A KU HLATIYELA, ku fana ni ntsrhwalu a mbilwini. (Pr 12:25) Xana u sama u hlatiyela lakakuva u twa ku vavisa mbilwini u va u yanakanya leswaku a wu nge swi koti ku lavisana ni xiyimu lexo? Loko swi same swi ku yentxekela, a wu wuswaku. Vanyingi va titwa hi ndlela yoleyo hi leswi va hlayisaka xaka ledzri vabyaka kumbe dzri duhwaliki, van’wana hi leswi va feliwiki hi lweyi va mu zrandzraka, kasi van’wana va hlatiyelisiwa hi leswi va hlaseliwiki hi mhangu ya ntumbuluku. Kambe i yini leswi u nga swi yentxaka akuva u lwisana ni ku hlatiyela? *

Hi nga dondzra swinyingi mayelana ni ku lwisana ni ku hlatiyela loko hi kambisisa xikombiso xa Hosi Davhida. A kumane ni swikazratu swinyingi wuton’wini, ku patsra ni ku lavisana ni lifu. (1Sa 17:34, 35; 18:10, 11) I yini lexi pfuniki Davhida ku lwisana ni ku hlatiyela koloko, nakone hi nga mu yetisela hi ndlela yini?

Davhida a kumane ni swikazratu swinyingi hi nkama wun’we. Hi xikombiso, yanakanya hi khambi dzrin’wana loko Davhida a li ku tsrutsrumeni ka Hosi Sawulo lweyi a a djula ku mu dlaya. Ntsrhaku ka loko va hlulile a yimpini, Davhida ni masotxha yake va tlhelele nxaxeni wavu, kambe loko va tlhasile va vaviseke ngopfu swinene loko va kuma leswaku valala vavu va va yivelile, va hisa tiyindlu va tlhela va va tekela vasati ni vana. Xana Davhida a titwise ku yini ka xiyimu lexo? ‘Davhida ni vhanu lava faka e na vu va tlakuxa mazritu va dzrila, ku kota ku hela ntamu wa ku dzrila’. Lexi yiki xi yandzrisa timhaka, vavanuna lava a a va dumba a va djula ku mu ‘khandla hi mazribye’. (1Sa 30:1-6) Davhida a a lavisana ni swikazratu swizrazru leswikulu hi nkama wun’we: A ndangu wake a wu li khombyeni, vavanuna lava a a va dumba a va djula ku mu dlaya, nakone Hosi Sawulo a a ha mu djuletela. Wa ku yanakanya ku hlatiyela loku Davhida a a li na kone?

I yini leswi Davhida a swi yentxiki? Kolanu Davhida ‘a titiyisa ha Yehovha, Xikwembu Nkulukumba wakwe’. A swi yentxise ku yini leswo? Davhida a a ni xihena xa ku khongota ka Yehovha a kombela mpfunu ni xa ku yanakanyisisa hi leswi a mu pfunisiki xiswone a nkameni lowu khalutiki. (1Sa 17:37; Ps 18:2, 6) Davhida a a swi tiva leswaku a a fanela ku djuletela nkongomiso wa Yehovha, xileswo, a djule ku tiva ka Yehovha leswaku a fanela ku yentxa yini. Ntsrhaku ka loko a yamukele nkongomiso, Davhida a tekele ku wu landzra. Hi kola ka leswo, yene ni masotxha yake va tovokisiwile ha Yehovha nakone va swi kotile ku kuma mintxhumu yavu ku patsra ni vasati ni vana. (1Sa 30:7-9, 18, 19) U yi xiyile mintxhumu yizrazru leyi Davhida a yi yentxiki? A khongote ka Yehovha a kombela mpfunu, a yanakanyisise hi ndlela leyi a mu pfuniki ha yone nkameni lowu khalutiki nakone a landzre nkongomiso wa Yehovha. Hi nga mu yetisela hi ndlela yini Davhida? Vona tindlela tizrazru.

1. Khongota. Nkama hinkwawu loko ku ni lexi hi hlatiyelisaka, hi nga khongota ka Yehovha hi kombela mpfunu ni wutlhazri. Ku khongota ka Yehovha hi mu byela ndlela leyi hi titwaka ha yone swi nga hi pfuna ku titwa ha hombe. Kambe loko leswo swi nga koteki, hi nga hamba xikhongoto xa ku goma he ndzreni ka mbilu. Loko hi djuletela Yehovha minkama hinkwayu loko hi vilela mpfunu, hi kombisa leswaku ha mu dumba ku fana na Davhida  lweyi a tiki: ‘Yehovha i zribye dzranga, a khokholo dzranga, ni muhuluxi wanga, Xikwembu Nkulukumba wanga, zribye dzranga ledzri ndzri txhavelaka ku dzrone.’ (Ps 18:2) Xana xikhongoto xa pfuna hakunene? Phayona dzra xisati ledzri vitaniwaka Kahlia dzri hlaya leswi: “Ntsrhaku ka ku khongota ni titwa na ni zrulile. Xikhongoto xi ni pfuna kuva ni yanakanya ku fana na Yehovha ni kuva ni ya ni mu dumba.” Nakunene, xikhongoto i xihiwa lexi pfaka ka Yehovha lexi hi pfunaka ku lwisana ni ku hlatiyela.

2. Yanakanyisisa. Xana wa ha dzrimuka xiyimu xa kukazri xa ku bindzra lexi u kumaniki na xone, lexi we ke kota ku xi hlula hi mpfunu wa Yehovha? Loko hi yanakanyisisa hi ndlela leyi Yehovha a pfuniki malandzra yake ya khale ni ndlela leyi a hi pfuniki ha yone, hi kuma ku zrula mbilwini hi tlhela hi ya hi mu dumba. (Ps 18:17-19) Nkulu wa kukazri lweyi a vitaniwaka Joshua, a hlaye leswi: “Ni tsrale nxaxamelo wa swikhongoto leswi Yehovha ni hlamuliki swone. Leswo swi ni dzrimuxa makhambi lawa ni kombeliki Yehovha ntxhumu wa ku kongoma a va a ni nyika leswi a ni swi vilela.” I ntiyiso, loko hi yanakanyisisa hi leswi Yehovha a hi yentxeliki swone a nkameni lowu khalutiki, hi ya hi va ni ntamu wa ku lwisana ni miyanakanyu leyi hi hlatiyelisaka.

3. Yentxa xa kukazri. Na hi nga si na teka xiboho, hi fanela ku djuletela nkongomiso wa Yehovha a Bibeleni. (Ps 19:7, 11) Vanyingi va xiye leswaku loko va kambisisa ndzrimana ya kukazri a Bibeleni, swa nabyala kuva va dondzra xa kukazri va va va xi tizrisa wuton’wini byavu. Nkulu wa kukazri lweyi a vitaniwaka Jerrod a li: “Ku hamba wusetxhi swi ni pfuna ku twisisa ndzrimana hi ku helela ni ku tiva leswi Yehovha a djulaka leswaku ni swi yentxa. Leswo swi ni pfuna kuva ni ya ni kholwa leswi ni swi dondzriki ni va ni hanya hi swone.” Loko hi djula nkongomiso wa Yehovha a Bibeleni hi tlhela hi wu landzra swi ta hi pfuna kuva hi lwisana ni ku hlatiyela.

Davhida a a swi tiva leswaku akuva a kota ku lwisana ni ku hlatiyela a a vilela mpfunu wa Yehovha. A a swi nyika lisima hinkwaswu leswi Yehovha a a mu yentxela swone lakakuva a susumeteleke ku hlaya leswi: ‘Hi Xikwembu Nkulukumba wanga ndzri tlula pangu. Xikwembu Nkulukumba lwa ndzri tsrimbiki hi bandi dzra ntamu.’ (Ps 18:29, 32) Minkama yimbeni swikazratu swezru i swikulu lakakuva swi kazrata ku swi hlula kumbe ku swi tiyiselela. Kambe hi ku pfuniwa hi Yehovha, hi nga ha swi kota ku hlula xikazratu xini na xini nambi xo bindzrisa kuyini! Loko hi khongota ka Yehovha hi kombela mpfunu, hi yanakanyisisa hi ndlela leyi Yehovha a samiki a hi pfuna ha yone, ni ku landzra minkongomiso leyi a hi nyikaka yone, hi nga tiyiseka leswaku a ta hi nyika ntamu ni wutlhazri lebyi hi byi vilelaka akuva hi lwisana ni ku hlatiyela!