Papela ledzri dzri yaka ka Vaefesa 5:1-33
5 Xileswo, yetiselani Xikwembu Nkulukumba swanga hi leswi mi nga vana vake lava zrandzrekaka,
2 nakone yanani mahlweni mi kombisa lizrandzru ku fana ni leswi Kriste na yene a hi zrandzriki* a va a tinyikela hi kola kwezru* swanga mhamba leyi nun’hwelaka ka Xikwembu Nkulukumba.
3 A swiyentxo swa tingana hi tlhelo dzra tinkuku* ni nsila ya mixaka hinkwayu ni makwanga, nambi ku khaneliwa swi nga txhuki swi khaneliwa a makazri kwenu, hikusa a swi va faneli vaxwengi;
4 nambi mahanyela ya tingana nambi mabulu ya ku huma ndleleni nambi mafenya ya nhlambha, ku nga mintxhumu leyi nga liki yinene. A matsrhan’wini ya leswo mi fanela ku tlangela Xikwembu Nkulukumba.
5 Hikusa ma swi tiva nakone mi swi twisisa ha hombe leswaku a ku na mhunu lweyi a yentxaka swa tingana hi tlhelo dzra tinkuku* kumbe mhunu lweyi a nga basangakiki kumbe mhunu wa makwanga, ku nga ku gandzrela swikwembu swa madzrimi, lweyi a nga ni pfindla ka Mfumu wa Xikwembu Nkulukumba lowu fumiwaka hi Kriste.
6 Mi nga tsrhiki mhunu a mi kanganyisa hi mazritu ya ku kala ma nga pfuni ntxhumu, hikusa hi mhaka ya mintxhumu yoleyo a mahlundzru ya Xikwembu Nkulukumba ma ta henhla ka vana lava kalaka va nga yingiseti.
7 Xileswo, mi nga swi yentxi leswi vone va swi yentxaka;
8 hikusa mi sama mi fana ni munyama, kambe swoswi mi fana ni livaningu hi leswi mi lumbaka Hosi. Yanani mahlweni mi hanya ku fana ni vhanu lava nga livaningwini,*
9 hikusa a mihandzru ya livaningu i mintxhumu hinkwayu leyinene, ya ku lulama ni ya ntiyiso.
10 Tamani mi lwela ku tiva leswi nyonxisaka Hosi;
11 nakone tsrhikani ku yentxa mintxhumu leyi kalaka yi nga pfuni ntxhumu leyi lumbaka munyama; a matsrhan’wini ya leswo, paluxani leswi yi nga swone.
12 Hikusa a mintxhumu leyi va yi yentxaka a xihundleni ya danisa nambi ku yi hlaya.
13 Kutani a mintxhumu hinkwayu leyi paluxiwaka* yi vonekisiwa hi livaningu, hikusa hinkwaswu leswi vonekisiwaka i livaningu.
14 Hi leswo swi yentxaka kuva ku hlayiwa leswi: “Pfuka, wene u nga ku yetleleni, pfuka ka lava fiki, kutani Kriste a ta vaninga henhla kwaku.”
15 Xileswo tsrhamani na mi pfule matihlo akuva mi nga fambi ku fana ni vhanu lava kalaka va nga tlhazrihanga kambe mi famba ku fana ni vhanu lava tlhazrihiki,
16 mi wu tizrisa hi ndlela leyinene nkama wenu* hikusa a masiku ma bihile.
17 Xileswo, tsrhikani ku fana ni vhanu lava kalaka va nga tlhazrihanga kambe yanani mahlweni mi twisisa leswi a nga ku zrandzra ka Yehovha.
18 Nakone mi nga nwi vhinyu mi za mi popswa, hikusa dzri ta mi susumetela ku yentxa leswi bihiki,* kambe yanani mahlweni mi tala hi moya wa ku xwenga.
19 Tiyisananani hi ku yimbelela mapsalma, hi ku dzrumisa Xikwembu Nkulukumba ni hi ku yimbelela tinsimu ta wugandzreli, yimbelelani mi tlhela mi dzrumisa Yehovha a timbilwini tenu.
20 Minkama hinkwayu tlangelani Xikwembu Nkulukumba Papayi wezru hi mintxhumu hinkwayu hi vito dzra Hosi yezru Yesu Kriste.
21 Titsrongahatani ka van’wana swanga hi leswi mi mu hloniphaka ngopfu swinene Kriste.
22 A nsati a a tibeki hansi ka nuna wake hi lani a yentxaka ha kone ka Hosi,
23 hikusa a nuna i nhloko ya nsati wake ku fana ni leswi Kriste a nga nhloko ya bandla ni muhuluxi wa mizri lowu.
24 Nakunene, ku fana ni leswi bandla dzri tibekaka hansi ka Kriste, na yene nsati a fanela ku tibeka hansi ka nuna wake ka hinkwaswu.
25 Wene nuna tama u zrandzra nsati waku, ku fana ni leswi Kriste na yene a zrandzriki bandla a va a dzri fela,
26 akuva a dzri xwengisa, a dzri basisa hi ku dzri hlampswa hi mati hi ku tizrisa zritu,
27 ku yentxela leswaku a bandla dzri xonga a mahlweni kwake, dzri nga vi na bati, dzri nga khwanyali kumbe dzri va ni mintxhumu yin’wana ya ku fana ni leyi, kambe dzri va ledzri xwengiki nakone dzri nga vi ni xa ku solisa.
28 Hi lani ku fanaka a nuna a fanela ku zrandzra nsati wake ku fana ni leswi a wu zrandzrisaka xiswone mizri wake. Wanuna lweyi a zrandzraka nsati wake awa tizrandzra.
29 Hikusa a nga kone wanuna lweyi a samiki a nyenya mizri wake,* kambe awa wu wundla ni ku wu hlayisa, hi lani Kriste a yentxaka ha kone ka bandla,
30 hikusa hine hi swizro swa mizri wake.
31 “Hi xivangelo lexo, a wanuna a ta siya papayi wake ni mamana wake a namazrela* nsati wake, kutani lavabidzri va ta va nyama yin’we.”
32 A xihundla lexi xa ku xwenga i xikulu. Ni hlaya xihundla lexi xa ku xwenga mayelanu na Kriste ni bandla.
33 Nambitanu, mun’wana ni mun’wana wenu a fanela ku zrandzra nsati wake ku fana ni leswi a tizrandzrisaka xiswone; hi tlhelo dzrin’wana a nsati a fanela ku va ni xitxhavu xa ku yenta ka nuna wake.
Tintlhamuxelo ta le hansi
^ Kumbexana: “a mi zrandzriki”.
^ Kumbexana: “kwenu”.
^ Hi Xigriki: porneía. Vona Ntlhamuxelo Wa Mazritu.
^ Vona Ntlhamuxelo Wa Mazritu.
^ Hi ku kongoma: “ku fana ni vana va livaningu”.
^ Kumbe: “soliwaka”.
^ Hi ku kongoma: “mi tixavela nkama lowunene”.
^ Kumbe: “dzri ta mi phuntisa”.
^ Hi ku kongoma: “nyama yake”.
^ Kumbe: “a tama a tsrhama ni”.
