1. a) He kwini ku lavisela loku Yehovha a hi nyikaka kone? b) Xana swi tlhamuxela yini ku ‘lavisela Yehovha’? (Vona “Ntlhamuxelo Wa Zritu.”)

 YEHOVHA a nyika hinkwavu lava mu zrandzraka ku lavisela kumbe dumbo dzra ku xonga. Ku nge khale, a ta helisa mavabyi, ku xaniseka ni ku fa. (Mpf 21:3, 4) A ta pfuna ‘lava ku simama’, kumbe lava ku zrula, lava yimeliki leswaku a ndzruluta misava yi va paradeyisi. (Ps 37:9-11) A misaveni leyimpswha hi ta ya hi va ni wuxaka bya le kusuhi ni lebyi tiyiki na Yehovha. Hi ta ya hi va ni wuxaka bya ku yampswa ngopfu swinene ku tlula lebyi hi nga na byone namunhla. Nakunene hi ni ku lavisela ka ku hlamalisa mayelana ni wumundzruku! Kambe ha yini hi nga tiyisekaka leswaku Yehovha a ta swi hetisisa swidumbiso leswi? Yehovha a hetisisa swidumbiso hinkwaswu leswi a swi yentxaka, leswo swi yentxa hi mu lavisela. * (Ps 27:14) Leswo swi tlhamuxela leswaku hi fanela ku lehisa mbilu hi yimela Yehovha akuva a hetisisa swidumbiso hinkwaswu leswi a swi yentxiki.—Eza 55:10, 11.

2. He xini xidumbiso lexi Yehovha kutani a xi hetisisiki?

² Yehovha a swi beke livaleni leswaku awa swi hetisisa swidumbiso swake. A hi voneni xikombiso xa leswo. Ka buku dzra Apfuletelo, Yehovha a dumbise leswaku a masikwini yezru a a ta tihlawulela tiko ledzri vumbiwaka hi vhanu va matiko, tindzrimi ni tinxaka ta ku siyanasiyana akuva va mu gandzrela hi wumun’we. Nakone tiko ledzro dzra ku hlawuleka dzri tiviwa swanga ‘xitsrungu lexikulu’. (Mpf 7:9, 10) A tiko ledzro dzri vumbiwa hi vavanuna, vavasati, vana, lava humaka ka mimbangu ya ku siyanasiyana misaveni hinkwayu. Nambitanu, va vumba ndangu lowu nga ni wumun’we. (Ps 133:1; Yh 10:16) Lava vumbaka xitsrhungu lexikulu va tlhela va zrezra madzrungula lamanene hi ku hiseka. Va tsrhama na va lulamele ku zrezrela  hinkwavu lava djulaka ku twa madzrungula lamanene ya misava ya ku yampswa. (Mt 28:19, 20; Mpf 14:6, 7; 22:17) Loko u li mun’we wa lava xitsrhungu lexikulu, a swi ganaganekisi leswaku u ku nyika lisima ku lavisela ka misava ya ku yampswa.

3. He wini nkongometo wa Sathana Diyavulosi?

³ Diyavulosi a nga swi djuli leswaku u va ni ku lavisela hi wumundzruku. Xileswo nkongometo wake i ku ku kholwisa leswaku Yehovha a nga na mhaka na wene, ni leswaku a nga ti swi hetisisa swidumbiso swake. Loko Sathana o za a hi kholwisa leswaku ku lavisela kwezru a hi ka ntiyiso, hi ta hela ntamu hi va hi tsrhika ku tizrela Yehovha. Hi lani hi taka swi vona ha kone, Sathana a a djula ku helisa ku lavisela loku Yobe a a li na kone ni ku mu tsrhikisa ku tizrela Yehovha.

4. Hi ta vona yini ka xidondzro lexi? (Yob 1:9-12)

⁴ Ka xidondzro lexi, hi ta vona ndlela leyi Sathana a dzringisiki ku sindzrisa ha yone Yobe leswaku a tsrhika ku tizrela Yehovha. (Dondzra Yob 1:9-12.) Hi ta tlhela hi vona leswi hi nga swi dondzraka ka xikombiso xa Yobe, ni leswaku ha yini hi fanela ku kholwiseka leswaku Yehovha a wa hi zrandzra, nakone a ta hetisisa swidumbiso swake.

5-6. I yini leswi yentxekiki a wuton’wini bya Yobe hi nkamanyana wutsrongo?

⁵ A wutomi a byi mu fambela ha hombe Yobe. A a ni wuxaka lebyinene na Yehovha, a a ni ndangu lowukulu lowu nga ni wumun’we nakone a a ganye ngopfu. (Yb 1:1-5) Kambe hi siku dzrin’we ntsena a lahlekeliwe hi hinkwaswu leswi a a li na swone. Ku sungula a lahlekeliwe hi mintxhumu yake. (Yb 1:13-17) Ntsrhaku ka leswo, vanake hinkwavu lava a a va zrandzra va file. Yanakanya kutsrongo ndlela leyi khombo ledzro dzri mu khumbiki ha yone Yobe. Ntsena hi ku feliwa hi n’wana mun’we, vapswali va twa ku vavisa ngopfu swinene. Kutani yanakanya hi gome, ku vaviseka ni ku xukuvala loku Yobe ni nkatake va ku twiki loko va feliwa hi vana hinkwavu va 10 hi siku dzrin’we. Swa twala swaku ha yini Yobe a handzrule mpahla kutani a titxukumetela hansi!—Yb 1:18-20.

⁶ Ntsrhaku ka leswo, Sathana a hlasele Yobe hi mavabyi lawa a ma txhavisa ma tlhela ma nyenyentsa. (Yb 2:6-8; 7:5) Na leswo swi nga si na yentxeka, vhanu lava a va tsrhama lomu Yobe a a tsrhama kone a va mu hlonipha nakone a va mu yela va ya kombela swilayu. (Yb 31:18) Kambe swoswi a va fambela kule na yene. A tsrukuliwe hi maxaka, vanghanu ku patsra ni vatizri vake!—Yb 19:13, 14, 16.

7. a) Yobe a a yanakanya leswaku a xaniseka hi kola ka yini, kambe i yini leswi a kalaka a nga swi yentxanga? b) U swi vonisa kuyini, he swini swikazratu leswi mukriste a nga ha kumanaka na swone namunhla swa ku fana ni leswi Yobe a kumaniki na swone hi lani hi swi vonaka ha kone ka mufoto?

⁷ Sathana a a djula leswaku Yobe a pfumela leswaku swikazratu hinkwaswu leswi a a langutana na swone a swi vangiwa ha Yehovha. Hi xikombiso, Sathana a tizrise moya lowukulu leswaku a wisa yindlu leyi vana va Yobe a va li ka yone. (Yb 1:18, 19) A tlhele a xikisa ndzrilo hi le tilweni akuva a helisa swifuyu swa Yobe ni vatizri vake. (Yb 1:16) Leswi moya ni ndzrilo swi buyiki hi ndlela ya ku kala yi nga tolovelekanga, nakone a swi xika hi le matilweni, Yobe a a yanakanya leswaku i Yehovha lweyi a swi vangiki. A a tibyela leswaku swi nga yentxeka a yentxe ntxhumu xa kukazri lexi khunguvanyisiki Yehovha. Nambitanu Yobe a nga mu kwatelanga Yehovha nakone a nga mu tsrhikanga. A a yanakanya leswaku loko a yamukela mintxhumu leyinene ka Yehovha a a fanela ku yamukela ni leya ku biha, xileswo a  te: ‘A vito dzra Yehovha a dzri khensiwe.’ (Yb 1:20, 21; 2:10) Yobe a tame a dumbeka ka Yehovha nambileswi a lahlekeliwiki hi mintxhumu yake, vanake nakone a a vabya. Kambe Sathana a a nga si gama ku hlasela Yobe.

8. He wani mazrengu man’wana lawa Sathana a ma tizrisiki akuva a hlasela Yobe?

⁸ Sathana a tizrise zrengu dzrin’wana akuva a hlasela Yobe. A tizrise vanghanu vazrazru lava a va nga li vanene, lava va nga yentxa leswaku Yobe a titwa a nga pfuni ntxhumu. Va hlaye leswaku Yobe a a xaniseka hi leswi a yentxiki mintxhumu yinyingi ya ku biha. (Yb 22:5-9) Va tlhele va hlaya leswaku nambi a ngo yentxa mintxhumu ya yinene, hinkwaswu leswo a swi nga pfuni ntxhumu ka Xikwembu Nkulukumba. (Yb 4:18; 22:2, 3; 25:4) Phela a va zama ku yentxa Yobe a pimisa leswaku Xikwembu Nkulukumba a a nga mu zrandzri, a a nge te mu bekisa ni leswaku a a nga yi nyiki lisima minzamu yake ya ku mu gandzrela. Swi nga yentxeka mazritu lawo ma yentxe Yobe a heleliwa hi dumbo.

9. I yini lexi pfuniki Yobe ku va ni xixixi ni ntamu?

⁹ Yanakanya xiyimu lexi Yobe a a li ka xone. A tsrhame nkumeni nakone a twa ku vavisa ngopfu. (Yb 2:8) Vanghanu vake va sungula ku vulavula ku biha ha yene, va ku a hi munene nakone leswi a swi yentxaka a swi pheli. Leswi va swi hlayaka swi mu tlhava mbilu, swi ya tlhantekela ni ka ku vavisa loku a ku twaka hi leswi a luzekeliwiki hi vana. A ku sunguleni Yobe e ti miyelela. (Yb 2:13–3:1) Loko a li leswaku vanghanu vake va yanakanya leswaku ku miyela kwake i xikombiso xa leswaku a djula ku fulazrela Xikwembu Nkulukumba, va be hansi! Ku nge kungani, Yobe a wololoxa nhamu a lavisisa vanghanu vake matihlweni a ku: ‘Ku kota ni fa, ni nga ka ni nga suki ku lulameni kwanga.’ (Yb 27:5, BX) I yini lexi pfuniki Yobe ku va ni xixixi ni ntamu nambiloko a kumana ni mindzringo? Nambileswi a a xaniseka  ngopfu swinene, a nga heleliwanga hi dumbo dzra leswaku Xikwembu Nkulukumba wa lizrandzru a a ta mu helisela tinxanisa take. A a swi tiva leswaku nambiloko o fa, Yehovha a a ta mu pfuxa.—Yb 14:13-15.

10. I yini leswi mfambu wa Yobe wu hi dondzrisaka swone?

¹⁰ Dzrungula dzra Yobe dzri hi dondzrisa leswaku Sathana a nge hi sindzrisi ku tsrhika ku tizrela Yehovha nakone Yehovha a wa swi tiva hinkwaswu leswi hi kumanaka na swone. Mfambu wa Yobe wu nga tlhela wu hi pfuna ku va hi yi twisisa ha hombe mindzringo leyi hi kumanaka na yone. A hi kambisise leswi hi nga swi dondzraka hi ku kongoma ka xikombiso xa Yobe.

11. I yini leswi hi nga tiyisekaka ha swone loko hi tama hi dumba Yehovha? (Yakob 4:7)

¹¹ Yobe a swi kombisile leswaku loko hi tama hi dumba Yehovha, hi nga swi kota ku tiyiselela mindzringo hi va hi hlula Sathana. Dzri ta va dzrini bindzru dzra kone? A matsralwa ma hi tiyisekisa leswaku Sathana a ta tsrutsruma.—Dondzra Yakob 4:7.

12. Xana dumbo dzra ku pfuxiwa ka vafi dzri mu tiyise hi ndlela yini Yobe?

¹² Hi fanela ku khomelela swi tiya ka dumbo dzra ku pfuxiwa ka vafi. Hi lani hi swi voniki ha kone ka xidondzro lexi khalutiki, minkama yinyingi Sathana a tizrisa ku txhava lifu akuva a hi tsrhikisa ku tizrela Yehovha. A mhakeni ya Yobe, Sathana a hlaye leswaku Yobe a a ta yentxa xin’wana ni xin’wana nambi ku tsrhika ku tizrela Yehovha, akuva a huluxa wutomi byake. Kambe Sathana a be hansi! Nambileswi a swi tikomba ingiki Yobe a a li kusuhi ni ku fa, a tame a dumbeka ka Yehovha. Ku dumba wunene bya Yehovha ni ku dumba loku tiyiki ka leswaku Yehovha a a ta yentxa leswi lulamiki minkama hinkwayu, swi mu pfune kuva a tiyisela. Yobe a a ni lipfumelo dzra leswaku nambiloko Yehovha a o pfumelela leswaku a fa nkameni luwani, a ta mu pfuxa a nkameni loko wu taka. Dumbo dzra ku pfuxiwa ka vafi a dzri nga lozro ka Yobe. Loko na hine ho va ni dumbo ledzri fanaka, nambi vo hi txhavisela va ku va ta hi dlaya a hi nge tsrhiki ku dumbeka ka Yehovha.

13. Ha yini hi fanela ku ma tiva ha hombe mazrengu lawa Sathana a ma tizrisiki akuva a dzringa Yobe?

¹³ Hi fanela ku ma tiva ha hombe mazrengu lawa Sathana a ma tizrisiki ka Yobe hikusa awa ma tizrisa ni namunhla. Twana xihehlo xake loko a te: ‘Hinkwaswu leswi a mhunu [ku nga li Yobe ntsena] a nga naswu, a ta swi humexela a vutomi byakwe.’ (Yb 2:4, 5) Hi mazritu lawa, Sathana a hlaya leswaku hine a hi mu zrandzri Xikwembu Nkulukumba nakone loko wutomi byezru byi le khombyeni, hi ta tsrhika ku mu gandzrela. Sathana a tlhela a hlaya leswaku Xikwembu Nkulukumba a nga hi zrandzri nakone a nga na mhaka ni minzamu leyi hi yi yentxaka akuva hi mu tizrela. Xileswo, hine hi dumbaka Yehovha hi fanela ku tivonela akuva hi nga kanganyisiwi hi mazrengu ya Sathana.

14. I yini leswi mindzringo yi nga hi pfunaka ku swi vona? Tlhamuxela.

¹⁴ Hi fanela ku vona mindzringo leyi hi kumanaka na yone swanga mukhandlu wa ku tiva leswi hi nga xiswone. Mindzringo leyi Yobe a kumaniki na yone, yi mu pfune kuva a yampswisa wumhunu byake. Hi xikombiso, a dondzre leswaku a fanela ku yengesela ku titsrongahata kwake. (Yb 42:3) Na hine hi nga vona lomu hi nga yampswisaka kone loko hi kumana ni mindzringo. Makwezru lweyi a vitaniwaka Nikolay, * lweyi a pfaleliwiki djele nambileswi a a xanisiwa hi mavabyi ya kukazri, .a li: “A djele dzri fana ni mutxhini lowu kotaka ku vona leswi hi nga xiswone ndzreni. Loko  u li djele, u kota ku vona a wumhunu byaku bya wukriste.” Loko kutani hi swi kota ku vona lomu hi tsraniki kone, hi ta kota ku yentxa xa kukazri akuva hi lulamisa.

15. I mani lweyi hi fanelaka ku mu yingiseta nakone ha yini?

¹⁵ Hi fanela ku yingiseta Yehovha ku nga li valala vezru. Yobe a zreye ndleve nkama lowu Yehovha a vulavulaka na yene. Xikwembu Nkulukumba a mu hambe swivutiso swa ku yanakanyisisa ha swone a ku: ‘Xana wa wu vona ntamu wanga wa ku tumbuluxa? Ni tiva hinkwaswu leswi ku yentxekeliki. U yanakanya leswaku a ni na mhaka na wene?’ Hi ku titsrongahata Yobe a hlamule Yehovha na a kombisa ku tlangela wunene byake, a ku: ‘A tindleve tanga a fa ti yingele a timhaka taku; kambe swoswi a mahlo yanga ma ku vonile.’ (Yb 42:5) Swi tikomba Yobe a hlaye mazritu lawa na a ha tsrhame kole a nkumeni, na mizri wake wu tale hi mazrumba, a li ku dzrileni ka vanake. Nambitanu, Yehovha a kombise leswaku a a mu zrandzra Yobe nakone a mu tiyisekise leswaku awa mu yamukela.—Yb 42:7, 8.

16. Hi ku ya hi Ezaya 49:​15, 16, i yini leswi hi fanelaka ku swi tekela nhlokweni loko hi kumana ni mindzringo?

¹⁶ Namunhla, vhanu vanyingi va nga ha hi zruka kumbe va hi teka hi nga li va ntxhumu. Va nga ha dzringisa ku hona ndhuma yezru kumbe ya hlengeletanu, “ni ku [hi] lumbeta mintxhumu ya yinyingi ya ku biha”. (Mt 5:11) Ka mfambu wa Yobe, hi dondzre leswaku Yehovha awa swi dumba leswaku hi ta tama hi dumbeka kwake nambiloko hi kumana ni mindzringo. Ha swi tiva leswaku Yehovha awa hi zrandzra, nakone a nga ti va tsrhika lava va mu dumbaka. (Dondzra Ezaya 49:15, 16.) U nga yingiseteli madzrimi lawa ma hlayiwaka hi  valala va Xikwembu Nkulukumba! Makwezru lweyi a vitaniwaka James wa le Turquia, lweyi ndangu wake wu kumaniki ni mindzringo ya ku bindzra, a li: “Hi twisise leswaku ku yingisetela madzrimi lawa vhanu va ma hlayaka hi vhanu va Xikwembu Nkulukumba swi hi heta ntamu, xileswo hi beke miyanakanyu yezru ka mintxhumu ya moya ni ku tama hi hiseka a ntizrweni wa Yehovha. Leswo swi hi pfune ku tama hi nyonxa.” Ku fana na Yobe, hi yingiseta Yehovha! A madzrimi ya valala vezru ma to tsranisa dumbo dzrezru.

17. U dondzra yini ka xikombiso xa vavanuna ni vavasati va ku dumbeka lava ku vulavuliwaka ha vone ka Ba-Heberu ndzrima 11?

¹⁷ Yobe ko va mun’we wa malandzra ya Yehovha lweyi a tamiki a va ni xixixi a tlhela a tiya loko a kumana ni mindzringo ya ku bindzra. Ka papela ledzri a dzri tsraleliki Vaheberu, mupostola Pawulo a vulavula hi van’wana, swa nga ‘ntlawa lowa ku nhati wa Timboni’. (Hb 12:1) Hinkwavu va kumane ni mindzringo ya ku txhavisa, nambitanu va tame va dumbeka ka Yehovha. (Hb 11:36-40) Xana ku tihita ni ku tiyisela kwavu swi ve swa mahala? Im-him! Nambileswi va kalaka va nga ku vonanga ku hetiseka ka swidumbiso hinkwaswu swa Xikwembu Nkulukumba, va tame va yimela Yehovha. Nakone leswi a va tiyiseka leswaku Yehovha a a va yamukela, a va dumba hi ku helela leswaku swidumbiso hinkwaswu swi ta hetiseka. (Hb 11:4, 5) Xikombiso xavu xi nga tiyisa ku tiyimisela kwezru ka ku tama hi lavisela Yehovha.

18. I yini leswi u tiyimiseliki ku swi yentxa? (Ba-Heberu 11:6)

¹⁸ Hi hanya a nkameni lowu misava yi yaka yi honeka. (2Tm 3:13) Sathana a nga yimi ku dzringa vhanu va Xikwembu Nkulukumba. Nambi hi ngo kumana ni ndzringo wa ku tsrhamisa kuyini, a hi tiyimiseleni ku tama hi tizrela Yehovha hi lani hi nga kotaka ha kone na ‘hi laviseli ku Xikwembu Nkulukumba lwa hanyaka’. (1Tm 4:10) Dzrimuka leswaku leswi Yehovha a swi yentxeliki Yobe swi kombisi leswaku ‘a tele timpswalu ni lilondzro.’ (Yk 5:11) Ku fana na Yobe, a hi tameni hi dumbeka ka Yehovha, na hi tiyiseka leswaku ‘a hakela lava mu djulaka’.—Dondzra Ba-Heberu 11:6.