1. So camel o Iehova anda sea le manușa?

 O IEHOVA cărdea le manușen hai mechlea-len te alosaren corcore so te cheren. Ande fiesavo ghies, cheras alosarimata. O mai baro alosarimos cai daștil te cherel-les iech manuș si te del peschi viața le Iehovasche hai te anel închinarea lesche ande iech than le phralența hai pheianța. O Iehova camel ca sea le manușa te cheren cadaia. Sostar? Anda codoia că vo iubil le manușen hai camel so si mai lașio anda lende. Vo camel te avel-len iech amalimos chidino lesa hai te bucurin-pe anda sea o timpo viațatar. (Deut. 30:19, 20; Gal. 6:7, 8)

2. So camel o Iehova anda codola cai păcătuisarde hai încă ci risarde-pe catar pengo phiraimos nasul? (1 Ioan 2:1)

² Cu sea cadala, o Iehova ci cherel chanicas te slujil lesche bi te camel. Vo mechel fiesaves te alosarel so te cherel. So întâmplol-pe cana iech creștino boldo ci așunel le Iehovastar hai cherel iech baro păcato? Dacă ci risarel-pe catar pesco phiraimos nasul, vo trebul te avel duriardo andai congregația. (1 Cor. 5:13) Tha chiar vi cana si cadea, o Iehova camel anda sea o ilo ca codo cai păcătuisardea te avel parpale leste hai te avel-les pale iech amalimos chidino lesa. Mai but, cado si iech motivo importanto  sostar o Iehova dea pesche Șiaves te merel anda amende – caște daștil te iertil codolen cai risaren-pe catar pengo phiraimos nasul. (Citisar 1 Ioan 2:1.) O Iehova si iech Del pherdo iubirea, cai zuriarel codolen cai cărde iech baro păcato te jian parpale leste. (Zah. 1:3; Rom. 2:4; Iac. 4:8)

3. Anda so va avela te das duma ande cado articolo?

³ O Iehova camel te las amen pala leste hai te dichas o păcato, hai codolen cai păcătuisarde cadea sar dichel-len vo. Ande cado articolo, va avela te das duma sar daisaras te cheras cadaia. Cana citis cado articolo, rode te diches: 1) sar phiradea-pe i congregația ando Corint cana iech phral păcătuisardea, 2) so phendea lenghe o Pavel te cheren pala so codo manuș risardea-pe catar pesco phiraimos nasul hai 3) so si ando ilo le Iehovasco caring codola cai cărde iech baro păcato.

SO CĂRDEA I CONGREGAȚIA ANDA CORINT CANA IECH PHRAL PĂCĂTUISARDEA?

4. Prin so nachlea i congregația anda Corint anda o dintuno secolo? (1 Corinteni 5:1, 2)

⁴ Citisar 1 Corinteni 5:1, 2. Cana o Pavel cherelas pesco trinto drom sar misionaro, vo așundea buchia zurales nasul anda i nevi congregația anda Corint. Iech phral anda codoi congregația sovelas pesca deiasa maștevo. Chiar vi le ‘manușa cai ci slujinas le Devlesche’ jianenas că cadaia sas nasul. I congregația na numai că ci dichelas nasul cadaia, tha daștil-pe că chichiva vi denas-pe bare lesa. Daștil-pe că chichiva andai congregația pachiaie că, dacă cheren cadaia, sicaven i mila le Iehovaschi hai lesco lașimos. Tha o Iehova dichel zurales nasul cana iech anda lesche manușa cherel iech baro păcato. Jianas ciaces că, cadale dilimasa, o murș meliardea o lașio anav la congregațiaco. Hai daștil-pe că codola cai phirenas lesa arăsănas vi von te gândin sar vo. Cadea că, so phendea o Pavel la congregațiache te cherel?

5. So phendea o Pavel la congregațiache te cherel hai so însemnolas cadaia? (1 Corinteni 5:13) (Dich vi i imaginea.)

⁵ Citisar 1 Corinteni 5:13. O Iehova șiutea andi goghi le Paveloschi te scriil iech lil caring le phrala anda o Corint hai te phenel lenghe că trebul duriardo andai congregația o murș cai păcătuisardea hai ci risardea-pe catar pesco phiraimos nasul. Sar trebunas te phiraven-pe lesa le phrala? O Pavel phendea lenghe te „na mai beșen ande iech than” lesa. So trebunas te cheren von? O Pavel phendea lenghe ‘nici te na han ieche manușesa sar cado’. (1 Cor. 5:11) Cana has ande iech than varecasa, astaras te das duma mai but. Hachiarel-pe mișto că  o Pavel camlea te phenel codolenghe andai congregația că ci trebunas te den duma hai te beșen ande iech than codole murșesa. Cadaia ferilas le phralen te na arăsăn vi von te len-pe pala lesco phiraimos nasul. (1 Cor. 5:5-7) Mai but, cana le phrala ci beșenas ande iech than cadale murșesa, daștinas te ajutin-les te del peschi sama chichi de but duriardea-pe le Iehovastar. Daștil-pe că cadaia ajutilas-les te avel lesche lajiav anda so cărdea hai te camel te risarel-pe catar pesco phiraimos nasul.

6. So cărdea i congregația cana așundea o lil le Pavelosco hai so cărdea o manuș cai păcătuisardea?

⁶ Pala so bișialdea pesco lil caring le phrala anda Corint, o Pavel pușelas-pe so avelas te cherel i congregația. Ji la urmă, o Tit andea lesche lașe vești. Le phrala așunde catar so phendea lenghe o Pavel hai duriarde andai congregația le murșes cai păcătuisardea. (2 Cor. 7:6, 7) Andel șiona cai nachle de cana o Pavel bișialdea pesco lil, codo cai păcătuisardea risardea-pe catar pesco phiraimos nasul.  Vo parudea pesco phiraimos hai astardea te trail peschi viața cadea sar ciaiol le Devles. (2 Cor. 7:8-11) So phendea o Pavel la congregațiache te cherel acana?

SAR TREBULAS TE PHIRAVEL-PE I CONGREGAȚIA LE MURȘESA CAI RISARDEA-PE CATAR PESCO PHIRAIMOS NASUL?

7. So cărdea o murș pala so sas-lo duriardo andai congregația? (2 Corinteni 2:5-8)

⁷ Citisar 2 Corinteni 2:5-8. O Pavel phendea: „Arăsăl cadale manușesche că but anda tumende ortosardean-les”. Cadaia însemnol că, pala so o manuș cai păcătuisardea sas-lo duriardo andai congregația, vo dea peschi sama că trebulas te risarel-pe catar pesco phiraimos nasul. Cana cărdea cadaia, i congregația ci mai trebulas te încărel-les dur pendar hai te doșaren-les. (Evr. 12:11)

8. So phendea o Pavel la congregațiache te cherel mai dur?

⁸ Cana o manuș risardea-pe catar pesco phiraimos nasul, o Pavel phendea le phurenghe te mechen-les te avel parpale andi congregația. Sa cadea, phendea lenghe ‘te iertisaren-les pherde lașimos’ hai ‘te sicaven lesche penghi iubirea’. O Pavel camlea ca le phrala te sicaven le murșesche prin so cheren hai so phenen că iertisarde-les anda sea o ilo hai că iubin-les. Prin cadaia, von sicavenas că priminas-les pherde bucuria parpale andi congregația.

9. Sostar daștilas te avel pharo anda chichiva te iertin le phrales cai avilea parpale?

⁹ Daștilas te avel pharo chichiva phralenghe te sicaven lașimos le murșesche cai avilea parpale andi congregația. Sostar phenas cadaia? Chichiva daștinas te aven încă holiarde anda codoia că vo andea pharimata sea le congregațiache hai cărdea lajiavestar avere manușen. Chichiva daștinas te pachian că na-i orta ca varecon cai păcătuisardea cadea de but te avel mechlo te avel parpale andi congregația anda codoia că von cărde sea so daisarde te așunen le Iehovastar hai te așen uje. (Dich vi Luca 15:28-30.) Tha, cu sea cadala, sostar sas importanto ca i congregația te sicavel ciaci iubirea caring pengo phral cai avilea parpale?

10, 11. So avelas te întâmplol-pe dacă le phure ci camenas te iertin le manușes cai păcătuisardea hai risardea-pe catar pesco phiraimos nasul?

¹⁰ Te gândisaras amen so avelas ando ilo le murșesco dacă le phure ci mechenas-les te avel parpale andi congregația pala so risardea-pe catar pesco phiraimos nasul? Sau sar avelas te simțol-pe dacă, pala so avilea parpale andi congregația, le phrala hai le pheia ci sicavenas lesche ciaces iubirea? Cadaia daștilas te cherel ca „leschi bari duch te . . . phaghel lesco ilo” hai te pachial că ci mai siles niciech speranța. Vo daștilas chiar te na mai camel te cherel chanci caște lașiarel pesco amalimos le Iehovasa.

¹¹ Hai vi mai nasul, dacă le coaver phrala hai pheia andai congregația ci camenas te iertin le murșes cai păcătuisardea hai risardea-pe catar pesco phiraimos nasul, von daștinas te rimosaren pengo amalimos le Iehovasa. Sostar? Anda codoia că von ci sicavenas i iertarea le Iehovaschi caring codola cai camen te paruven pengo phiraimos. Mai but, von avenas te len-pe pala o Satan, cai silo nasul hai ci sicavel mila. Cadea, avenas te mechen le Benghes te folosil-len caște peravel le manușes te na mai slujil le Iehovasche. (2 Cor. 2:10, 11; Ef. 4:27)

12. Sar daisardea i congregația te lel-pe pala o Iehova?

¹² Cadea că, sar daisardea i congregația anda Corint te lel-pe pala o Iehova, hai na pala o Satan? Cărde cadaia cana iertisarde codoles cai risardea-pe catar pesco phiraimos nasul, cadea sar cherel o Iehova. Te dichas so phende  chichiva murșa cai scriisarde i Biblia anda o Iehova. O David phendea: ‘Vo si lașio hai gata te iertil’. (Ps. 86:5) O Mica scriisardea: „Con si sar tute, Devla, cai iertis le buchia nasul hai naches opral le păcatea?”. (Mica 7:18) Hai o Isaia phendea: „O manuș nasul te mechel-pe pesca rigatar hai con cherel nasulimos pesche gândurendar. Te jial parpale le Iehovaste, savo va sicavela lesche mila, amare Devleste, că vo va iertila anda sasto ilo”. (Is. 55:7)

13. Sostar sas mișto că primisarde parpale le manușes cai risardea-pe catar pesco phiraimos nasul? (Dich vi o chenarii „ Cana sas primime parpale o murș anda Corint?”.)

¹³ Caște len-pe pala o Iehova, i congregația anda Corint trebulas te iertin le murșes hai te sicaven lesche ciaces că iubin-les hai că sile voime că avilo parpale. Anda codoia că line-pe pala so phendea lenghe o Pavel, i congregația sicadea că ‘așunel ande seal buchia‘. (2 Cor. 2:9) Chiar cana o murș sas-lo duriardo andai congregația numai chichiva șiona, vo risardea-pe catar pesco phiraimos nasul. Cadea că, le phuren ci sas-len sostar te mai ajucăren caște primin-les andi congregația.

SAR TE SICAVAS O ORTOMOS HAI I MILA LE IEHOVASCHI?

14, 15. So sichileam anda so întâmplosardea-pe ando Corinto? (2 Petru 3:9) (Dich vi i imaginea.)

¹⁴ „Anda amaro sicaimos”, sas scriime sar trebulas te phiravel-pe i congregația anda Corint codole murșesa cai păcătuisardea. (Rom. 15:4) O Iehova ci mechel te așen andi congregația  codolen cai cărde iech baro păcato hai ci risaren-pe catar pengo phiraimos nasul. Vo ci camel te sicavel mila codolenghe cai cheren buchia nasul hai ci camen te paruven-pe, hai nici na mechel-len te așen andi congregația. Chiar cana o Iehova si iech Del pherdo mila, vo ci camel ca lesche manușa te phiraven-pe orisar. So si nasul hai so si lașio ande le Iehovasche iacha ci va paruvela-pe niciechdata. (Iuda 4) Dacă o Iehova avelas te mechel le manușen cai păcătuisarde hai ci camen te paruven-pe te așen andi congregația, ci avelas te sicavel mila anda codoia că i congregația daștilas te arăsăl nasul. (Prov. 13:20; 1 Cor. 15:33)

¹⁵ Tha, jianas că o Iehova ci camel ca chonic te merel. Vo camel te salvil sea le manușen de fiesavi data cana daștil te cherel cadaia. Vo sicavel mila caring sea le manușa cai parude-pe hai camen te aven pale amala lesa. (Ezec. 33:11; citisar 2 Petru 3:9.) Cadea că, cana o murș anda Corint sicadea că fal-les nasul hai parudea pesco phiraimos, o Iehova, prin o Pavel, phendea la congregațiache te iertin le murșes hai te primin-les parpale andi congregația.

16. Sar diches le Iehovas pala so sichilean so întâmplosardea-pe ando Corint?

¹⁶ Cana dichas so cărdea i congregația anda Corint pala so iech murș cărdea iech baro păcato, daisaras te dichas mai mișto i iubirea, o ortomos hai o ciacimos le Iehovasco. (Ps. 33:5) Cana sichioas anda cadal buchia, amaro ilo cherel amen te așaras vi mai but le Iehovas. Ji la urmă, savore sam păcătoși hai trebul te avas iertime le Iehovastar. Sa cadea, anda amende si zurales cuci că o Iehova dea pesche Șiaves caște iertil amare păcatea. Cana jianas că o Iehova iubil ciaces pesche manușen hai camel so si mai lașio anda lende, sam zuriarde hai si amen iech bari pacea ando ilo.

17. Anda so va avela te das duma ando articolo cai avel?

¹⁷ Dacă aghies varecon cherel iech baro păcato, sar daștin le phure de congregație te sicaven i iubirea le Iehovaschi hai te ajutin le manușes te risarel-pe catar pesco phiraimos nasul? So trebun te cheren le phrala hai le pheia cana le phure alosaren te duriaren sau te anen parpale varecas andi congregația? Anda cadaia va avela te das duma ando articolo cai avel.