Imaginisar tuche i situația cai avel: i Karen sili ca iech petrecerea de deș minutea cana așunel de palal iech vocea prinjiandi.

I Karen risarel pesco șero hai dichel la Jessica, lachi amali, cai sila dui glaje pâtărde andel vasta. Voi jianel că si pimos. I Jessica șiol iech glaja angla i Karen hai phenel lache: „Na-i cadea că ci san prea țâni anda iech țâra distracția?”

I Karen gândil-pe te phenel lache că ci camel, tha i Jessica si lachi amali. I Karen ci camel ca lachi amali te pachial că ci simțol-pe mișto ca i petrecerea. Mai but, i Jessica si iech anda le șeia „lașe”. Tha dacă voi piel, atunci ci daștil te avel cadichi de nasul. „Si numai pimos”, phenel pesche i Karen. „Ci si drogurea.”

Dacă aveias ande laco than, so chereias?

Caște les iech lași decizia ande cadal situații, trebul te avel-tu iech identitatea. I identitatea si iech simțo de andral, anda tute, cai phenel tuche con san hai ande soste pachias. Cana jianes cadal buchia, situ o zuralimos te avel-tu controlo pe chi viața, hai te na meches averen te cheren cadaia ande chio than. (1 Corinteni 9:26, 27)

Sar daștis te bariares cado zuralimos? Le răspunsuri le pușimatande cai aven, daștin te ajutin-tu.

Dacă prinjianes so jianes te cheres mișto hai ce calități situ, va avela-tu mai but pachiamos ande tute.

EXEMPLO BIBLICO: O apostolo Pavel scriisardea: „Hai, chiar cana ci dav duma cadea de mișto, siguro ci som sa cadea ando prinjianimos”. (2 Corinteni 11:6) Pentru că hachiarelas mișto le Scripturi, o Pavel daisardea te așel fermo cana aver zumade-les cuvintența. Vo ci meclea lenghe cuvintea nasul te covliaren lesco pachiamos ande peste. (2 Corinteni 10:10; 11:5)

CHER TUCHE IECH ANALIZA. Scriisar mai tele ce talento situ sau so jianes te cheres mai mișto.

Acana, phen iech șucar calitatea cai situ. (Sar exemplo, situ grija averendar? San generoso? San demno pachiamasco? San punctualo?)

Iech lanțo zuralo daștil te phaghiol catar i veriga mai slabo. Sa cadea, chi identitatea daștil te avel influențime nasul dacă meches ca le punctea slabo te controlin chi viața.

EXEMPLO BIBLICO: O apostolo Pavel jianelas save sas lesche punctea slabo. Vo scriisardea: „Ciaces, pala o manuș de andral placeal-ma i legea le Devleschi, tha dichav ande mânro corpo iech aver legea, cai phiravel războio contra i legea cai si andi mânri goghi hai încărel-ma phanglo tela i legea le păcatoschi savi si ande mânro corpo”. (Romani 7:22, 23)

CHER TUCHE IECH ANALIZA. Ce punctea slabo trebul te sichios te încăres-le tela o controlo?

Sar avelas te les iech taxi hai te phenes codolesche cai tradel-les te phiravel-tu ji cana ci mai siles combustibilo? Ci avelas mișto hai trebulas te pochines but, na-i cadea?

So sichioas? Le obiectivea sicaven tuche o drom hai ajutin-tu te na „phires” de ivea andi viața. Cadea că, jianes cai cames te arăsăs hai vi sar.

EXEMPLO BIBLICO: O apostolo Pavel scriisardea: „Ci nașav de ivea”. (1 Corinteni 9:26) Ando than te mechel numa te întâmplon-pe le buchia de ivea, o Pavel șiutea pesche obiectivea hai încărdea conto lendar andi viața. (Filipeni 3:12-14)

CHER TUCHE IECH ANALIZA. Scriisar mai tele trin obiectivea cai cames te cheres-le ando bărș cai avel.

Dacă ci jianes ande soste pachias, ci va jianeia so te cheres. Cadea sar iech cameleono, va paruveia chi „culoarea” pala codola cai sile pașa tute; cadai buchi va sicavela claro că ci situ chi identitatea.

Tha, dacă che acțiuni sile bazome pe soste pachias, va încăreia chi identitatea, vi cana aver cheren aver vareso.

EXEMPLO BIBLICO: Cana sas încă tărno, o profeto Daniel „sas hotărâme ande pesco ilo” te respectil Ie legi le Devlesche, vi cana sas-lo dur pesca familiatar. (Daniel 1:8) Cadea că, vo încărdea peschi identitatea. O Daniel traisardea pala soste pachialas vo.

CHER TUCHE IECH ANALIZA. Ande soste pachias tu? Sar exemplo: Pachias ando Del? Dacă da, sostar? So cherel tut te pachias că o Del existil?

Pachias că le norme morale le Devlesche sile ande chio miștimos? Dacă da, sostar?

Cadea că, so cames te aves: iech patrin cai orisavi covli barval phiravel-la sau iech cașt cai așel po than vi cana le bare barvalea aven contra leste? Zuriar mișto chi identitatea hai va aveia sar codo cașt. Cadai buchi va ajutila-tu te des răspunso ca o pușimos Con som me?.