Xikwembu Nkulukumba a nga na xihlawuhlawu nakone a djula ku tovokisa vhanu hinkwavu.

Xikwembu Nkulukumba a dumbise Abrahamu a ku: ‘A tinxaka hinkwatu ta misava ti ta tovoka ha wene.’​—Genesis 12:3, Bibele Dzra Ku Xwenga, BX.

I yini leswi hi swi dondzraka? Xikwembu Nkulukumba a djula ku tovokisa mindangu hinkwayu, nakone awa va zrandzra ngopfu vhanu lava mu yingisetaka i nga va vavanuna, vavasati kumbe vatsrongwana.

Xikwembu Nkulukumba a ni timpswalu, nakone a tovokisa vhanu hinkwavu lava tikazratelaka ku mu tiva.

Lwe Wa Ntamu Hinkwawu a nyike muprofeta Moxe ntamu wa ku yentxa mahlolana lamakulu. Nambitanu, Moxe a khongote a ku: ‘Ndzri kombe a tindlela taku, ndzri ta ku tiva akuva ndzri kuma timpswalu mahlweni kwaku.’ (Eksoda 33:13) Xikwembu Nkulukumba a nyonxile loko Moxe a yentxa xikombelo lexo lakakuva a mu tovokise hi ku mu nyika wutivi ni wutlhazri lebyi yengetelekiki mayelanu ni tindlela takwe ni matsrhamela yakwe. Hi ndlela leyo, Moxe a dondzre leswaku Muvumbi i ‘Xikwembu Nkulukumba wa timpswalu ni lizrezre’.​—Eksoda 34:6, 7.

I yini leswi hi swi dondzraka? Xikwembu Nkulukumba a djula ku tovokisa hinkwavu lava tikazratelaka ku mu tiva ku yampswa i nga va vavanuna, vavasati kumbe vatsrongwana. Ka Matsralwa ya ku Xwenga, Xikwembu Nkulukumba a hi byela leswi hi fanelaka ku swi yentxa akuva hi mu gandzrela, nakone a swi beka a livaleni leswaku a swi djula ngopfu ku hi nyika matovoko yakwe.

Hi nga yamukela matovoko ya hi lani ku nga helikiki ya Xikwembu Nkulukumba loko hi dondzra hi leswi Yesu a swi yentxiki ni ku swi dondzrisa.

Zritu dzra Xikwembu Nkulukumba dzri hi dondzrisa swinyingi mayelanu ni wutomi ni tindondzro ta Yesu. Xikwembu Nkulukumba a nyiki Yesu ntamu wa ku yentxa mahlolana manyingi. Hi xikombiso, a mu nyiki ntamu wa ku daha lava a va fi matihlo, lava a va fi tindleve ni mavabyi man’wana. Yesu a patsre ni ku pfuxa vafi. Hi ku yentxa leswo, Yesu a kombise man’we ya matovoko lawa Xikwembu Nkulukumba a taka ma nyika vhanu a nkameni lowu wu taka. Yesu ha byakwe a tlhamuxeli leswi hi fanelaka ku swi yentxa akuva hi kuma matovoko lawo, a te: ‘Kambe a wutomi lebyi nga gamikiki hi byolebyi, leswaku va ku tiva, wene ntshima ya Xikwembu Nkulukumba ku hela, ni lweyi u mu zrumiki, Yesu Kriste.’​—Yohan 17:3.

Yesu a a ni ntwelawusiwana, lizrandzru ni wumbilu. Hi mhaka ya leswo, vhanu hinkwavu, vavanuna, vavasati, vampswha ni lava kuliki a va djula ku va kusuhi na yene nakone a va yamukela xizrambu xakwe lexi liki: ‘N’wi dondzra ku mine, hikusa ndzri mbulwa, wa mbilu ya ku titsrongahata, n’wi ta kuma ku wisa a mimoyeni yenu.’ (Mattheo 11:29) Ku hambana ni vhanu van’wana va le minkameni liyani lava a va xanisa vavasati, Yesu minkama hinkwayu a a hanyisana ni vavasati hi ndlela leyinene a va bekela xitxhavu a tlhela a va nyika lisima.

I yini leswi hi swi dondzraka? Yesu a kombise lizrandzru ledzrikulu ka vhanu, nakone a hi siyeli xikombiso lexinene ngopfu xa ndlela leyi hi fanelaka ku hanyisana ni van’wana ha yone.

Matsralwa ya ku Xwenga ma dondzrisa leswaku ku ni ‘Xikwembu Nkulukumba mun’we’ nakone Yesu a ve muzrumiwa wa ku titsrongahata wa Xikwembu Nkulukumba. (1 Ba-le-Korinte 8:6) Yesu ha byakwe a tlhamuxeli leswaku Xikwembu Nkulukumba i nkulu ka yene, nakone a ku li yene lweyi a a mu zrume lani misaveni.​—Yohan 11:41, 42; 14:28. *