Кэргэнниилэр холбоспуттарын кэннэ олохторугар саҥа ыарахаттары көрсөллөр. Оннук ыарахаттар эһиги тус-туспа санаалаах уонна олоҕу атын-атыннык көрөргүтүттэн буолаллар. Эбэтэр туораттан эмиэ ыарахаттар үөскүөхтэрин сөп.

Кыһалҕалары быһаарар чэпчэкитэ суох, ол иһин биһиги ону сөбүлээмиэхпитин сөп. Ол да буоллар Библия биһигини ону быһаарарга ыҥырар (Матфей 5:23, 24). Ыарахаттары быһаарарга Библия сүбэлэрэ саамай үчүгэйдик көмөлөһүөхтэрин сөп.

БИБЛИЯ ТУОХ ДИИРИЙ. «Саҥарарга кэмнээх-кэрдиистээх» буолар (Экклезиаст 3:1, 7). Проблеманы быһаарарга бириэмэни анаа. Кэргэҥҥин кытта тугу ырытаары гынаргын, уонна ол туһунан туох дии саныыргын аһаҕастык үллэстэр буол. Бэйэҥ кэргэҥҥэр мэлдьи «кырдьыгы этэр буол» (Ефесяннарга 4:25). Туохтан эмэ кыыһырдаххына, бэйэҕин туттуна сатаа. Улахан этиһии тахсыбатын туһугар сымнаҕастык кэпсэтэр буол (Притчи 15:4; 26:20).

Оннооҕор тугу эмэ кытта сөбүлэспэт буоллаххына, ону кэргэҥҥэр тапталы уонна убаастабылы көрдөрөн үтүө санаалаахтык этэр буол (Колоссяннарга 4:6). Өйдөспөт буолууну төһө кыалларынан түргэнник быһаара сатаа уонна өһүргэнэн саҥата суох сылдьыма (Ефесяннарга 4:26).

ТУҺАЛААХ СҮБЭЛЭР

• Проблеманы ырытарга сөптөөх бириэмэни тал

• Кэргэниҥ саҥарар кэмигэр саба саҥарартан бэйэҕин туттун. Эн саҥарар бириэмэҥ эмиэ кэлиэҕэ

БИБЛИЯ ТУОХ ДИИРИЙ. «Бырааттыы дьон быһыытынан бэйэ-бэйэҕитин истиҥник таптааҥ, атыттары бэйэҕитинээҕэр үрдүктүк тутуҥ» (Римляннарга 12:10). Эһиги хайдах истэргит олус улахан суолталаах. Көрсүөтүк, аһыныгастык быһыылан уонна кэргэниҥ санаатын өйдүү сатаа (Иаков 1:19; 1 Петр 3:8). Истибэккэ сылдьан истибит курдук туттар сыыһа. Кэргэниҥ тугу этэрин барытын хаалларан туран болҕойон истэ сатаа, эбэтэр ол боппуруоһу хойутуу ырытыахха диэн сымнаҕастык этиитэ киллэр. Эһиги бэйэ-бэйэҕитигэр утарсааччы буолбакка биир сыаллааххытын-соруктааххытын өйдүүр буоллаххытына, маннык сүбэлэри тутуһаргытыгар чэпчэки буолуо: «Түргэнник өһүргэнэ охсума» (Экклезиаст 7:9).

ТУҺАЛААХ СҮБЭЛЭР

• Кэргэниҥ тугу этэрин сөбүлээбэтэххинэ даҕаны кини тылларын ылынар буол

• Кини тугу этиэн баҕарарын өйдүү сатаа уонна хайдах тутта сылдьарын көрөн кини санаатын болҕомтоҕор ыла сатаа

БИБЛИЯ ТУОХ ДИИРИЙ. «Хайа баҕар үлэттэн туһа тахсар, оттон тылгынан эрэ саҥарар буоллаххына дьадайыаҥ» (Притчи 14:23). Кыһалҕаны быһаарыы аҥардас кэпсэтииттэн эрэ турбат. Ол үрдүнэн тугу быһаарыммыккытын тутуһуохтааххыт. Ону ситиһэр чэпчэкитэ суох буолуон сөп, ол эрээри туһаны аҕалыаҕа (Притчи 10:4). Өскөтүн эһиги барытын бииргэ оҥорор буоллаххытына, эһигини «ситиһии күүтэр» (Экклезиаст 4:9).

ТУҺАЛААХ СҮБЭЛЭР

• Проблема быһаарыытыгар хас биирдиигит тугу гыныахтааҕын эрдэттэн кэпсэтиҥ

• Кэмиттэн-кэмигэр тугу ситиспиккитин ыйааһыннаан көрүҥ