Jihova na‘ia rȧnte‘ se fa ma hạina. Ma iạ tä utut ne ‘is noho e. ‘Inos mumue ta, Atama ma Ive kat fup‘ȧk ra la a‘hoia hevạni​—‘Ạitu fup‘ȧk vạhia ‘agero la noh ‘e hevạni. (Jope 38:4, 7) ‘Ạitu ho‘ag fa mumue ta ma na‘ia iạ se parataiạs a‘helavat ne he‘ veko te Iteni. (Kamataga 2:15-17) Jihova na se ia ma ‘on tore ta ‘airöt‘ạkiget se ta mȧür ‘oaf‘ofat ne kat ‘es a‘ofiget ra ‘e rȧnte‘.​—Hat Salamo 37:29; 115:16.

 ‘E ‘on kamataga, veko te Iteni ‘esea ta vek parataiạs ta. Ma ‘inos mumue ta täla a‘hoia rȧnte‘ ‘e ‘oria tore. ‘E av ne tör se, iriạ la ‘es puer se te‘ ne te ma la re rȧnte‘ la parataisit. (Kamataga 1:28) Rȧnte‘ kat ‘es ra ta avat la a‘raksa‘ȧk. Iạ tä hanuet ne fup famori la noho e.​—Hat Salamo 104:5.

 Atama ma Ive toa‘noa se ‘Ạitu, ma tä Jihova hot‘ȧk iria ‘e vek ta. Parataiạs ta mao‘ȧk ‘e av he ta‘ag ma kat ‘es ra ta le‘et la pola hö‘ȧk hoi‘ạkim. Puk Ha‘ heta ‘eag: “Rȧn te‘ sapäk vạhia se iạ ne raksa‘a.”​—Jope 9:24.​—Hat Kamataga 3:23, 24.

 Teka Jihova kal a‘sokoa ra ‘on ‘amnạkit ne iạ fäeag porȧk vạhia ‘e ‘on kamataga se famori? ‘Igke! Ia ne ‘atakoa se ma ‘on ne‘ne‘i. ‘On ‘amnạki kal hö‘ vävär ra. (Aisea 45:18) Iạ täla hö‘ȧk hoi‘ạkim fup famori se salat ne iạ ‘amnȧk‘ȧk vạhia.​—Hat Salamo 37:11, 34.

 Parataiạs ta täla hö‘ȧk hoi‘ȧkim se rȧnte‘ ‘e avat ne Sạu ‘on ‘Ạitu, Jisu la pure e. ‘E pelut ne he‘ Amaketoni, Jisu täla muạ‘ạkia ‘ager ‘on ‘Ạitu ma a‘raksa‘ạkia te‘ ne famör ne  agại se ‘Ạitu. Jisu täla ‘o‘oroa Satan ta la fạu 1,000. Famör ‘on ‘Ạitu täla sạieris ‘e a‘raksa‘ạkiạg ta ‘e reko Jisu täla tạkia ma sại‘ạkia iris. Iris täla noh ‘oaf‘oaf ‘e Parataisi te rȧnte‘ se av se ‘es tohiget.​—Hat Kel‘ȧk Tē 20:1-3; 21:3, 4.

 Ka ‘e av hes tä ‘Ạitu la a‘ofia te mam‘asa ‘e rȧnte‘? Jisu na vạhia “faki‘oag” het la kel‘ạkia ne a‘ofiạg ta ‘elemea. Te ne soksok ‘e rȧnte‘ täla mane‘ạkia mȧür ‘on famori ma kel‘ạkia ne ‘is noh ‘e “a‘ofiạg ne tē ne av te‘is” e ‘on ‘i‘i.​—Hat Mataio 24:3, 7-14, 21, 22, NW.

 ‘E laloag ne fạu 1,000 ta, ne Jisu la purem ‘e hevạni se rȧnte‘, iạ täla a‘ofia te a‘ru ‘atakoa. (Aisea 9:6, 7; 11:9) ‘Eake Jisu la puer fakSạu ma ta‘ma‘ie, ka iạ la ‘Apei‘ạit Ti‘ut ma ia täla i‘ua ag raksa‘ ‘on te‘ ne iris ne hanis ‘e ‘Ạitu. ‘E reko Jisu, ‘Ạitu täla ‘ut‘ạkia ‘af‘afa, mafua ma ala.​—Hat Aisea 25:8; 33:24.

 Famör ne tovavhiạn se ‘Ạitu täla mȧür ‘e Parataiạs ta. (1 Jone 2:17) Jisu fekạu‘ạkia ‘on lelea‘ rak te la aoa famör ne huạg vạivại ma rak‘ȧk tean iris la pola ‘Ạitu la tȧr iris. Terạni te‘i, Jihova ososia famör miliön his, la mȧür ‘e parataisit te rȧnte‘ ‘e avat ‘ut‘utum ‘og. (Sefanaia 2:3) ‘E ri Tạunạ‘iạg ‘on Jihova Uetnes ta, famori täla rak la vävän ma ö‘ö‘fa lelei, ka hạiạn ‘inos ma ö‘ö‘ hạiạn lelei. Lȧ‘riri‘i ma ‘oris o‘o‘i te ag‘esea ‘e ‘oris titi‘ạkiga ma rakoa rog heg ta la ‘es‘av se irisa.​—Hat Maika 4:1-4.