Μπιάντιλομ κο Πάντινγκτον, εκχέ τθανέστε σο μπεσένα μπουτ τζενέ κο Λονδίνος, κι Αγγλία. Μπεσάβας μι νταγιάσαρ ντα μι τρινέ πο μπαρέ πφενίντζαρ. Μο ντατ να ισινέ ποτές μπαγιά οτθέ αμένγκε σόσκε κερέλας-λες κουμάντος η μολ.

Κάνα ισινόμας χουρντί, μι ντάι σικλιαρντάς-μαν τι κεράβ προσευχή κάθε ιράτ. Τθεράβας εκ χουρντί Αγία Γραφή σο τθερέλας σάντε ο βιβλίος Ψαλμοί, ντα νικαβάβας μι γκοντιάταρ ι μουσική για τι γκιλιαβάβ-λες. Ντάβα μαν γκοντί εκ λάφι σο διαβαντόμ εκχέ βιβλιόστε, ντα ατσσιλό αντρέ μι γκοντιάτε: «Κα αβέλ εκ ντιβές σο να κα υπαρχίντιβελ γιαβίν». Ο λάφια ανταλά κερντέ-μαν μα τι σοβάβ ιράτ σόσκε σκεφτίναβας οντουλά σο κα αβέν ανγκλ’ αμέντε. “Σίγουρα η ζωή τθερέλα τι ντελ-μαν κάτι πο λατσσό”, βακεράβας. “Σόσκε τζουβντιάβα;” Να μανγκάβας τι μεράβ!

Αρχισάλο τι τσσίντελ-μαν ο πνευματισμός. Προσπαθίναβας τι κεράβ λάφι ι μουλέντζαρ, τζάβας κο μουλικανέ κχανγκιριά μι αμαλέντζαρ σοράν κατά σχολείος ντα ντικχάας γιεκ νταρανικανέ ή τζατζιένγκι σιναμάδες. Σαρέ ανταλά μπεϊντίναας-λεν αλλά εμ νταραβένας-αμέν.

Κάνα αβιλόμ ντες μπρεσένγκε, λιντόμ ο γκεραλό ντρομ. Αρχισάλομ τι πιαβ τσιγάρα, ντα ναστί κεράβας μπι λάκο. Σοράν ανταλέσταρ πιάβας καλό-ντα. Έντεκα μπρεσένγκε, αρχισάλομ τι πιαβ μολ. Παρόλο σο να μπεϊντίναβας η γεύση σο τθερέλας, μπεϊντίναβας σο ματιάβας. Επίσης, μπεϊντίναβας ο γκιλιά ντα ο κχελιπέ. Τζάβας κο πάρτι ντα κο κλαμπ κάνα μπορίναβας. Τθεράβας ο χούι κάθε ιράτ τι νασάβ αποτσοράλ κχεράλ ντα τι βουρτίναβ σαρ τσορ χάνικ πριν τι ντισιόλ. Οτθάρ ο γιαβέρ ντιβές ισινόμας μπουτ κχινί, ντα νασάβας κατά σχολείος. Ντα ο φορές σο τζάβας, πιάβας κο διαλείμματα.

Ο τελευταίος μπρες κο σχολείος μο βαθμοί ισινέ μπουτ χάλια. Μι ντάι να τζανέλας σαρέ οντουλά σο κεράβας, πφανγκιλό λάκο γκι ντα χολιασάλι. Χαλάμ-αμέν, ντα νασλόμ κχεράλ. Για χάνικ βακίτι, μπεσλόμ μι αμαλέσαρ, σο βακέρντιβελας Τόνι, ντα ισινέ Ρασταφαριανός. Ο Τόνι τσορέλας ντα μπικινέλας ναρκωτικά ντα σαρέ τζανένας ότι ισινέ μπουτ βίαιος τζενό. Μπουτ σουγκό ατσσιλόμ κχαμνί ντα, ντεσουσιόβ μπρεσένγκι, μπιαντόμ αμαρέ τσσαβές.

Ντικχλόμ πρώτη φαρ Μαρτυρέν ι Ιεχωβάσκε κάνα μπεσάβας εκχέ κχερέστε σο ισινέ ι μπι-παντριμέ νταΐνγκε ντα λένγκε χουρντένγκε. Ο κράτος ντινάας-μαν οτθέ εκ δωμάτιος. Ντούι τζουβλιά Μάρτυρες ι Ιεχωβάσκε αβένας συνέχεια μερικέ τερνέ νταΐνγκε. Εκ ντιβές κερντόμ λάφι με-ντα λέντζαρ. Μανγκάβας τι σικαβάβ λένγκε ότι κερένας λάθος. Όμως, βον ντινέ-μαν απάντηση σαρέ κο ερωτήσεις σο κερντόμ λένγκε, ήρεμε ντα ξεκάθαρε τροπόσαρ αντράλ κατά Γραφή. Ταρτιντάς-μαν μπουτ ο λατσσιπέ ντα η σουκάρ συμπεριφορά λένγκι. Μανγκλόμ τι κεράβ με-ντα μελέτη κατά Γραφή λέντζαρ.

Μπουτ σουγκό, σικλιλόμ κάτι κατά Γραφή σο αλλαντάς μι ζωή. Χουρντιαρέλα μπερί νταράβας κατά μεριπέ. Αλλά ακανά σικλιλόμ οντουβά σο σικλιαρντάς ο Ιησούς για την ανάσταση! (Ιωάννης 5:28, 29) Σικλιλόμ επίσης ότι ο Ντεβέλ πφαμπόλα μάνγκε. (1 Πέτρου 5:7) Συγκινιντάς-μαν μπουτ ο εδάφιος Ιερεμίας 29:11, σο βακερέλα: «“Σόσκε με τζανάβα λατσσές οντουλά σο σκεφτίναβα τουμένγκε”, βακερέλα ο Ιεχωβά· “σκεφτίναβα τι ανάβ ειρήνη ντα όχι στεναχώρια, για τι νταβ-τουμέν μέλλον ντα ελπίδα”». Αρχισάλομ τι πακιάβ ότι κα μπορίναβας τι τθεράβ ι ελπίδα τι τζουβντιάβ για πάντα κο Παράδεισος κι πφουβ.—Ψαλμός 37:29.

Ο Μάρτυρες ι Ιεχωβάσκε σικαντέ μάνγκε αληθινή αγάπη. Κάνα γκιλόμ πρώτη φαρ εκχέ συναθροισιάτε σο κερένας, ντικχλόμ ότι σαρέ κερντέ-μαν τι νιωθίναβ άνετα ντα ισινέ αγαπημέ—ισινέ μπουτ λατσσέ μάντζαρ! (Ιωάννης 13:34, 35) Κι γιαβέρ θρησκεία σο ισινόμας, ανταβά ποτές να ντικχλόμας-λες κάνα τζάβας κι κχανγκιρί. Ο Μάρτυρες κερντέ μάνγκε σαρ σαρ ντα να κρίνενας-μαν. Ντινέ-μαν πουμαρέ σαατίσταρ, ντινέ-μαν σημασία, ντα κερντέ μάνγκε μπουτ πράγματα για τι βοηθίνεν-μαν. Νιωθίναβας ότι ισινόμ αντρέ εκχέ μπαρέ ντα μπουτ λατσσέ φαμιλιάτε.

Καζόμ κεράβας μελέτη κατά Γραφή, αγαντόμ ότι έπρεπε τι κεράβ αλλαγές μι ζωγιάτε για τι μπορίναβ τι κεράβ ο πάκι κανόνες ι Ντεβλέσκε. Αν-ντα ισινέ μπουτ δύσκολος μάνγκε, τσσιναντόμ ι τσιγάρα. Αλλά αγαντόμ ότι οντουλά γκιλιά σο ασουνάβας κερένας-μαν τι μανγκάβ τι πιαβ καλό, οτθάρ αρχισάλομ τι ασουνάβ γιαβερά γκιλιά. Επειδή μανγκάβας τι αβάβ νερνί τσσιναντόμ τι τζαβ κο πάρτι ντα κο κλαμπ, για μα τι περάβ κο πειρασμός τι ματιάβ. Ντα προσπαθιντόμ τι κεράβ νεβέ αμαλέν σο κα βοηθίνενας-μαν τι τζουβντιάβ ι νεβέ τροπόσαρ σο τραμπιντόμ.—Παροιμίες 13:20.

Αζομάν, αρχιντάας εμ ο Τόνι τι κερέλ μελέτη ι Ιεχωβάσκε Μαρτυρέντζαρ. Καζόμ ο Μάρτυρες ντένας-λες απαντήσεις αντράλ κατά Γραφή κο ερωτήσεις σο τθερέλας, πακιασάλο βοβ-ντα ότι ισινέ μπαγιά σαρέ οντουλά σο σικλιόλας. Κερντάς αλλαγές πι ζωγιάτε μπουτ σουγκό: τσσιναντάς τι κερέλ παρέα αμαλέντζαρ σο ισινέ βίαιοι, τσσιναντάς τι τσορέλ ντα τι πιλ καλό. Επειδή μανγκάας τι κεράς ι Ιεχωβάσκο γκι σαρέ κο πράγματα, αγαντάμ ότι για τι κεράς αμαρί ζωή πάκι ντα τι μπαριόλ αμαρό τσσαβό εκχέ κχερέστε σο κα νιωθίνελας αρακχαντό έπρεπε τι παντρίνας. Ντα ανταβά αβιλό-πες κο 1982.

Ντάβα-μαν γκοντί ότι ρόνταβας θέματα κο περιοδικά Σκοπιά ντα Ξύπνα! a για τι αρακχάβ ιστορίες τζενένγκε σο κερντέας ο αλλαγές σο μανγκάβας με-ντα τι κεράβ. Λιντόμ μπουτ ζορ λένγκε παραδειγμάσταρ! Λάβας θάρρος για τι συνεχίναβ ο μπαρό αγώνας σο κεράβας ντα μα τι τζαβ παλάλ. Κεράβας συνέχεια προσευχή κο Ιεχωβά ντα μανγκάβας λέσταρ μα τι τσσιναβέλ τι βοηθίνελ-μαν. Ο Τόνι ντα με μπολντιλάμ σαρ Μάρτυρες ι Ιεχωβάσκε κο Ιούλιος 1982.

Αβιλόμ αμαλίν ι Ιεχωβάσκι ντα ανταβά σωντάς μι ζωή. Επίσης, ο Τόνι ντα με ντικχλάμ μπουτ φαρ ο βας ι Ιεχωβάσκο κο δυσκολίες σο νακχάας. Αντράλ κατά δυσκολίες σικλιλάμ τι ντας μπέσα κο Ντεβέλ ντα αγαβάσα ότι βοβ πάντα βοηθίνελα ντα στηρίνελα αμαρί φαμιλί.—Ψαλμός 55:22.

Τθεράβας ι χαρά τι βοηθίναβ μι τσσαβές ντα μι τσσαγιά τι σικλιόν ι Ιεχωβάς, σαρ κερντόμας με-ντα. Ακανά τθεράβα ι ίδια χαρά σο ντικχάβα λένγκε-ντα τσσαβέν τι σικλιόν ι Ιεχωβάσκε.

Ακανά σοβάβα ιράτ σόσκε να νταράβα κατά μεριπέ ντα οντουλένταρ σο κα αβέν ανγκλ’ αμέντε. Ο Τόνι ντα με τζάσα κάθε εβδομάδα σε εκ γιαβέρ κχανγκιρί σο τθερένα ο Μάρτυρες ι Ιεχωβάσκε ντα ντάσα σαρό αμαρό σαάτι για τι ντας ζορ κο γιαβερά. Γιεκ λέντζαρ σικλιαράσα γιαβερέ τζενέν ότι άμα κα πακιάν κο Ιησούς, κα μπορίνεν βον-ντα τι λεν ζωή για πάντα.