Yezu alonga: “Mbumba inadzamenyana na mbumba indzace, umambo unadzamenyana na umambo undzace. Kunadzaoneka piteketeke pikulu, kunadzaonekambo njala na mautenda m’mbuto zakusiyana-siyana.” (Luka 21:10, 11) Pinthu pyenepi pikhafuna kucitika mbapidakhala cidzindikiro cakunyindirika cakuti mbicidapangiza kuti “Umambo wa Mulungu uli cifupi.” Kodi pinthu pyenepi pyacitika kale mu ndzidzi ubodzi ene pa dziko yonsene? Onani pidacitika.

1. NKHONDO

Mu caka 1914 kwacitika nkhondo yakuti cipo ikhadacitika kale mu mbiri yonsene ya anthu. Kazinji kene mphangwa zisalonga kuti caka ca 1914 ndi caka cidacinja umaso wa anthu thangwi ndi caka cidatoma nkhondo yakutoma ya dziko yonsene yapantsi. Pa nkhondo ineyi anthu atoma kuphatisira pida ninga matanki, bombas aéreas, bombas caseiras, gás venenoso, m’mbuto zizinji toera kupha anthu azinji. Buluka penepo kwacitika nkhondo yaciwiri pa dizko yonsene yapantsi, pa nkhondo ineyi paphatisirwa mfuti zinacemerwa armas atômicas.

2. PITEKETEKE

Academia Britanica yalonga kuti pyaka pyonsene piteketeke cifupi na 100 pisabweresa “nyatwa zizinji.” Serviço de Pesquisa Geológica ya ku Estados Unidos yalonga kuti mwakubverana na mphangwa zakale (kutomera cifupi na caka 1900), tisadikhira piteketeke pikulu cifupi na 16 pyaka pyonsene.” Anango asalonga kuti pasacitika piteketeke pizinji thangwi pana njira zadidi za kupidzindikira. Undimomwene ndi wakuti piteketeke pisabweresa nyatwa zizinji, pontho pisapha anthu azinji pa dziko yonsene.

 3. KUSOWEKA KWA CAKUDYA

Kusoweka kwa cakudya kusaoneka thangwi ya nkhondo, kudyekera, utcerengi, kukhonda kubuluka kwa pyakudya m’maminda peno kunentsa kwa makhaliro akudambo. Programa Mundial de Alimentação ya 2018 yalonga: “Pa dziko yonsene ya pantsi anthu akukwana mamiliyau 821 nkhabe cakudya cakukwana, pontho anthu akukwana 124 nkhabe cakudya.” Kusoweka kwa pyakudya pyakupasa ungumi kusacitisa anapiana cifupi na mamiliyau 3.1 kufa pyaka pyonsene. Anewa akhali mathangwi adacitisa ana akukwana mapurusento 45 kufa pa dziko yonsene mu caka ca 2011.

4. MAUTENDA

Bukhu ya Organização Mundial da Saúde yalonga tenepa: “Sekulu 21 iri na mautenda mazinji akugopswa. Mautenda akale akuti asapitiriza mpaka lero ndi kolera, miliri na febre amarela, anango mwa mautenda mapswa ndi, SARS, nyampwanda, MERS, Ebola na Zika.” Ngakhale kuti asiyentista na madotoro awangisira kakamwe kupfundza pya mautenda, mbwenye nee akwanisa kumalisa mautenda peno kugumana ntombwe wa mautenda onsene.

5. BASA YAKUMWAZA MPHANGWA PA DZIKO YONSENE

Yezu alongambo khundu inango ya cidzindikiro pidalonga iye kuti: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.” (Mateu 24:14) N’dziko muli na nyatwa zizinji, anthu akupiringana mamiliyau 8 a madzindza onsene asamwaza mphangwa za Umambo wa Mulungu m’madziko akukwana 240, mu pilongero pyakupiringana 1.000. Pyenepi cipo pyacitika kale mu mbiri yonsene ya anthu.

Pinthu pidalonga Yezu ninga cidzindikiro pikucitika lero. Thangwi yanji tisafunika kudziwa pyenepi? Thangwi Yezu akhadalonga: “Mungaona pinthu pyenepi mbapicitika, dziwani kuti Umambo wa Mulungu uli cifupi.”​—Luka 21:31.

Cidzindikiro cidalonga Yezu, pabodzi na midzidzi inalongwa m’Bhibhlya, pisatiphedza toera kubvesesa kuti Mulungu akhazikisa Umambo wace kudzulu mu caka 1914. * Mu ndzidzi unoyu iye akhazikisa mwanace, Yezu Kristu ninga Mambo. (Masalmo 2:2, 4, 6-9) Mwakukhonda dembuka, Umambo wa Mulungu unadzatonga dziko yapantsi, pontho unadzafudza mautongi onsene a anthu mbacitisa dziko yapantsi kudza paraizu, anthu mbakhala mwenemo kwenda na kwenda.

Mwakukhonda dembuka, mafala a phembero idapfundzisa Yezu anakwanirisika: “Umambo wanu mbudze. Cifuno canu cicitwe pantsi pano ninga kudzulu” (Mateu 6:10) Kodi Umambo wa Mulungu ukucitanji kutomera mu ndzidzi udakhazikiswa iwo mu caka 1914? Ninji pinadikhira ife kuona mu ndzidzi unafuna kutongwa anthu na Umambo?