντιβενα. Τι διαβάνεν λέσκε χουρντιαρέλα. Παρόλο σο μπορεί μα τι αγαβέλ οντουλά σο διαβάνενα, σικλιόλα τι μπεϊντίνελ ο διάβασμας αζόμ μπαριόλα.

Ποτές νανέ μπουτ νωρίς για τι κερέν λάφι ι Ντεβλέσκε τουμαρέ μαξιμίστε. Τι κερέν προσευχή τουμαρέ χουρντέσαρ. (Δευτερονόμιο 11:19) Ατζέ-ντα όταν κχελένα τουμένγκε λέσαρ, τι βακερέν λέσκε οντουλένγκε σο κερντάς ο Ντεβέλ. (Ψαλμός 78:3, 4) Αζόμ μπαριόλα τουμαρό χουρντό, κα αγαβέλ ι αγάπη σο τθερένα ι Ιεχωβάσκε ντα κα σικλιόλ τι μανγκέλ-λες βοβ-ντα.

ΣΟ ΜΠΟΡΙΝΕΝΑ ΤΙ ΚΕΡΕΝ:

• Τι μανγκέν σοφία όταν κερένα προσευχή για τι μπορίνεν τι σικλιαρέν τουμαρέ μαξιμίς

• Τι βακερέν λέσκε συνέχεια σημαντικές λέξεις ντα πράγματα για τι αρχίνελ τι σικλιόλ χουρντιαρέλα