И ЛЮСИЯ ЛАНГАЛ ПО ЛЕВО ПЭРНО. Кала вой сас цынёни, вой занасвайля ԥарэ насвалимаса. Кадэва насвалимос росхал и нервно система, и во пэрэжал аврэ манушэсти. Пэр лэстэ ԥэнэн полиомиелито. Кала ла Люсияти сас 16 бэрш и манушни, савятэ вой терэлас бути ԥэндя: «Када тутэ лэ Дэвлэстар, кай ту на кандэсас пэстиря да и найдраго ласа дэсас дума!» Прожылэ ужэ бут бэрша, ай и Люсия всаек сэрэлас кадэла алава.

КАЛА И ДАМАРИС РОСԤЭНДЯ ПЭСТИРЭ ДАДЭСТИ, КАЙ ЛАТЭ РАКО АНДЭ ГОДИ, во зацыписайля: «Со ту стердян? Ту, файма, стердян варисаво бэзэх, кай туса кацаво тердяпэ. Чаче, када тутэ лэ Дэвлэстар!» Важ и Дамарис лэ дадэстирэ алава слинэ сар шури андо ди.

Жы анда дэлмутни время и мануша гиндон, кала исин насвалимос, када лэ Дэвлэстар. Андэ книжка андэ сави сас пистромэ кода, со терэласпэ лэ манушэндэ андэ библейско время, ԥэнэнпэ акэ со. И мануша, савэ жувэнас андэ ек время лэ Иисусоса патянас, кай кабута «о насвалимос, када бэзэх, саво лэ манушэсти пэрэдяпэ лэ родостар. Чи кала о мануш екжэно стердя бэзэх и када о Дэл марэл лэс важ о бэзэх» (Manners and Customs of Bible Lands). Сар прожылэ бут викоря посли Христос, андэ ек книжка важ лэ врачонэндири история пала када ԥэнэнаспэ: «Дэсавэ гиндонас, кай када о Дэл важ лэндирэ бэзэха бишалэл пэ мануша насвалимос, саво йто пэрэжал и йто умарэл» (Medieval Medicine and the Plague). Андо 14 вико андэ Европа сас насвалимос, саво йто пэрэжал и йто умарэл. Через лэстэ мулинэ миллионоря мануша. Сас кадэва насвалимос лэ Дэвлэстар? Чи сар гиндон и учёни, када сас обычно инфекцыя? Варико пушэла пэстар: «Чаче, о Дэл бишалэл пэ мануша насвалимос важ лэндирэ бэзэха?» *

ПОГИНДОСАР. Сар лэ манушэндэ исин насвалимос и ԥаримос лэ Дэвлэстар, саво вонэ затердэ, тоди васо лэско шаво о Иисус Христос исцелияс лэ насвалэн? Хэба, када сжылопэ кодэлэса, кай о Дэл терэл лашимос и чачимос и обжалпэ лэ манушэнца драго, сар вонэ затердэ? (Матфея 4:23, 24). О Иисусо никала на жалас против кода, со камэлас о Дэл. Во ԥэнэнас: «Мэ вся и время терав кода, со во камэл» и «Мэ терав кадя, сар приԥэндя манди о дад» (Иоанна 8:29; 14:31).

Анда Библия драго дицол, кай о Дэл Иегова «дур лэ хохаимастар» (Второзаконие 32:4). Ԥэнаса, о Дэл никала на линоп тэ терэл кадя, кай тэ пэрэл о самолёто и тэ умарэл всаворэн андэр лэстэ, кай тэ спушэл еқэстар важ лэско бэзэх. О Авраамо, саво на парашэлас тэ кандэл лэ Иеговас, ӷанэнас, кай о Дэл терэл лашимос и чачимос и во никала на умарэла «кодэлэс, ко лэс кандэл кодэлэса, ко терэл найлашимос» (Бытие 18:23, 25). Кадяжэ андэ Библия ԥэнэнпэ: «О чачуно Дэл никала на терэл о найчачимос и о всемоӷущё никала на шылийпэ!» (Иов 34:10 жы кай 12).

Авелоп найдраго тэ гиндос, кай о ԥаримос, саво амэндэ исин андэ жызня, када о Дэл просытярэл амэн важ варисаво бэзэх. О Иисусо драго дя тэ полэн када, кала во и ученикоря додиқлэ лэ муршэс, саво арақаделяпэ коро. Лэ Иисусостирэ ученикоря пушлэ: «Учителё, ко стердя бэзэх, во, лэско дад чи лэстири дэй, кай во арақаделяпэ  коро?» О Иисусо ԥэндя: «Ни во, ни лэско дад ни лэстири дэй на стердэ бэзэх» (Иоанна 9:1 жы кай 3).

Амэ полас, кай андэ кодэя время и мануша патянас андо хохаимос, кай о Дэл бишалэл и биды и о ԥаримос лэ манушэнди пала лэнго бэзэх. Тоди полас, васо динэ наздив лэ Иисусостирэ ученикоря, кала ашундэ, кай ни о мурш ни лэско дад ни лэстири дэй на сас дошалэ андэ лэско насвалимос. О Иисусо исцелисардя лэ корэ манушэс. Кадэлэса во най кати стердя лащи дила. Во сыкадя, кай када хохаимос, кала и мануша гиндон, кай о Дэл марэл, бишалэл и биды и о ԥаримос лэ манушэнди важ лэнго бэзэх (Иоанна 9:6, 7). Кала ӷанас, кай о насвалимос лэ манушэндэ най лэ Дэвлэстар важ лэнго бэзэх, када терэл май вушэро по ди кодэлэнди, кастэ найлашо зор.

Кода, со пистромэ андэ Библия, дэл тэ патяс,

• кай «Нико на стерэла кадя, кай о Дэл тэ стерэл о найлашимос и во лэс на терэл ни через со и ни через кастэ» (ИАКОВА 1:13). Инке о Дэл улэла «о найлашимос», саво исин ужэ дэлмут кай всаворэ мануша. Ай кадяжэ йто улэла о насвалимос и смэрть.

• кай о Иисусо «исцелисардя всаворэн, ко сас насвало» (МАТФЕЯ 8:16). Лэ Дэвлэско шаво исцелияс лэ манушэн и кадэлэса во сыкадя, кай лэ Дэвлэско царство парувэла и жызня пэ ԥув, сави авэла англэ.

• кай «Во [о Дэл] виқосэла всаворэ ясва па лэндирэ яқа, и смэрть будэр на авэла, нисави бида, ни дук будэр на авэла. Кода, со сас, прожыля» (ОТКРОВЕНИЕ 21:3 жы кай 5).

Васо тоди андо миро скати дук и ԥаримос? Када камэн тэ уӷанэн всаворэ мануша ужэ бут бэрша. Сар андэ када о Дэл найдошало, тоди ко дошало? Пала када уӷанаса андэ авэр статья.