О Иегова создал и ԥув важ и мануша. И ԥув, када амаро цэр. О Дэл на загиндосардясас, кай и пэрви мануша, о Адамо и Ева, тэ жувэн по нэбо. Важ и жызня по нэбо о Иегова создал лэ анӷелонэн (Иов 38:4, 7). Ай лэ манушэнди о Дэл дя тэ жувэн андо Эдэмско садо, андо раё пэ ԥув (Бытие 2:15—17). О Иегова камэлас, кай всаворэ мануша тэ жувэн пэ ԥув вечно и никала тэ на мэрэн. (Адиносар Псалом 37:29; 115:16.)

Спэрва о раё сас кати андо Эдэмско садо. Через дэсави время кай и пэрви мануша трэбуй сас тэ авэн бэяцэ, и тоди и мануша жудоп па вся и ԥув. Вонэ стердоп, кай о раё тэ авэл май баро, и вся и ԥув ашэлоп райкано садо (Бытие 1:28). И ԥув авэла вечно. Вой вся и время авэла амаро цэр. (Адиносар Псалом 104:5.)

Дик видео «Васо о Дэл создал и ԥув?».

О Адамо и Ева жылэ против Дэл, и важ када во видарадя лэн анда Эдэмско садо. О раё будэр нинай пэ ԥув, и никастэ анда мануша на вижыля тэ рий лэс палпалэ. Кодэла времятар пэ ԥув правин и найлашэ мануша. (Адиносар Бытие 3:23, 24.)

Но отԥэнделя ли о Иегова кодэлэстар, со во спэрва загиндосардясас важ и мануша? Най! Кай о Дэл фартэ баро зор. Нико и нисо нэ можэт тэ тердярэл лэ Иеговас, кай во тэ на стерэл кода, со загиндосардя (Исаия 45:18). О Иегова упалэ стерэла о раё пэ ԥув. (Адиносар Псалом 37:11, 34.)

О раё пэ ԥув авэла тоди, кала правия о Иисусо. Андэ война Армагеддоно о Иисусо лэ Дэвлэстирэ анӷелонэнца умарэла кодэлэн, ко на кандэл лэ Дэвлэс. Тоди во шола лэ Сатанас андэ безна и ԥандавэла лэс котэ пэ 1 000 бэрш.  Лэ Дэвлэстирэ служытеля пэрэжувэна кадэя война, важ кода кай о Иисусо ԥэнэна лэнди, со тэ терэн, и фэрия лэн. Вонэ жувэна вечно андо Раё пэ ԥув. (Адиносар Откровение 20:1—3; 21:3, 4.)

Кала о Дэл улэла о найлашимос па ԥув? О Иисусо росԥэндя, андэр со дицола, кай кадэя время ужэ пашэ. Кода, со терэлпэ андэ люма, сыкавэл, кай и мануша моӷут тэ на вижувэн. Чаче, кода, кай амэ жувас андэ послидни деса, драго дицол. (Адиносар Матфея 24:3, 7—14, 21, 22.)

Кала о Иисусо лэла тэ правий 1 000 бэрш, во улэла вся о ԥаримос и биды (Исаия 9:6, 7; 11:9). Во кадяжэ улэла о бэзэх кодэлэндар, ко любий лэ Дэвлэс. Кадя через о Иисусо о Дэл стерэла, кай и мануша тэ на насвавэн, тэ на ԥурён и тэ на мэрэн. (Адиносар Исаия 25:8; 33:24.)

Андо Раё жувэна кодэла, ко кандэн лэ Дэвлэс (1 Иоанна 2:17). О Иисусо ԥэндя пэстирэ учениконэнди тэ родэн лэ манушэн, савэндэ ковло ди и савэ камэн тэ сытён. Кадяжэ и ученикоря трэбуй тэ поможын кацавэ манушэнди, кай вонэ тэ ашэн лэ Дэвлэстирэ друӷоря. Адес о Иегова поможый бутэ манушэнди, кай вонэ тэ жувэн андо Раё пэ ԥув (Софония 2:3). Котэ, кай стидэнпэ лэ Иеговастирэ свидетеля, и мануша сытён тэ жувэн кадя, кай вонэ и лэндирэ еря тэ авэн бахталэ. И родителя и бэяцэ еқэҭанэ тэлён лэ Дэвлэсти и уӷанэн, сар кода, со пистромэ андэ Библия, можэт ужэ адес тэ поможый, кай и жызня лэндэ тэ авэл май лащи. (Адиносар Михей 4:1—4.)