Xikwembu Nkulukumba a nyike vhanu nyiko ya lisima ngopfu swinene​—ku nga wuswikoti bya ku khanela na yene hi mu byela matitwela yezru hi xikhongoto. Muprofeta Davhida a khongote a ku: ‘Wene lweyi a yingelaka swikhongoto! Hinkwavu vhanu va ta ta ku wene.’ (Amapsalma 65:2, BX) Hi fanela ku khongota hi ndlela yini akuva Xikwembu Nkulukumba a hi yingela a tlhela a hi tovokisa?

Xikhongoto xa ku tiyentxela ha wuswaku xi ku nyika mukhandlu wa ku txhulula mbilu yaku mahlweni ka Xikwembu Nkulukumba akuva u mu byela matitwela yaku. (Amapsalma 62:8) Xikwembu Nkulukumba wa Ntamu Hinkwawu a zrandzra ku yingela swikhongoto leswi sukelaka mbilwini.

I ntiyiso leswaku Xikwembu Nkulukumba a ni mavitanela manyingi, kambe a ni vito dzrin’we ntsena: ‘Hi mine Yehovha, hi dzro vito dzranga.’ (Ezaya 42:8) Vito ledzri liki Yehovha dzri kumeka makhambi lama tlulaka 7.000 ka Matsralwa ya ku Xwenga. Vaprofeta vanyingi va khaneli na Xikwembu Nkulukumba na va tizrisa vito dzrakwe hi ku kongoma. Hi xikombiso, muprofeta Amosi a hlaye leswi mayelanu na Xikwembu Nkulukumba: ‘Hi yene lweyi a yakiki vutsrhamu byakwe a tilweni, lweyi a hambiki xifulelo xakwe henhla ka misava . . . a vito dzrakwe i Yehovha.’ (Amos 9:6) Na hine hi fanela ku tizrisa vito dzra Xikwembu Nkulukumba, ledzri liki Yehovha, loko hi khongota.

Xikwembu Nkulukumba awa yi twisisa mimpimiso ni matitwela yezru swi nga na mhaka leswaku hi khanela lidzrimi muni. Zritu dzra Xikwembu Nkulukumba dzri hi tiyisekisa leswi: ‘Xikwembu Nkulukumba a nga langusi wuso. Kambe a tikweni dzrin’wana ni dzrin’wana lwa mu txhavaka ni ku tizra swa ku lulama iwa yamukeleka ku yene.’​—Amintiṛo 10:34, 35.

Kambe akuva hi yamukela matovoko ya Xikwembu Nkulukumba hi fanela ku yentxa leswi yengetelekiki handle ka ku khongota. Ka tinhloko-mhaka leti landzrelaka hi ta kambisisa leswaku i yini swin’wana leswi hi fanelaka ku swi yentxa.