Tsamba Yakutoma Kuna Akristu a ku Korinto 6:1-20
6 Munthu angadawirana na ndzace pakati panu,+ thangwi yanji asaenda kasuma kuna anyakutonga miseru toera kutongwa na anthu akuti nkhabe kulambira Mulungu, mbakhonda kuenda kuna anthu akucena?
2 Peno imwe nkhabe dziwa kuti anthu akucena anadzatonga dziko?+ Mphapo khala imwe munadzatonga dziko, nee munakwanisambo kutonga miseru mingʼono ninga ineyi?
3 Nee musadziwa kuti ife tinadzatonga aanju?+ Mphapo tinacimwana tani kutonga miseru inaoneka mu ndzidzi uno?
4 Pangaoneka miseru mu ndzidzi uno yakuti isafunika kutongwa,+ thangwi yanji musasankhula anthu akuti mpingo usaaona kuti nee athema kutonga miseru?
5 Ndiri kulonga pyenepi toera mukhale na manyadzo. Kodi nkhabepo munthu waudziwisi pakati panu wakuti anakwanisa kutonga miseru inaoneka pakati pa abale ace?
6 Mbwenye imwe musasiya pyenepi, mbamuenda kasumirana mʼbale na mʼbale kuna anyakutonga miseru akuti nee asalambira Mulungu!
7 Mwandimomwene, khala musasumirana unango na ndzace, pisapangiza kuti mwamala kale kukundwa. Thangwi yanji imwe nkhabe tawira kuti anthu akudawireni pyawo?+ Thangwi yanji imwe nkhabe tawira pyanu kuluza?
8 Mbwenye imwe musacitira pinthu pyakuipa abale anu, mbamuanyengeza!
9 Peno imwe nkhabe dziwa kuti anthu akukhonda kulungama nee anadzapita mu Umambo wa Mulungu?+ Lekani kunyengezwa.* Ale anacita ulukwali,*+ analambira madzimunthu,+ anyaupombo,+ amuna anatawira kugonwa na amuna andzawo,+ amuna anagona amuna andzawo,*+
10 mambava, anthu anafuna pyonsene,+ anyakuledzera,+ anyakutikana,* na ale anapokosera andzawo pinthu, onsene nkhabe kudzapita mu Umambo wa Mulungu.+
11 Kale anango a imwe akhacitambo pinthu pyenepi. Mbwenye imwe mwamala kutsukwa;+ imwe mwamala kuceneswa;+ imwe mwamala kulungamiswa+ mu dzina ya Mbuyathu Yezu Kristu, pontho na nzimu wa Mulungu wathu.
12 Ine ndisatawiriswa* kucita pinthu pyonsene, mbwenye si pyonsene tayu pyakuti pisaphedza.+ Ine ndisatawiriswa kucita pinthu pyonsene, mbwenye nkhabe cinthu cinafuna ine kutawirisa toera kunditsogolera.*
13 Cakudya cacitirwa mimba, mimba yacitirwa cakudya, mbwenye Mulungu anadzafudza cakudya na mimba ene.+ Manungo nee ndi toera kucita nawo ulukwali,* mbwenye ndi toera kutumikira nawo Mbuya;+ pontho Mbuya ndiye mwanaciro manungo.
14 Mbwenye na mphambvu zace,+ Mulungu alamusa Mbuyathu+ muli akufa, pontho iye anadzatilamusambo muli akufa.+
15 Kodi imwe nkhabe dziwa kuti manungo anu ndi makhundu a manungo a Kristu?+ Mphapo ndisafunika kubulusa makhundu a manungo a Kristu mbandiaphataniza na manungo a nkazi waulukwali?* Nee pangʼono pene!
16 Kodi imwe nkhabe dziwa kuti munthu anapita mʼmabonde na nkazi waulukwali asakhala manungo mabodzi ene na iye? Thangwi Mulungu alonga: “Uwiri wawo anadzakhala manungo mabodzi basi.”+
17 Mbwenye munthu adaphatana na Mbuya, asakhala na manyerezero mabodzi ene na iye.*+
18 Mphapo, thawani ulukwali!*+ Madawo anango onsene anacita munthu, asaacita kunja kwa manungo ace, mbwenye munthu anacita ulukwali, akudawira manungo ace.+
19 Kodi imwe nkhabe dziwa kuti manungo anu ndi templo+ ya nzimu wakucena unakhala muna imwe, udapaswa imwe na Mulungu?+ Kusiyapo pyenepi, imwe ndimwe anthu a Mulungu,+
20 thangwi imwe mwagulwa na ntengo ukulu.+ Natenepa, phatisirani manungo anu+ toera kupasa mbiri Mulungu.+
Pidzindikiro Pyapantsi
^ Peno: “kupeuswa.”
^ Peno: “amuna anapita mʼmabonde na amuna andzawo.” Fala na Fala: “amuna anagona na amuna andzawo.”
^ Onani Mabvekero a Mafala Anango, “Ulukwali.”
^ Peno: “anyakuxola.”
^ Peno: “kunditonga.”
^ Peno: “ndisatawiriswa na mwambo toera.”
^ Mucigerego ndi porneia. Onani Mabvekero a Mafala Anango.
^ Peno: “wauputa, wauhule.”
^ Fala na Fala: “asakhala mʼbodzi ene na iye mwauzimu.”
^ Mucigerego ndi porneia. Onani Mabvekero a Mafala Anango.
