Матфеё 2:1-23
2 О Исусо арақаделя андо Вифлее́мо, саво андэ Иуде́я, кала правияс о царё И́радо*. Через дэсави время андо Иерусалимо авелэ и драбатяримаря* па Востоко
2 и ԥэндэ: «Кай о иудейско царё, саво арақаделя? Амэ додиқлям лэстири черӷай, кала самас по Востоко, и авелям тэ тэлювас лэсти».
3 Кала о царё И́радо ашундя пала када, лэсти по ди ашэля неспокойно и вместе лэса и всаворэнди, ко жувэл андо Иерусалимо.
4 Во стидя всаворэ́ барэ рашан и лэ закониконэн и пушля лэндар, кай трэбуй тэ арақадёл о Христос*.
5 Вонэ ԥэндэ: «Андо Вифлее́мо, саво андэ Иуде́я, важ кода кай ек лэ Дэвлэско особо мануш пистросардя:
6 „Ту, Вифлее́мо андэ Иуде́я, важ и иудейски правителя важно форо, важ кода кай тутар жала о правителё, саво лэла тэ диқэл пала мэрно народо, Израилё*“».
7 Тоди о И́радо чоралэс ақардя каринг пэстэ лэ драбатяримарен, уӷангля лэндар и точно время, кала дицэля и черӷай,
8 бишалдя лэн андо Вифлее́мо и ԥэндя: «Жан и родэн лэ бэятос, ай кала виарақэна, ԥэнэн манди, кай и мэ тэ жав и тэ тэлював лэсти».
9 И драбатяримаря ашундэ лэ царёс и жылэ андо дром. И черӷай, сави вонэ диқлэ инке по Востоко, жалас англа лэндэ, пока на терделя пэ кодэва ҭан, кай сас о бэято.
10 Кала и драбатяримаря додиқлэ, кай и черӷай терделя, вонэ фартэ залошайлэ.
11 Вонэ зажылэ андо цэр, додиқлэ лэ бэятос и лэстиря да, ла Мария, пэлинэ пэ чанга и тэлелэ лэсти, ай потом подарисардэ лэсти сомнак, ладано и мира*.
12 Андэ пэстири страна вонэ жылэ аврэ дромэса, важ кода кай о Дэл андэ сунэстэ приԥэндя лэнди тэ на ринпэ каринг о И́радо.
13 Кала и драбатяримаря ужылэтар, лэ Иосифости андэ сунэстэ сыкаделя лэ Иеговаско* анӷело и ԥэндя: «Лэ кадэлэ бэятос и лэстиря да и наш андо Египто. Ашпэ котэ, пока мэ на ԥэнава тути тэ риспэ, важ кода кай о И́радо камэл тэ виарақэл лэ бэятос и тэ умарэл лэс».
14 Андэ кодэя жэ рят о Ио́сифо ля лэ бэятос и ла Мария и жыля андо Египто.
15 Во ашэласпэ котэ, пока на муля о И́радо. Кадя ашэля, сар ԥэндя о Иегова* через пэско особо мануш: «Мэ ақардэм мэрнэ шавэс, кай во тэ авэл анда Египто».
16 Кала о И́радо поля, кай и драбатяримаря лэс дилярдэ, во заԥабеля холятар и приԥэндя тэ умарэн андо Вифлее́мо и андэ пашутнэ фороря всаворэ́ шаворэн, савэнди инке на сас дуй бэрш. (Во поля, скати бэрш лэ бэятости, па кода, со ԥэндэ и драбатяримаря.)
17 Кадя ашэля, сар сас ԥэндо через лэ Дэвлэско особо мануш о Ереми́я:
18 «Андэ Ра́ма ашундёлас, сар ровэн и фартэ ӷолосын. И Рахи́ль ровэлас пала пэстирэ бэяцэ и на камэлас тэ улэлпэ, важ кода кай лэн на ашэля».
19 Кала о И́радо муля, лэ Иосифости андо Египто сыкаделя андэ сунэстэ лэ Иеговаско* анӷело
20 и ԥэндя: «Лэ кадэлэ бэятос и лэстиря да и жа андо Израилё, важ кода кай мулинэ кодэла, ко камэлас тэ умарэл лэ бэятос».
21 О Ио́сифо ля лэ бэятос и ла Мария и рисайля андо Израилё.
22 Но кала во ашундя, кай андэ Иуде́я правий лэ Ирадоско шаво о Архела́ё, во дарайля интя тэ жал. Тай инке о Дэл андэ сунэстэ ԥэндя лэсти: «На́ жа интя», и важ када во жыля андэ Галиле́я.
23 Во авеля интя и ля тэ жувэл андо форо Назаре́то. Кадя ашэля, сар сас ԥэндо через и особи мануша: «Пэр лэстэ ԥэнэна назаретя́нино*».
Сноски
^ Или «мануша, савэ драбатярэн па черӷая».
^ Или «Избрано».
^ Или «тэ пасый мэрнэ народос, лэ Израилёс».
^ Када сас смола, или соко, анда витки. Ла сԥабарэнас, кай драго тэ қандэл.
^ Файма, када лэ еврейсконэ алавэстар, саво означает «росточко».
