Евреёря 2:1-18
2 Важ када амэ трэбуй тэ авас со май внимательни каринг кода, со ашунас, кай амэн тэ на одындярэл андэ риг.
2 Если нащи сас тэ парувэн и алава, савэ пэрэдинэ и анӷелоря, и если справедливо спушэнас важ вся, со и мануша терэнас най па законо и андэр со на кандэнас,
3 тоди сар амэ фэрисаваса лэ сындостар, если гиндосараса, кай нисо на ашэл кода, сар бахталэс спасый о Дэл? Пала када спэрва ԥэнэнас амаро Баро Хулай, и лэстирэ алава потвердисардэ кодэла, ко лэн ашундя.
4 О Дэл кадяжэ потвердисардясас када, кала терэлас чудеса, необычно и удивительно дила и кала дэлас пэско свынто зор, касти камэлас.
5 Важ кода кай най лэ анӷелонэнди во дя тэ хулаин пэ ԥув, сави авэла англэ и пала сави амэ дас дума.
6 Но ек мануш варикала пистросардя: «Со ашэл о мануш, кай ту тэ сэрэс пала лэстэ, и лэ манушэско шаво, кай ту тэ диқэс пала лэстэ?
7 Ту стодян лэс набут май тэлэ лэ анӷелонэндар, стердян, кай лэстар тэ марэл и бах и патив, и дян лэсти право тэ хулаий пэ кода, со ту стердян пэстирэ вастэнца.
8 Ту дян лэсти право тэ хулаий пэ вся». Кала о Дэл дя лэсти право тэ хулаий пэ вся, на ашэляпэ нисо, пэр со лэстэ нинай право. Но пока амэ на диқас, кай во тэ хулаий пэ вся.
9 О Исусо сас стодо набут май тэлэ лэ анӷелонэндар и амэ диқас, кай акана лэстар марэл и бах и патив. Лэ Дэвлэстар лэсти випэля кадэя бах важ кода, кай о Исусо фартэ мучисайля и муля. О Дэл здиқля пэ всаворэ па пэско баро ковло ди, кала о Исусо муля пала всаворэ.
10 Вся, со исин, — када важ о Дэл и через лэстэ. И кай лэстирэ шавэ тэ ашэн ашунглэ, па лэстирятэ авелоп правильно тэ стерэл акэ сар: кай через и бида и о ԥаримос тэ ашэл идеально о Барэдэр, саво поможый лэнди тэ спасынпэ.
11 Кодэлэстэ, ко свынцой, и кодэлэндэ, кас свынцон, ек дад. Важ када лэсти най лажаво тэ ԥэнэн пэр лэндэ ԥрала.
12 Во ԥэнэн: «Мэ лава тэ дав дума пала тиро алав пэстирэ ԥралэнди, андо ӷурто лава дилянца тэ андярав лашо алав пэр тутэ».
13 И инке: «Лава тэ надеисавав пэр тутэ». Ай кадяжэ: «Мэ и бэяцэ, савэн дя манди о Иегова*».
14 И важ кода кай кадэла бэяцэ — сынэ мануша, во тожэ ашэля манушэса, кай через пэстири смэрть тэ улэл кодэлэс, ко можэт тэ умарэл, — када лэ Бэнгэс,
15 ай кадяжэ, кай тэ освободий всаворэн, ко вся и жызня сас рабо через и дар англа смэрть.
16 Во поможый най лэ анӷелонэнди, ай лэ Авраамостирэ бэятонэнди.
17 Вижал, во трэбуй сас андэ вся тэ шолпэ пэ пэстирэ ԥрала. Во стердя када, кай андэ лэ Дэвлэстири дила во тэ ашэл одяло и кандино ӷлавно рашай и тоди тэ анэн и жэртва пала лэ народоско бэзэх, кай тэ примирий лэс лэ Дэвлэса.
18 И важ кода кай во екжэно мучияспэ, кала лэстэ сас ԥари время, во можэт тэ поможый кодэлэнди, касти тожэ прижалпэ тэ пэрэандярэл и ԥари время.
