LE ISRAELIȚI bucurinas-pe zurales but cana așunenas ghilea. I Biblia butivar phenel sar le manușa ghilabenas ca le instrumentea hai voceasa. Cam 10% anda i Biblia si cărdi anda ghilea, sar avelas o lil Psalmi, i Cântarea cântărilor hai le Plângeri. O lil Music in Biblical Life phenel că i Biblia sicavel claro că le israeliți folosinas le ghilea cana cherenas mai but buchia ande penghi viața.

Le ghilea ande fiesavo ghies. Prin le ghilea le israeliți daștinas te sicaven so sas-len ando ilo. (Is. 30:29) Le jiuvlea ghilabenas ca le tamburine, ghilabenas ghilea anda fericirea hai chălenas cana sas iech sărbătoarea, sar avelas cana iech nevo rege sas alosardo, cana le soldați câștighinas iech războio sau cana mai but manușa chidenas-pe ande iech than caște anen închinarea. (Jud. 11:34; 1 Sam. 18:6, 7; 1 Regi 1:39, 40) Sa cadea cana merelas lenghe varecon ghilabenas ghilea cai sicavenas so de duchado sas lengo ilo. (2 Cron. 35:25) Si ciaces, cadea sar phenel-pe andi Cyclopedia de McClintock hai Strong, „le evrei sas manușa cai iubinas le ghilea zurales but”.

Le ghilea co chăr le regesco. Le regi anda o Israelo bucurinas-pe te așunen ghilea. O rege Saul achardea le Davidos ande pesco chăr caște ghilabel ca i harpa. (1 Sam. 16:18, 23) Pala codoia, cana o David cărdilea rege cărdea neve instrumentea muzicalo, cărdea șucar ghilea hai lașiardea te avel iech orchestra cai ghilabelas co templo le Iehovasco. (2 Cron. 7:6; Am. 6:5) Pala codoia, o rege Solomon achardea mai bute jiuvlean hai murșen cai ghilabenas anda leste. (Ecl. 2:8)

Le ghilea anda o Iehova. O mai importanto, le israeliți anenas închinarea le Iehovasche cana ghilabenas. Mai but, co templo anda o Ierusalimo cherenas buchi anda o Iehova 4 000 ghilabaitorea. (1 Cron. 23:5) Von ghilabenas ca cimbalea, lire, harpe hai trompetea. (2 Cron. 5:12) Tha, na numai cadal manușa cai jianenas mișto te ghilaben așarenas le Iehovas prin ghilea. Jianas că, cana le evrei jianas co Ierusalimo ca le sărbători cai încărenas-pe ande fiesavo bărș von ghilabenas ghilea anda o lil Psalmi. (Ps. 120–134) Hai, cadea sar phenel-pe ande chichiva lila iudaico, le israeliți ghilabenas le psalmi Hallel a cana hanas anda i patraghi.

Vi aghies le ghilea sile zurales importanto anda le manușa le Iehovasche. (Iac. 5:13) Cana ghilabas le Iehovasche așaras-les. (Ef. 5:19) Pașioas mai but amare phralendar hai pheiandar cana ghilabas le Iehovasche ande iech than. (Col. 3:16) Cana ghilabas sau așunas ghilea anda o Iehova sam zuriarde hai nachas mai sigo opral le pharimata. (Fap. 16:25) Le ghilea sile iech șucar buchi prin savi daisaras te sicavas amaro pachiamos ando Iehova hai amari iubirea caring leste.