Со май бут лашимос амэ уӷанас пала мануш, со май фартэ во амэнди чалёл и амари дружба лэса ашэл инке май састи. Кадя жэ и лэ Иеговаса. Кала амэ май бут ласа тэ уӷанас саво во, амэ май драго лэс поласа и во авэла инке май пашэ каринг амэндэ. Анда всаворэ лашэ лэ Дэвлэстирэ качестворя, исин штар, савэ май ӷлавни. Када зор, мудрость, справедливость и любовь.

«О Владыка Ӷосподо Иегова! Ту стердян о нэбо и ԥув пэстирэ барэ зорэса» (ИЕРЕМИЯ 32:17).

Лэ Дэвлэско зор дицол андэ кода, со во создал. Например, со ту чуствуеш, кала вижас миласа пэ вулица? Татимос лэ қамэстар. Но па чачимастэ када сыкавэл лэ Дэвлэско зор. Саво зор жал лэ қамэстар? О паи тирёл, кала и температура ваздэлпэ жы кай и 100 ӷрадусоря. Ай о қам варикай пэ 150 000 разоря инке май ԥабардо. Кажно секунда лэ қамэстар жал кацаво зор, сар кала взорвинпэ миллионоря ядерни бомбы.

Если тэ сыстосарас андо Космосо и миллиардоря черӷая, о Қам, када цыкнёры черӷай машкар лэндэ. И учони полинэ, кай ек анда само барэ черӷая, када черӷай UY Щита. Вонэ ԥэнэн, кай кадэя черӷай пэ скати бари, кай если ла тэ стас вместо қам, то вой заушаравэла и ԥув и зажала пала орбита кай лэ Юпитеростири планета. Када хоть варисар поможый тэ полас и алава, савэ ԥэндя о Иеремия, кай о Дэл Иегова создал о нэбо и ԥув, амаро Космосо, пэстирэ барэ зорэса.

 Со амэнди можэт тэ дэл лэ Дэвлэско зор? Амари жызня зависит кодэлэстар, со создал о Дэл. Например, када, со жал лэ қамэстар и со дэл и ԥув. Кадяжэ о Дэл пэстирэ барэ зорэса, можэт тэ поможый лэ манушэнди. Сар када? Андэ пэрво вико о Дэл дя пэско зор лэ Иисусости, кай во тэ терэл чудеса. Пала када андэ Библия пистромэ: «И корэ лэн тэ диқэн, кодэла, ко лангал, лэн тэ ԥирэн, и прокажённи ашэн зоралэ, и мулэ ринпэ каринг и жызня» (Матфея 11:5). Ай со андэ амари время? Андэ Библия пистромэ: «Во дэл зор кодэлэсти, ко цыеля». Кадяжэ андэ Библия исин кацавэ алава: «Кодэла, ко аштярэн лэ Иеговастар о лашимос, упалэ лэна зор» (Исаия 40:29, 31). О Иегова камэл тэ дэл пэско зор, кай амэ тэ пэрэандярас амаро ԥаримос (2 Коринфянам 4:7). Камэс ту тэ ашэс друӷоса кодэлэсти, ко кадя диқэл пала тутэ и можэт тэ дэл тути пэско баро зор?

«Сар дэ бут ту создал, о Иегова! Ту вся создал фартэ мудро» (ПСАЛОМ 104:24).

Со май бут амэ уӷанас пала кода, со создал о Дэл, со май фартэ амэнди лэл тэ чалёл лэстири мудрость. И учони драго роздиқэн кода, со создал о Иегова, кай потом тэ пэрэлэн када кай и природа и тэ терэн кадя жэ. Например, кала терэн варисо цыкноро, ԥэнаса, застёжка пэ липучка и жы кай варисо баро важ о самолёто. Пэ када ԥэнэн биомиметика или биомимикрия.

Инке май фартэ дицол лэ Дэвлэстири мудрость андэ кода, сар дэ драго о Дэл создал лэ манушэс. Подаса дума, сар барёл о бэято андо йло кай и жувли, кала вой заԥирдя. Спэрва о бэято фартэ цыкноро. Сар прожал и время, кай о бэято лэн тэ барён орӷаноря, кокаля, вязы и тила. Вся када жал андэ пэстири время. И через девять шона во арақадёлпэ. Кала и мануша диқэн лэ Дэвлэстири бари мудрость андэ кода, сар во создал лэ манушэс, вонэ полэн и алава, савэ запистромэ андэ Библия: «Авава тэ хвалисарав тут, важ кода кай ту шукарнэс создал ман и кадэлэстар мандэ бари патив каринг тутэ» (Псалом 139:14).

Со амэнди можэт тэ дэл лэ Дэвлэстири мудрость? Амаро Создателё ӷанэн, со трэбуй, кай амэ тэ авас бахталэ. О Дэл вся ӷанэн и полэл. Во анда оди дэл амэнди пэстири мудрость. Ла можно тэ виарақас андэ Библия. Например, андэ Библия пистромэ кацавэ алава: «Анда вся оди простин ек еқэс» (Колоссянам 3:13). Када годявэрнэс? Да. И учони полинэ, кай и мануша, савэ ӷанэн тэ простин, май драго совэн, лэндэ най кадя часто ваздэлпэ и давления, най кадя часто лэлпэ депрессия и авэр насвалимос. Сар лашо друӷо, саво полэл и диқэл пала амэндэ, о Дэл вся и время можэт драго и ковлэс тэ подԥэнэн амэнди (2 Тимофею 3:16, 17). Камлоп и ту, кай тутэ тэ авэл кацаво друӷо?

«О Иегова любий справедливость» (ПСАЛОМ 37:28).

О Дэл андэ вся андярэл пэс справедливо. Чаче, «нэ можэт о чачуно Дэл тэ терэл о найлашимос и о Всемоӷущё тэ андярэл пэс нэсправедливо!» (Иов 34:10). Во справедливо виандярэл о  сындо. Акэ со пала Иегова ԥэндя о псалмопевцо: «Ту сындоса и народоря па чачимастэ» (Псалом 67:4). Кадя сар «о Иегова диқэл оди», во шол сама, кала и мануша притерэнпэ, сразу полэл кай о чачимос, ай кай най и сындой лэ манушэн па лэндири дила (1 Самуила 16:7). Кадяжэ, о Дэл диқэл, кала лэ манушэнца обжанпэ нэсправедливо, и кала подтинэн аврэн. И во дэл алав, кай «кодэла, ко терэн о найлашимос, будэр на авэна пэ ԥув» (Притчи 2:22).

Но о Дэл най кодэва сындомари, саво кати и аштярэл, кай тэ спушэл лэ манушэндар пала лэндирэ бэзэха. Во вся и время камэл тэ виарақэл, васо тэ жалуий и тэ простий лэ манушэс. Андэ Библия ԥэнэнпэ, кай «о Иегова простий и жалуий анда вся оди» дажэ найлашэ манушэн, если вонэ анда вся оди каинпэ андэ пэстирэ бэзэха. Хэба най кацави трэбуй тэ авэл и чачуни справедливость? (Псалом 103:8; 2 Петра 3:9).

Со амэнди можэт тэ дэл лэ Дэвлэстири справедливость? О апостоло Пётро ԥэндя: «О Дэл на диқэл, сави кай о мануш нацыя. Но андэ кажно народо исин кодэва, ко дарал лэстар и ритярэл лэско законо, ко кадя терэл чалёл лэсти» (Деяния 10:34, 35). О Дэл на диқэл, ко о мануш, сави лэстэ нацыя, анда сави во страна или скати лэстэ ловэ. И кадэлэстар амэндэ кажнонэстэ можэт тэ авэл бут лашимос.

О Дэл камэл, кай амэ тэ полас васо во справедливо и тэ терас кадя жэ. Важ када во дя амэнди и совесть. Андэ Библия ԥэнэнпэ, кай и совесть, када законо, саво андэ амарэ одя и саво поможый амэнди тэ полас, драго амэ пэс андярас чи най (Римлянам 2:15). Со амэнди кадэлэстар? Сар амэ драго сытярдям амари совесть, вой поможыя амэнди тэ на терас найгодявэрнэс и нэсправедливо. Ай если амэ шылисайлям, и совесть поможыя амэнди тэ каисавас и андэ варисо тэ парудювас. Сар жэ амэ лошалэ, кай о Дэл екжэно справедливо и сытярэл амэн кадэлэсти! И важ када амэ камас тэ авас инке май лашэ друӷоря лэса.

«О Дэл исин любовь» (1 ИОАННА 4:8).

Лэ Дэвлэстэ исин зор и во справедливо и мудро. Но андэ Библия никай на ԥэнэнпэ пала Дэл, кай во исин зор, мудрость и справедливость. Андэр латэ пистромэ, кай о Дэл исин любовь. Васо? Андэ вся, со терэл о Иегова, дицол лэско зор, мудрость и справедливость, но терэл во када через и любовь. Вся, со терэл о Иегова, во терэл важ кода кай любий.

О Иегова ля тэ создаёт най важ кода, кай лэсти варисо на хутилэлас. Через и любовь во создал по нэбо и пэ ԥув кодэлэн, ко сможэт тэ цэний и тэ полэл, кай во анда вся оди диқэл пала лэндэ. Во создал и ԥув кадя, кай вой тэ ашэл сар райкано цэр важ и мануша. И о Дэл на парашэл тэ диқэл пала мануша, во «приԥэнэн лэ қамэсти тэ ваздэлпэ важ кодэла, ко терэл о лашимос и ко терэл о найлашимос, и бишалэл о брышын важ и лашэ и важ и найлашэ мануша» (Матфея 5:45).

Кадяжэ, «о Иегова цэний и жалуий анда вся оди» (Иакова 5:11). Лэсти куч кодэла, ко всаворэ одеса камэл тэ уӷанэн лэс и тэ ашэл лэстирэ друӷоса. Во цэний кажнонэ кацавэ манушэс. О Дэл подритярэл амэн через и Библия, кай во «найдур кажнонэстар амэндар» (Деяния 17:27).

Со амэнди можэт тэ дэл лэ Дэвлэстири любовь? Амэнди чалёл тэ диқас, кала шукарнэс зажал о қам. Амэнди чалёл тэ ашунас сар асал о бэято. Амэнди куч лэ манушэстири любовь, саво амэнди пашэ. На ԥэнэса, кай би кадэлэско амэ нэ сможэм тэ жувас, но кадэлэстар амари жызня ашэл май барвали.

Инке сар о Дэл сыкавэл пэстири любовь, када и молитва. Андэ Библия ԥэнэнпэ: «Ни пала со фартэ на загиндонпэ, но андэ вся, кала мангэнпэ и кала ясвэнца мангэнпэ, блаӷодарин и анда оди росԥэнэн лэ Дэвлэсти, со камэн». Сар любящё дад во камэл, кай амэ тэ росԥэнас лэсти вся, пала со загиндосавас. Важ када о Иегова дэл алав, кай дэла амэнди «о лашимос андо ди, саво май баро кодэлэстар, со полэл о мануш» (Филиппийцам 4:6, 7).

Амэ уӷанглям пала штар ӷлавни лэ Дэвлэстирэ качестворя, када зор, мудрость, справедливость и любовь. Поможысардя када тути май драго тэ полэс, ко када о Дэл? Кай о Дэл тэ авэл тути инке май пашутно друӷо, давай уӷанаса, со во ужэ стердя важ амэндэ и со стерэла англэ.