Ka tapen ma‘oi ne famör Uetnes ‘on Jihova ne ‘äe ‘inea? Kop ma ‘ạmis he his noh hại‘eleag ma ‘äe, garue ne rak ag‘esea ma ‘äe. Ne kop ma ‘ạmis hạifäegag vȧh ma ‘äe ‘e Puk Ha‘a. Ka sei tä ‘ạmis, ma ‘e reko tese tä ‘ạmis fäeag‘ȧk ofrạu ‘otomis pilifi?

‘Ạmis famör la‘ma. ‘Ạmis leum ‘e kạinag famör ma‘oi ne tūtū ‘otomis nohnoho ma aga. Ma ‘on lelea‘ ‘e ‘ạmisa, leum ‘e rot tūtū ka iris hoi‘ȧk kat pilif ra ne mā se ‘Ạitu. Mumuạ la ‘ạmis la lelea‘ Uetnes, ‘ạmis sạkior a‘lelei se muạ‘ạkiạg ne Puk Ha‘a. (Garue 17:11) ‘Ạmis aier‘ȧk tē ne ‘ạmis rako, ma tä ‘ạmis rē puer ‘e ‘otomis huga la titi‘ȧk se ‘Ạitu, Jihova.

‘Ạmis pō ‘on ‘es‘ao ne rakoag ne Puk Ha‘a. ‘Is famori, ‘is agtạu ma pefä‘e ka  tape‘ma ‘is kat ‘atakoa ra. ‘Ạmis ȧs‘ȧk la garue‘ȧk muạ‘ạkiạg ne Puk Ha‘a ‘e te‘ ne terạni, ma ‘ạmis pō furmariạ ‘e ‘otomis mạuri. (Salamo 128:​1, 2) Ta ‘on‘on ‘ạmis hạiväeag tē lelei ne ‘ạmis rak ‘e Puk Ha‘a.

‘Ạmis mȧür‘ȧk muạ‘ạkiạg fak‘ạitu. Ag fak‘ạitu ne rak‘ạkim ‘e Puk Ha‘a, hạiasoagan mạuri la lelei ma kel‘ạkia ‘e‘ạkiga, tape‘ma se ag pumuạ ‘i, aire ma mäeavhanisi. Muạ‘ạkiạg ne Puk Ha‘ ‘i hạiasoagan la rē famör lelei ka ‘es‘ao ‘e hanua, ma a‘ne‘ne‘ạkia kạunohoga la ag ma‘ma‘ ka hugag ‘esea. ‘Ạmis aier‘ȧk ne “‘Ạitu kat puer hil ra,” ‘e rȧn te‘ ‘atakoa, ‘ạmis mou se kạunohoag fak‘atat ne hugag ‘esea ‘e pilifi ma sại ‘e hạifiriạg fak famori ma fak politiki. ‘Ạmis famör la‘ma ka ‘ạmis tak tū.​—Garue 4:13; 10:34, 35.

• Ka tē tes ta hạitatạuạg ‘e Uetnes ‘on Jihova ma famori?

• Ka ag pumuạ tes ‘atama ta Uetnes ta rak ‘e ‘oris sạkiroag ne Puk Ha‘a?