УРОКО 3
Катар амэ ӷанас, кай и Библия лэ Дэвлэстар?
1. Кастар и Библия?
И лащи новость пала кода, кай и мануша жувэна вечно пэ ԥув, запистромэ андэ Библия (Псалом 37:29). Андэ Библия 66 найбарэ книӷи. Ла пистронас варикай 40 мурша, савэ кандэнас лэ Дэвлэс. Пэрви панч книӷи пистросардя о пророко Моисеё варикай 3 500 бэрш палпалэ. И послиднё книӷа пистросардя о апостоло Иоанно май бут чем 1 900 бэрш палпалэ. Кастирэ гиндоря запистромэ андэ Библия? О Дэл через пэско свынто духо пэрэдэлас лэ пророконэнди, со тэ запистрон (2 Самуила 23:2). Вонэ запистронас най пэстирэ гиндоря, ай лэ Дэвлэстирэ. Вижал, и Библия лэ Дэвлэстар. (Адиносар 2 Тимофею 3:16; 2 Петра 1:20, 21.)
Дик видео «Кастар и Библия?».
2. Катар амэ ӷанас, кай и Библия, када книӷа лэ Дэвлэстар?
И Библия, када книӷа лэ Дэвлэстар, важ кода кай андэр латэ точно и фартэ драго росԥэнэнпэ, со авэла англэ. Ни ек мануш нэ можэт корко пэстар када тэ росԥэнэн (Иисус Навин 23:14). Кати о Всемоӷущё Дэл можэт точно тэ ԥэнэн, со аштярэл лэ манушэн англэ. (Адиносар Исаия 42:9; 46:10.)
Амэ полас, кай и книӷа лэ Дэвлэстар трэбуй тэ авэл кати ек кацави. Андэ амари время ужэ вимэклэ розбут милионоря Библии пэ бут шыба. Хоть када и фартэ пурани книӷа, вой сжалпэ кодэлэса, со доԥэндэ и учони мануша. Кадяжэ вся, со андэр латэ запистросардэ и 40 разни мануша, сыкавэл ек гиндо *. Кода, пала со ԥэнэнпэ андэ Библия, сыкавэл, кай о Дэл любий амэн. Вой и андэ амарэ деса дэл помощь лэ манушэнди тэ парувэн пэстири жызня андэ лащи риг. Вся када поможый бутэ манушэнди тэ патян, кай и Библия, када лэ Дэвлэско Алав. (Адиносар 1 Фессалоникийцам 2:13.)
Дик видео «Катар амэ ӷанас, кай и Библия лэ Дэвлэстар?».
3. Пала со ԥэнэнпэ андэ Библия?
Важно тема андэ Библия, када и лащи новость, кай о любящё Дэл загиндосардя важ о миро райкани жызня англэ. Андэ Библия росԥэнэнпэ, сар и пэрви мануша хасардэ и райско жызня и сар о Дэл упалэ стерэла пэ ԥув раё. (Адиносар Откровение 21:4, 5.)
Андэ Библия кадяжэ исин законоря, принцыпоря и советоря, савэ дэн помощь андэ жызня. Кадяжэ, андэр латэ исин бут истории, савэ поможын тэ полас, саво о Дэл. Через вся када амэ май драго уӷанас амарэ Создателёс. Андэ Библия росԥэнэнпэ, сар тэ ашас лэстирэ друӷонэнца. (Адиносар Псалом 19:7, 11; Иакова 2:23; 4:8.)
4. Сар тэ полас и Библия?
Кадэя брашура поможыя тути тэ полэс, со пистромэ андэ Библия. Кала о Иисусо сытярэлас лэ манушэн, во ԥэнэнас и алава анда Свынто Писания, ай тоди поможыяс када тэ полэн. Па кадэя брашура ту можэш тэ сытёс кадяжэ. (Адиносар Луки 24:27, 45.)
Нисо нэ можэт тэ авэл май драго, чем тэ ӷанэс и лащи новость лэ Дэвлэстар! И всаек дэсавэ на шон сама пэр латэ, ай варико через кадэя новость дажэ можэт тэ холявэл. Но мэк тут када на тердярэл. Если ту на парашэса тэ уӷанэс лэ Дэвлэс, тутэ авэла вечно жызня. (Адиносар Иоанна 17:3.)
^ абз. 3 Май бут пала када можно тэ уӷанэс анда 2 ӷлава андэ книжка «Сости сытярэл амэн и Библия?».
