Англа кода, сар о Иисусо тэ авэл пэ ԥув, во жувэлас по нэбо сар анӷело (Иоанна 8:23). Во сас пэрво, кас создал о Дэл. Тоди о Иисусо поможыяс пэстирэ Дадэсти тэ создает всаворэ авэр тварении. Кати лэ Иисусос о Иегова создал екжэно. Важ када пэр лэстэ ԥэнэн, кай во лэ Дэвлэско Шаво, саво «ек кацаво» (Иоанна 1:14). По Иисусо кадяжэ ԥэнэн «Алав», важ кода кай через лэстэ о Дэл пэрэдэлас пэстирэ алава. (Адиносар Притчи 8:22, 23, 30; Колоссянам 1:15, 16.)

О Дэл пэрэандярдя пэстирэ Шавэстири жызня па нэбо, кай во тэ арақадёлпэ кай и иудейско щей, савя ақарэнас Мария. Вой на сас миростэ и када сыкавэл, кай лэ Иисусостэ на сас манушыкано дад (Луки 1:30—35). О Иисусо авеля пэ ԥув, 1) кай тэ росԥэнэн о чачимос пала Дэл, 2) кай тэ сыкавэл, сар тэ кандас лэ Дэвлэс, дажэ кала найвушэро и 3) кай тэ отдэл пэстири совершэно жызня сар выкупо. (Адиносар Матфея 20:28.)

О выкупо, када цэмин, кай тэ витинэн лэ манушэс ла смэртятар (Исход 21:29, 30). О Дэл на камэлас, кай и мануша тэ ԥурён и тэ мэрэн. Катар амэ када ӷанас? О Дэл ԥэндя лэ пэрвонэ манушэсти, лэ Адамости, кай если во стерэла бэзэх, то мэрэла. Вижал, тэ на стердоп о Адамо бэзэх, во никала на мулиноп (Бытие 2:16, 17; 5:5). Андэ Библия ԥэнэнпэ, кай и смэрть «авеля» андэ люма через о Адамо. Во пэрэдя всаворэ манушэнди о бэзэх и смэрть. Амэнди трэбуй о выкупо, кай тэ ашас свободни ла смэртятар, сави амэнди пэрэдя о Адамо. (Адиносар Римлянам 5:12; 6:23.)

 Ко можэт тэ дэл о выкупо, кай тэ витинэл амэн ла смэртятар? Кала о мануш мэрэл, во потинэл кати важ пэстирэ ӷрехоря. Ни ек найсовершэно мануш нэ можэт тэ потинэл важ и ӷрехоря, савэ стердэ авэр мануша. (Адиносар Псалом 49:7—9.)

Кати о Иисусо сас совершэно мануш. Лэсти на трэбуй сас тэ мэрэл важ пэстирэ ӷрехоря, важ кода кай во на стердясас нисаво ӷрехо. О Иисусо муля важ и ӷрехоря, савэ стердэ всаворэ авэр мануша. О Дэл сыкадя, сар дэ фартэ любий лэ манушэн, кала бишалдя пэ ԥув пэстирэ Шавэс, кай во тэ отдэл пэстири жызня важ амэндэ. О Иисусо тожэ сыкадя, кай любий амэн, кала кангля пэстирэ Дадэс и отдя и жызня важ амарэ ӷрехоря. (Адиносар Иоанна 3:16; Римлянам 5:18, 19.)

Дик видео «Васо о Иисусо муля?».

Кала о Иисусо жувэлас пэ ԥув, во рияс о зор лэ насвалэнди, рияс каринг и жызня лэ мулэн и поможыяс кодэлэнди, ко попэля андэ бида. Кадэлэса во сыкадя, со стерэла важ и мануша, савэ кандэн лэ Дэвлэс (Матфея 15:30, 31; Иоанна 5:28). Кала о Иисусо муля, о Дэл рисардя лэс каринг и жызня сар анӷелос (1 Петра 3:18). Посли када о Иисусо трэбуй сас тэ аштярэл, кала о Иегова дэла лэсти тэ правий пэ вся и ԥув (Евреям 10:12, 13). Акана о Иисусо правий по нэбо сар Царё, ай кодэла, ко кандэн лэс, росԥэнэн кадэя лащи новость па вся и ԥув. (Адиносар Даниил 7:13, 14; Матфея 24:14.)

Йто о Иисусо, сар зорало Царё, улэла вся о ԥаримос и биды, ай кадяжэ лэ найлашэ манушэн. Всаворэ, ко патян андо Иисусо и кандэн лэс, лэна тэ жувэн андо раё пэ ԥув. (Адиносар Псалом 37:9—11.)