Οντουβά μπρες, η οργάνωση κερντάς κάποιες αλλαγές σο αντέ ι ενότητα κο Σπουδαστές κι Γραφιάκε. Η Σκοπιά αρχισάλι τι νικαβέλ σχόλια για το εδάφιος σο διαβάντιβελας κι εβδομαδιαία Συνάθροιση Προσευχής και Αίνου. Επίσης ο Σπουδαστές ι Γραφιάκε νικαβένας εκ ημερολόγιος, σο βακερέλας ο εδάφιος ι κάθε εβδομαδάκε ντα εκ ύμνος ι κάθε ντιβεσέσκε σο κα μπορίνενας τι γκιλιαβέν κάνα κα σικλιαρένας-πες κατά Γραφή κορκορέ ή κι φαμιλιάκι λατρεία.

Πουμαρέ συναθροισιέντε, ο Σπουδαστές ι Γραφιάκε βακερένας εκ εμπειρία κατά έργος, εκ λάφι σο σικαβέλας σόσκε ευχαριστίνενας ι Ιεχωβάς, εκ ύμνος ή εκ προσευχή. Η Εύα Μπάρνεϊ, σο μπολντιλί κο 1923, κάνα ισινέ 15 μπρεσένγκι, πο σοράν βακερντάς: «Άμα μανγκέας τι κερές λάφι, ιστίας οπρέ ντα βακερέας κάτι ασακό: “Μανγκάβα τι βακεράβ ευχαριστώ μι Κυριόσκε σο σικαντάς μάνγκε αζόμ μπουτ λατσσιπέ”». Μερικά πφραλά μπεϊντίνενας μπουτ τι ιστίν οπρέ για τι βακερέν κάτι. Η πφεν Μπάρνεϊ συνεχιντάς: «Εκ αγαπημέ πφουρό, ο πφραλ Γκόντουιν, μανγκέλας τι βακερέλ ευχαριστώ κο Κύριος για μπουτ πράγματα. Αλλά κάνα λέσκι ρομνί ντικχέλας ότι ο υπεύθυνος πφραλ αρχίνελας τι χασαρέλ πι υπομονή, ταρτίνελας πι ρομές κατά σακάκι ντα βοβ μπεσέλας τελέ».

Εκ φαρ κο μάσεκ, κάθε τάξη (κχανγκιρί) κερέλας εκ ειδική Συνάθροιση Προσευχής και Αίνου. Ανταλέ συναθροισιάκε, Η Σκοπιά 1 Απριλίου 1923 βακερντάς: “Ο επκάς ανταλέ μπρεσέσκο πρέπει τι ντιντιόλ κο εμπειρίες σο τθερένα τι κερέν με το έργος ντα ντένα ζορ κο πφραλά . . . Πακιάσα ότι ανταλά συναθροίσεις σο ντένα ζορ κα ανέν πο πασέ ι πφραλέν”.

Ο Τσαρλς Μάρτιν, σο ισινέ 19 μπρεσένγκο ευαγγελιζόμενος κατά Βανκούβερ κο Καναδάς, βοηθίντιλο μπουτ ανταλέ συναθροισιένταρ. Πο σοράν βακερντάς: «Αζομάν σικλιλόμ πρώτη φαρ σο τι βακεράβ κο πόρτες. Μπουτ φαρ, κάποιος βακερέλας εκ εμπειρία κατά έργος κχερ κχερέστε. Ανταβά ντέλας-μαν ιδέες σο τι βακεράβ ντα σαρ τι απαντίναβ κάνα ο τζενέ τθερένα αντιρρήσεις».

Κάτι γιαβέρ σο βοηθιντάς ι πφραλέν τι αβέν πο ενωμέ ισί ότι τθερένας συγκεκριμέ ντιβεσά σο νικιόνας κο έργος. Η Σκοπιά 1 Απριλίου 1923 κερντάς ακαγιά ανακοίνωση: “Για τι υπαρχίντιβελ ενότητα κο έργος σο κεράσα . . . , η Τρίτη 1 Μαΐου 1923  ισί ο ντιβές σο σαρέ κα τζαν κο έργος. Από αζομάν, ι πρώτη Τρίτη ι κάθε μασικέσκι . . . κάθε τζενό κι κάθε τάξη (κχανγκιρί) πρέπει τι νικιόλ κο έργος”.

Ατζέ-ντα ο τερνέ Σπουδαστές ι Γραφιάκε νικιόνας ανταλέ εργόστε. Η Χέιζελ Μπάρφορντ, σο αζομάν ισινέ 16 μπρεσένγκι, βακερντάς πο σοράν: “Ο Δελτίον (σο πο σοράν βακέρντιλο Αμαρί Διακονία της Βασιλείας) τθερέλας ιδέες για επισκέψεις (κάτι σο αντιβές βακέρντιβελα Σαρ τι Κεράς Συζητήσεις) για τι μπορίνας τι τθεράς-λεν αμαρέ γκοντιάτε. a Γιεκ μι παππούσαρ, κεράβας χαράσαρ σαρέ ο πράγματα σο βακερέλας η οργάνωση». Όμως, ι πφενιάσαρ Μπάρφορντ γκιλό κόντρα εκ τζενό σο να μπεκλεντίνελας. Βόι βακερντάς: «Εκ αγαπημέ πφουρό πφραλ να μανγκέλας ιτς τι κεράβ με λάφι κο τζενέ. Οντουλά μπρεσά, μερικοί να αγαβένας ότι σαρέ ο Σπουδαστές ι Γραφιάκε, αντρέ ανταλέντε εμ “ο τερνέ τσσαβέ ντα ο τερνέ τσσαγιά”, έπρεπε τι δοξάνεν αμαρέ μπαρέ Δημιουργός». (Ψαλμ. 148:​12, 13) Αλλά η πφεν Μπάρφορντ να μουκχλάς-πες. Πο σοράν, νακχλάς ι δεύτερη τάξη κατά Σχολή Γαλαάδ ντα υπηρετιντάς σαρ ιεραπόστολος κο Παναμάς. Τελικά, οντουλά πφραλά αλλαντέ πουμαρί άποψη ντα αγαντέ ότι ο τερνέ-ντα έπρεπε τι νικιόν κο έργος.

Ο συνελεύσεις-ντα σο αβένας οτθέ κερένας ι πφραλέν τι αβέν πο ενωμέ. Μπουτ ανταλέ συνελευσιένταρ τθερένας εκ ντιβές σο ισινέ για τι νικιόν κο έργος. Για παράδειγμας, 31 Μαρτίου, βακέρντιλο σαριλέντε σο γκιλέ κι συνέλευση κο Γουίνιπεγκ κο Καναδάς τι κερέν ο πο λατσσό για τι ασούντιβεν ο λατσσέ αμπέρια σαρί κι πόλη. Ανταβά πουταρντάς ο ντρομ για τι ασουνέν ατζέ πο μπουτ τζενέ ι αλήθεια κο μέλλον. 5 Αυγούστου, 7.000 τζενέ περίπου γκιλέ σε εκ συνέλευση κο Γουίνιπεγκ. Ανταβά ισινέ ο πο μπαρό αριθμός τζενένγκο σο γκιλέ συνέλευση κο Καναδάς.

Η πο σημαντική συνέλευση ι Ιεχωβάσκε λαόσκι κο 1923 αβιλί-πες 18-26 Αυγούστου κο Λος Άντζελες κι Καλιφόρνια. Ο εβδομάδες πριν κατά συνέλευση, διαφημίνενας ι συνέλευση κο εφημερίδες, ντα ο Σπουδαστές ι Γραφιάκε ντινέ πο μπουτ από 500.000 φυλλάδια. Διαφημιστικές πινακίδες τσσουβντιλέ σε τραμ ντα κο αυτοκίνητα κι πφραλένγκε.

 Κο Σάββατος 25 Αυγούστου, ο πφραλ Ρόδερφορντ κερντάς ι ομιλία ι θεμάσαρ «Πρόβατα ντα Ερίφια» (Μπουσνιά ντα Μπρακέ), σο σικαντάς ξεκάθαρα ότι ο «μπρακέ» ισί δίκαια τζενέ σο κα τζουβντιόν για πάντα κο παράδεισος κι πφουβ. Κερντάς επίσης εκ ομιλία ντα διαβαντάς ι απόφαση «Μία Προειδοποίησις». Ανταγιά απόφαση κατηγοριντάς ο Χριστιανικός ντουνιάς ντα τσσιντιντάς ι λατσσέ τζενέν τι μουκχέν ι “Μπαρί Βαβυλώνα”. (Αποκ. 18:2, 4) Πο σοράν, σαρί κι πφουβ, ο Σπουδαστές ι Γραφιάκε, σο πφαμπόνας ι εργόσκε, ντένας ενωμέ εκατομμύρια έντυπα σο τθερένας αντρέ ανταγιά απόφαση.

Ο τελευταίος ντιβές ι συνελευσιάκο, 30.000 ντα πο μπουτ τζενέ ασουντέ ι πφραλές Ρόδερφορντ τι κερέλ ι δημόσια ομιλία «Πάντα τα Έθνη Πορεύονται προς τον Αρμαγεδδώνα, αλλά Εκατομμύρια Ήδη Ζώντων Ουδέποτε θα Αποθάνωσιν». Επειδή μπεκλεντίνενας μπουτέ τζενένγκε, ο Σπουδαστές ι Γραφιάκε νοικιαντέ ο στάδιος Κολίζιουμ κο Λος Άντζελες σο ισινέ ντιπ νεβό. Για τι αβέν σίγουροι ότι σαρέ κα ασουνένας, ο πφραλά χρησιμοποιηντέ ο ηχητικά σο τθερέλας ο στάδιος, σο ισινέ ο πο λατσσέ οντουλά μπρεσά. Μπουτ γιαβερά ασουντέ ο πρόγραμμας κατά ραδιόφωνος.

Κο μπρες 1923, πφιρντιλέ ο λατσσέ αμπέρια κι Αφρική, κι Ευρώπη, κι Ινδία ντα κι Νότια Αμερική. Κι Ινδία, ο Ανταβιμανάτου Τζ. Τζόζεφ βοηθίνελας για τι κερντιόν ο έντυπα κο τσσιμπά χίντι, τάμιλ, τέλαγκου ντα ούρντου, ντα κο ίδιος βακίτι αρακχαβέλας πι ρομνιά ντα πι σιοβέ τσσαβέν.

Κι Σιέρα Λεόνε, ο Σπουδαστές ι Γραφιάκε Άλφρεντ Τζόζεφ ντα Λέναρντ Μπλάκμαν γραφιντέ κο παγκόσμια κεντρικά γραφεία κο Μπρούκλιν κι Νέα Υόρκη ντα μανγκλέ βοήθεια. 14 Απριλίου 1923, λιντέ απάντηση. «Εκ Σάββατος αργά ι ιράτ», βακερντάς ο Άλφρεντ, «λιντέ-μαν τηλέφωνος οτθέ σο να μπεκλεντίναβας-λες». Ασουντάς εκ ζουρανί φωνή τι πουτσέλ: «Τούι ισινάν σο γραφιντάν κι Εταιρία Σκοπιά ντα μανγκλάν τζενέν για τι κερέν έργος;» «Βα», απαντιντάς ο Άλφρεντ. «Μαν μπουτσσαντέ». Ανταβά βακερντάς-λες ο Γουίλιαμ Ρ. Μπράουν. Αβιλόας οντουβά ντιβές κατά Καραϊβική γιεκ πι ρομνιάσαρ, την Αντόνια, ντα πουμαρέ τσσαγιορίντζαρ, τη Λουίζ ντα τη Λούσι. Ο πφραλά κα σικλιόνας σουγκό ανταλέ νεβέ πφραλέν.

Ο Άλφρεντ συνεχιντάς: «Ο γιαβέρ ντιβές, ο Λέναρντ ντα με σικλιαράας-αμέν κατά Γραφή, σαρ κεράας κάθε εβδομάδα, ντα αζομάν αβιλό εκ βουτσσό τζενό κι πόρτα. Ισινέ ο πφραλ Μπράουν. Πφαμπόλας αζόμ μπουτ ι αληθειάκε ντα οτθάρ μανγκέλας σαρ σαρ τι κερέλ δημόσια ομιλία ατζέ-ντα ο γιαβέρ ντιβές». Σε πο χάνικ από εκ μάσεκ, ο πφραλ Μπράουν ντινάς σαρέ ο  έντυπα σο τθερέλας πέσαρ. Μπουτ σουγκό, λιντάς ατζέ 5.000 βιβλία ντα χάνικ πο σοράν μανγκλάς γιαβερά-ντα. Αλλά ι πφραλές Μπράουν να τζανένας-λες σαρ εκχέ τζενές σο μπικινέλας βιβλία. Σαρέ ο μπρεσά σο υπηρετίνελας ι Ιεχωβάς σαρέ πι γκίσαρ, κάνα κερέλας ομιλίες, βακερέλας συνέχεια λάφια κατά Γραφή, ντα αντικάς ντινέ-λες ο ναβ «Βιβλικός Μπράουν».

Κι Γερμανία, ο πφραλά αποφασιντέ τι ακχαρέν-πες κατά γραφείος τμήματος κο Μπάρμεν επειδή ισινέ μπουτ χουρντό. Επίσης ασουντέας ότι ο στρατός κι Γαλλία κα ντέλας ατζεχάνικ κι πόλη. Ο Σπουδαστές ι Γραφιάκε αρακχλέ εκ κτίριος κο Μαγδεμβούργος σο ντικχίντιβελας μπουτ λατσσό για τι τυπώντιβεν ο έντυπα οτθέ. 19 Ιουνίου, τελειωσάλε ο ετοιμασίες σο κερένας ο πφραλά για τι ακχαρέν κο νεβό Μπέθελ κο Μαγδεμβούργος ο μηχανήματα σο τυπώνενας ντα ο γιαβερά πράγματα σο χρειαζίντιβενας. Εκ ντιβές αφού βακέρντιλο κο παγκόσμια κεντρικά γραφεία ότι ακχαρντέ-πες σαρέ κο νεβό Μπέθελ, ο εφημερίδες γραφιντέ ότι η Γαλλία λιντάς ι πόλη Μπάρμεν. Ο πφραλά ντικχλέ αντράλ κατά μετακόμιση ανταγιά ότι ο Ιεχωβά ευλογιντάς-λεν ντα αρακχαντάς-λεν.

Κι Βραζιλία, ο Τζορτζ Γιανγκ, σο κερέλας μπουτ ταξίδια για τι βακερέλ ο λατσσέ αμπέρια, κερντάς εκ νεβό γραφείος τμήματος ντα αρχισάλο τι νικαβέλ ι Σκοπιά κι πορτογαλική. Αντρέ χάνικ μασικέντε, ντινάς πο μπουτ από 7.000 έντυπα. Η πφεν Σάρα Φέργκιουσον λιντάς μπαρί χαρά κάνα ο πφραλ Τζορτζ Γιανγκ γκιλό λένγκε φαμιλιάτε. Η πφεν Φέργκιουσον διαβάνελας ι Σκοπιά κατά 1899, αλλά να ντιντιλίας-λα ποτές η ευκαιρία τι ντελ πο λάφι κο Ιεχωβά τι τζουβντιόλ λέσκε ντα τι μπολντιόλ. Χάνικ μασεκά πο σοράν, βόι ντα λάκε σταρ τσσαβέ μπορισάλε τι κερέν ανταβά σημαντικός βήμας.

Καζόμ τελειώνελας ο μπρες, Η Σκοπιά 15 Δεκεμβρίου 1923 βακερντάς σαρ ο Σπουδαστές ι Γραφιάκε βοηθίντιλε κατά αλλαγές κο συναθροίσεις, κο έργος ντα κο συνελεύσεις: “Ισί εύκολος τι ντικχέλ κάποιος ότι ο . . . τάξεις (κχανγκιριά) τθερένα ζουρανί πίστη. . . Οτθάρ, τι ιριάς αμαρί πανοπλία, ντα τι αβάς έτοιμοι για πο μπουτ έργος καζόμ κα συνεχίνας τι υπηρετίνας ι Ντεβλές αντράλ αμαρέ γκίσταρ ντα χαράσαρ κο γιαβέρ μπρες”.

Ο γιαβέρ-ντα μπρες κα αβέλας μπουτ σουκάρ για το Σπουδαστές ι Γραφιάκε. Ο πφραλά κο Μπέθελ κερένας μπουτί μπουτ μασεκά εκχέ τθανέστε κο Στάτεν Άιλαντ, σο ισινέ πασέ κο κεντρικά γραφεία κο Μπρούκλιν. Ο κτίρια οντουλέ νεβέ τθανέστε μπιτισκιαρντέ-λεν κι αρχή κι μπρεσέσκι 1924 ντα βοηθιντέ τι αβέν πο ενωμέ ο πφραλά ντα τι μουτθάντιβεν ο λατσσέ αμπέρια σαρ να αβιλόας ποτές.