Papela ledzri yaka ka Vakolosa 1:1-29
1 Mine Pawulo, mupostola wa Kriste Yesu hi ku ya hi ku zrandzra ka Xikwembu Nkulukumba, ni na makwezru Timotewu.
2 Ni tsralela vaxwengi ni vamakwezru lava dumbekaka lava nga vadondzrisiwa va Kriste a Kolosa:
Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba, Papayi wezru.
3 Minkama hinkwayu loko hi mi khongotelela hi tlangela Xikwembu Nkulukumba Papayi wa Hosi yezru Yesu Kriste,
4 swanga hi leswi hi twiki hi ta lipfumelo ledzri mi nga na dzrone ka Kriste Yesu ni lizrandzru ledzri mi dzri kombisaka vaxwengi hinkwavu
5 hi mhaka ya dumbo ledzri mi bekiseliwiki dzrone a tilweni. Mi twe hi ta dumbo ledzri nkama lowu mi dondzrisiwiki ntiyiso wa madzrungula lawa lamanene
6 lawa ma mi tlhaseliki. Swanga hi leswi madzrungula lamanene ma pswalaka mihandzru ni ku hangalaka a misaveni hinkwayu, swi ve hi ndlela yoleyo ni kwenu ku sukela siku ledzri mi twiki ni ku twisisa timpswalu letikulu ta ntiyiso ta Xikwembu Nkulukumba.
7 A timpswalu letikulu ta ntiyiso ta Xikwembu Nkulukumba hi leti mi dondzrisiwiki tone hi Epafrasi mutizrikulozri lweyi a zrandzrekaka, lweyi a tizrelaka Kriste hi ku dumbeka akuva ku pfuneka hine.
8 A tlhele a hi byela leswaku a moya wa ku xwenga wu mi pfuna leswaku mi kombisa lizrandzru.
9 Hi leswo swi yentxiki leswaku ku sukela siku ledzri hi twiki hi ta lizrandzru ni lipfumelo dzrenu hi nga tsrhiki ku mi khongotelela ni ku kombela leswaku mi tala hi wutivi bya ntiyiso bya ku zrandzra kwake mi kuma ni wutlhazri hinkwabyu kun’we ni ku twisisa ka moya,
10 ku yentxela leswaku mi hanya hi ndlela leyi fanelekaka ka Yehovha akuva mi mu nyonxisa ka ntizro wun’wana ni wun’wana lowu mi wu yentxaka, nakone mi yengesela wutivi bya ntiyiso mayelanu na Xikwembu Nkulukumba;
11 nakone hi khongota leswaku Xikwembu Nkulukumba a nga tizrisa ntamu wake lowukulu akuva a mi tiyisa, ku yentxela leswaku mi kota ku tiyisela hi ku helela ni ku lehisa mbilu na mi nyonxile
12 nkama lowu mi tlangelaka Papayi, lweyi a yentxiki leswaku mi fanekela ku yamukela pfindla dzra vaxwengi lava va nga ku vaningeni.
13 A hi huluxile a ntan’wini wa munyama a hi yisa a Mfun’wini wa N’wanake lweyi a mu zrandzraka,
14 lweyi hi ntsrhunxiwaka hi xitizrulo hi kola kwake, leswi liki, ku dzrivaleliwa swidoho swezru.
15 Yene i xifaniso xa Xikwembu Nkulukumba lweyi a kalaka a nga voneki, mativula ya hinkwaswu leswi tumbuluxiwiki;
16 hikusa Xikwembu Nkulukumba a tizrise yene akuva a tumbuluxa mintxhumu leyin’wana hinkwayu, mintxhumu leyi nga matilweni ni le misaveni, mintxhumu leyi vonekaka, mintxhumu leyi kalaka yi nga voneki, wuhosi, vazrangeli, mimfumu kumbe wulawuli. Mintxhumu leyi hinkwayu yi tumbuluxiwe hi ku tizrisa yene nakone yi tumbuluxeliwe yene.
17 Nakone a ve kone na mintxhumu leyin’wana yi nga si na va kone, futsrhi mintxhumu leyin’wana yi ve kone hi kola kwake,
18 yene i nhloko ya mizri, ku nga bandla. I masungulo, mativula ya lava fiki, akuva ku va yene wa ku sungula ka mintxhumu hinkwayu;
19 hikusa Xikwembu Nkulukumba a a djula leswaku Kriste a va lweyi a heleliki ka hinkwaswu,
20 nakone hi ku tizrisa Kriste, leswi liki, hi ngati leyi a yi halatiki a mhandzrini ya nxanisa,* Xikwembu Nkulukumba a titlhelisele mintxhumu hinkwayu leyi nga matilweni ni leyi nga a misaveni.
21 Nakunene, n’wine lava a mi li valala va Xikwembu Nkulukumba nakone a mi tsravukane na yene hi mhaka ya leswi a miyanakanyu yenu a yi byekamele ka mintizro leyi bihiki,
22 swoswi a tlhelelani na n’wine hi ku tizrisa mizri wa lweyi a tinyikeliki akuva a fa, akuva hi ndlela yoleyo a mi yentxa mi va lava xwengiki a mahlweni kwake, mi nga vi na bati* nakone mi nga vi na nandzru a mahlweni kwake,
23 ntsena loko mi ya mahlweni mi hanya hi ku fambisana ni lipfumelo ledzri mi nga na dzrone ka Xikwembu Nkulukumba, mi bekiwa ka masungulo mi tlhela mi tiya, mi nga hambukisiwi ka dumbo dzra madzrungula lamanene lawa mi ma yingeliki nakone ma zrezriwiki ka vhanu hinkwavu lava nga hansi ka tilo. Mine Pawulo, ni hlawuliwe akuva ni zrezra madzrungula lawa lamanene.
24 Swoswi na nyonxa hi ku va ni xaniseka akuva ku pfuneka n’wine, nakone swanga xiyenge xa mizri wa Kriste ni tiyimisele ku ya mahlweni ni xaniseka hikusa leswo swi ta pfuna mizri wa Kriste, ku nga bandla.
25 Ni ve mutizreli wa bandla ledzri hi ku ya hi wutiyanguleli lebyi Xikwembu Nkulukumba a ni nyikiki byone akuva ku pfuneka n’wine, a ni hlawule akuva ni zrezra zritu dzrake hi ku helela,
26 ina, akuva ni zrezra xihundla xa ku xwenga xa Xikwembu Nkulukumba lexi a xi nga tiviwi a misaveni ni le ka vhanu lava hanyiki a minkameni ya khale.* Kambe swoswi a xihundla lexo xi tlhamuxeliwe vaxwengi vake,
27 handle ka leswo, Xikwembu Nkulukumba a nyonxele ku tlhamuxela vaxwengi a wupfundzri lebyi phatimaka bya xihundla lexi xa ku xwenga lexi xi tlhamuxeliwiki matiko, a xihundla lexi xa ku xwenga i Kriste lweyi a nga ni wumun’we na n’wine, leswi liki, mi ni dumbo dzra ku va mi hlangamela na yene a ku phatimeni kwake.
28 Hi yene lweyi hi mu twalisaka, hi ba ndleve* mun’wana ni mun’wana, hi tlhela hi dondzrisa mun’wana ni mun’wana wutlhazri bya ntiyiso, akuva hinkwavu lava nga ni wumun’we na Kriste hi va nyikela na va helelile.
29 Nakunene hi mhaka ya leswo ni tizra hi nkhinkhi ni tikazrata ngopfu hi ku pfuniwa hi ntamu lowu a ni nyikaka wone.
Tintlhamuxelo ta le hansi
^ Vona Ntlhamuxelo Wa Mazritu.
^ Kumbe: “mi nga vi na xa ku solisa”.
^ Kumbe: “nguveni ya khale”. Vona Ntlhamuxelo Wa Mazritu.
^ Kumbe: “kawuka”.
