1-2. Ndi munjira ipi pinthu pidaticitikira pyalandana na pidacitikira m’phale adalongwa pa ndima yakutoma?

 NYEREZERANI m’phale wakuti akuzwa m’banja yakupfuma kakamwe. Mbwenye ntsiku inango anyakubalace acita cidengwa mbafa. M’phale unoyu atsukwala kakamwe na pinthu pyenepi. Mbwenye pyacitika pinthu pinango pyakuti pyantsukwalisa kakamwe. Iye adzindikira kuti anyakubalace akhadabvunga mpfuma yawo yonsene, pontho thangwi ya pyenepi iwo asiya mangawa mazinji. Natenepa, m’mbuto mwakusala na mpfuma, iye asala na mangawa mazinji, pontho anthu asafuna kuti iye alipe mangawa anewa onsene mu ndzidzi ubodzi ene. Mbwenye iye nee ali na kobiri toera kulipa mangawa anewa.

² Munjira ibodzi ene, pidaticitikira pyalandana na pidacitikira m’phale unoyu. Anyakubalathu akutoma, Adhamu na Eva akhali aungwiro, pontho akakhala m’paraizu yakubalika kakamwe. (Gen. 1:27; 2:7-9) Iwo mbadakhala na umaso wadidi kakamwe kwenda na kwenda, mbwenye pinthu pyacinja. Iwo aluza Paraizu, kuphatanizambo cidikhiro cakukhala m’maso kwenda na kwenda. Mphapo ninji pidasiyira iwo anawo? Bhibhlya isalonga: ‘Thangwi ya munthu m’bodzi basi [Adhamu], kwapita kufa thangwi ya madawo, natenepa kufa kwamwazika kwa anthu onsene thangwi anthu onsene adawa.’ (Aroma 5:12) Pinthu pidatisiyira Adhamu ndi madawo, pontho madawo anewa atibweresera kufa. Madawo adasala na ife ndi ninga mangawa makulu akuti nee m’bodzi wa ife anakwanisa kualipa.—Mas. 49:8.

3. Thangwi yanji madawo athu anakwanisa kulandaniswa na “mangawa”?

 ³ Yezu alandanisa madawo na “mangawa.” (Mat. 6:12; Luka 11:4) Tingacita madawo, pisakhala ninga tiri na mangawa na Yahova, pontho tisafunika kulipa mangawa anewa. Tingakhonda kualipa, iwo basi ene asamala tingafa.—Aroma 6:7, 23.

4. (a) Ndi pinthu pipi pikhafuna kucitika na anthu onsene mbadasowa ciphedzo? (Masalmo 49:7-9) (b) Fala yakuti “ madawo” isabvekanji m’Bhibhlya? (Onani bokosi ya nsolo wakuti “Madawo.”)

⁴ Kodi ndi pyakukwanisika kukhala pontho na pinthu pidaluza Adhamu na Eva? Inde, mbwenye tayu na mphambvu zathu. (Lerini Masalmo 49:7-9.) Mbatidasowa ciphedzo, nee mbatidakhala na cidikhiro cakukhala na umaso wakukhonda mala ntsogolo, pontho nee mbatidakhala na cidikhiro cakulamuswa muli akufa. Ife mbatidasowa cidikhiro cakulamuswa muli akufa, ninga pinyama.—Ekle. 3:19; 2 Ped. 2:12.

5. Yahova atiphedza tani toera kulipa mangawa a madawo athu? (Onani foto patsamba yakutoma.)

⁵ Nyerezerani pontho citsandzo ca m’phale adalonga ife pa ndima yakutoma. Mbapidakhala tani khala mamuna wakupfuma kakamwe aperekeka toera kulipa mangawa ace onsene? Mwakukhonda penula, m’phale unoyu mbadapereka takhuta kakamwe. Munjira ibodzi ene, Babathu waufuni Yahova, atipasa muoni wakuti unakwanisa kulipa mangawa onsene ali na ife thangwi ya kudawa kwa Adhamu. Yezu alonga tenepa thangwi ya muoni unoyu: “Mulungu afuna kakamwe dziko yapantsi mbapereka Mwanace m’bodzi ekha, toera munthu anan’khulupira akhonde kufudzwa, mbwenye agumane umaso wakukhonda mala.” (Juw. 3:16) Kusiyapo pyenepi, muoni unoyu usatipasambo mwai toera kukhala na uxamwali na Yahova.

6. Tinapfundzanji mu nsolo uno, pontho thangwi yanji?

⁶ Tinakwanisa tani kuphatisira mwadidi muoni unoyu udatipasa Yahova mbatilekererwa madawo athu? Toera kutawira mbvundzo unoyu, tinapfundza mafala mangasi a m’Bhibhlya na mabvekero awo. Tinganyerezera mwadidi mabvekero a mafala anewa na pinthu pidacita Yahova toera kutilekerera, kupereka kwathu takhuta kuna iye kunathimizirika.

YAHOVA ASAFUNA KUTI TIKHALE AXAMWALI ACE

7. (a) Ndi pinthu pipi pinango pidaluza Adhamu na Eva? (b) Ninji pinafuna ife thangwi yakukhala ana a Adhamu na Eva? (Aroma 5:10, 11)

⁷ Pidadawa Adhamu na Eva aluza mwai wakukhala m’maso kwenda na kwenda. Kusiyapo pyenepi, iwo akhala anyamalwa a Babawo,  Yahova. Pakutoma, Adhamu na Eva akhacita khundu ya banja ya Mulungu. (Luka 3:38) Mbwenye pidakhonda iwo kubvera Yahova, iwo abuluswa m’banja ineyi mbadzati kukhala na ana. (Gen. 3:23, 24; 4:1) Na thangwi ineyi, ninga ana a Adhamu na Eva, ife tisafunika kukhala pontho muntendere na Mulungu. (Lerini Aroma 5:10, 11.) Munjira inango, ife tisafunika kukulisa uxamwali wathu na Mulungu. Fala Yacigerego idathumburuzwa “kukhala pontho muntendere” isabveka “kucita uxamwali na nyamalwa.” Ndi pyakutsandzayisa kuona kuti Yahova ndiye adatoma kucita uxamwali na ife.

YAHOVA ACITA MASASANYIRO TOERA TIKWANISE KUKHALA AXAMWALI ACE

8. Ninji (a) ntsembe yakucenesa madawo? (b) ntsembe yakufudza madawo

⁸ Yahova acita masasanyiro toera anthu akusowa ungwiro akwanise kukhala axamwali ace. M’Bhibhlya, pyenepi pisacemerwa ntsembe yakucenesa madawo. Yahova acita masasanyiro toera tikhale pontho na pinthu pidaluza Adhamu mukutipasa cinthu ca ntengo ubodzi ene. Malemba Acigerego aphatisira fala inango yakulandana na fala yakuti “ntsembe yakucenesa madawo.” Fala ineyi ndi yakuti ntsembe yakufudza madawo. (Aroma 3:25) Ntsembe yakufudza madawo ndiyo inacitisa munthu kukhala muntendere na Mulungu mbakhala na uxamwali na iye.

9. Yahova acitanji toera Aizraeli alekererwe madawo awo?

⁹ Yahova acita masasanyiro toera madawo a Aizraeli alekererwe, mbakhala na uxamwali wakuwanga na iye. Pyaka pyonsene, Aizraeli akhakumbuka Ntsiku Yakuphimbira Madawo. Ntsiku ineyi, nyantsembe akhapereka ntsembe za pinyama toera anthu alekererwe madawo awo. Ndimomwene kuti ntsembe za pinyama nee mbazidakwanisa kufudza madawo a anthu, thangwi anthu apiringana pinyama. Mbwenye mu ndzidzi ukhatcunyuka Aizraeli mbapereka ntsembe zikhaphemba Yahova, iwo mbadakwanisa kukhala na cinyindiro cakuti Yahova mbadaalekerera. (Aheb. 10:1-4) Kusiyapo pyenepi, kupereka ntsembe za pinyama pyaka pyonsene kukhakumbusa Aizraeli kuti akhali akudawa, pontho toera madawo onsene alekererwe pakhafunika cinthu cikulu kakamwe kupiringana ntsembe zenezi.

10. Yahova acitanji toera anthu alekererwe madawo awo kwenda na kwenda?

¹⁰ Yahova acitanji toera kulekerera madawo a anthu kwenda na kwenda? Iye acita masasanyiro toera Mwanace wakufunika ‘aperekwe kabodzi basi ninga ntsembe toera abuluse madawo a anthu azinji.’ (Aheb. 9:28) Yezu apereka “umaso wace ninga ciomboli toera kuombola anthu azinji.” (Mat. 20:28) Mphapo ciomboli ninji?

NTSEMBE YA YEZU YALIPA NTENGO

11. (a) Mwakubverana na Bhibhlya, ciomboli ninji? (b) Mbani wakuti mbadakwanisa kulipa ciomboli?

¹¹ Mwakubverana na Bhibhlya, ciomboli ndi ntengo udaperekwa toera Yahova alekerere madawo athu mbatikhala axamwali ace. Mphapo ndi ntengo upi wa ciomboli ukhafunika kuperekwa toera kukhala pontho na pinthu pidaluza Adhamu? Kumbukani kuti Adhamu na Eva aluza umaso waungwiro na cidikhiro cakukhala m’maso kwenda na kwenda. Na thangwi ineyi, ntengo wa ciomboli ukhafunika kukhala ubodzi ene na wa pire pidaluza iwo. (1 Tim. 2:6) Ntengo unoyu basi ene mbudaperekwa na munthu wankulu wakuti (1) ndi wakusowa madawo; (2) mbadakwanisa kukhala m’maso kwenda na kwenda pa dziko yapantsi; pontho (3) mbadakhala dzololo toera kupereka  umaso wace thangwi ya ife. Munjira ineyi, umaso wa munthu unoyu mbudakwanisa kulipa pidaluza Adhamu na Eva.

12. Thangwi yanji Yezu mbadakwanisa kulipa ntengo wa ciomboli?

¹² Thangwi yanji Yezu mbadakwanisa kulipa ciomboli? Onani mathangwi matatu: (1) Iye ndi waungwiro, pontho “nee acita madawo.” (1 Ped. 2:22) (2) Iye mbadakwanisa kukhala m’maso kwenda na kwenda pa dziko yapantsi. (3) Iye akhali dzololo toera kupereka umaso wace thangwi ya ife. (Aheb. 10:9, 10) Yezu akhali waungwiro ninga pikhali Adhamu mbadzati kudawa. (1 Akor. 15:45) Na thangwi ineyi, pidafa Yezu thangwi ya ife, iye akwanisa kulipa ntengo wa pire pidaluza Adhamu. (Aroma 5:19) Munjira ineyi, Yezu adzakhala “Adhamu wakumalisa.” Nee asafunikabve munthu unango waungwiro toera kulipa ntengo wa pinthu pidaluza Adhamu. Yezu afera anthu ‘kabodzi basi kwenda na kwenda.’—Aheb. 7:27; 10:12.

13. Kuphimbira madawo na ciomboli pyasiyana tani?

¹³ Kuphimbira madawo na ciomboli pyasiyana tani? Kuphimbira madawo ndi pinthu pinacita Mulungu toera tikwanise kukhala axamwali ace. Ciomboli ndi ntengo udalipwa toera madawo a anthu akwanise kuphimbirwa. Ntengo wa ciomboli usaimirirwa na ciropa ca Yezu cidabuluswa thangwi ya ife.—Aef. 1:7; Aheb. 9:14.

YAHOVA ATISUDZULA KU MADAWO NA KUFA MBATIONA NINGA AKULUNGAMA

14. Tinapfundzanji cincino?

¹⁴ Tisaphindula tani na pidacita Yahova kuna ife? Toera kutawira mbvundzo unoyu, tinapfundza mabvekero a mafala mawiri anaphatisirwa m’Bhibhlya akuti anatiphedza toera kubvesesa kuti tinaphindula tani na kulekerera kwa Yahova.

15-16. (a) Fala yakuti kusudzulwa isabvekanji m’Bhibhlya? (b) Tisapibva tani thangwi yakudziwa kuti tasudzulwa ku madawo na kufa?

¹⁵ Bhibhlya isalonga kuti thangwi ya ciomboli, ife tasudzulwa ku madawo. Pedhru alonga tenepa thangwi ya kusudzulwa kweneku: “Imwe musadziwa kuti mwaombolwa mu umaso wanu wakusowa basa udapaswa imwe na ambuyanu, mbwenye nee mwaombolwa na pinthu pyakuti pinakwanisa kufudzika, ninga ouro peno parata. Mbwenye imwe mwaombolwa na ciropa cakufunika kakamwe ca Kristu, cakuti ndi ninga ciropa ca mwanabira wakusowa cilema na wakusowa midonthi.”—1 Ped. 1:18, 19.

¹⁶ Thangwi ya ntsembe ya ciomboli, ife tinakwanisa kusudzulwa ku madawo na kufa kuphatanizambo nyatwa zonsene zinaoneka thangwi ya pinthu pyenepi. (Aroma 5:21) Mwakukhonda penula, ife tiri na mangawa makulu kakamwe na Yahova na Yezu thangwi yakutisudzula na ciropa peno umaso wa Yezu.—1 Akor. 15:22.

17-18. (a) Pisabvekanji kuoniwa ninga akulungama? (b) Pyenepi pisabvekanji kuna m’bodzi na m’bodzi wa ife?

¹⁷ Bhibhlya isalonga kuti atumiki a Yahova asaoniwa ninga akulungama. Pyenepi pisabveka kuti Yahova nee asakakamiza atumiki ace toera amulipe thangwi ya madawo anacita iwo. Mbwenye nee pisabveka kuti Yahova asapwaza mitemo yace yakulungama. Iye nee asationa ninga akulungama thangwi tathema kuoniwa munjira ineyi. Kusiyapo pyenepi, iye nee asapwaza madawo anacita ife. Mbwenye Yahova ali dzololo toera kumalisa mangawa athu thangwi yakukhulupira kwathu ntsembe yaciomboli idalipa Yezu.—Aroma 3:24; Agal. 2:16.

¹⁸ Pyenepi pisabvekanji kuna m’bodzi na m’bodzi wa ife? Ale adasankhulwa toera  kutonga pabodzi na Yezu kudzulu aoniwa ninga ana akulungama a Mulungu. (Tito 3:7; 1 Juw. 3:1) Iwo alekererwa madawo awo, pontho pisakhala ninga kuti cipo acita madawo. Natenepa, iwo atawiriswa toera kukhala mu Umambo wa Mulungu. (Aroma 8:1, 2, 30) Ale ali na cidikhiro cakukhala pa dziko yapantsi kwenda na kwenda aoniwa ninga axamwali akulungama a Mulungu, pontho asalekererwa madawo awo. (Tiya. 2:21-23) Mwinji ukulu unafuna kupulumuka pa Armajedhoni uli na mwai wakukhonda kufa. (Juw. 11:26) “Anthu akulungama” na “akukhonda kulungama” adafa ali na cidikhiro cakulamuswa muli akufa. (Mabasa 24:15; Juw. 5:28, 29) Mukupita kwa ndzidzi, atumiki a Yahova akubvera anafuna kudzakhala pa dziko yapantsi anadzakhala na “ufulu wa mbiri ya ana a Mulungu.” (Aroma 8:21) Tisatsandzaya kakamwe tinganyerezera ndzidzi unafuna kudzakhala ife ana aungwiro a Babathu, Yahova!

19. Pinthu pidaticitikira pyacinja tani? (Onanimbo bokosi yakuti “ Kulekerera Kwa Yahova.”)

¹⁹ Undimomwene ndi wakuti pidaticitikira ndi ninga pidacitikira m’phale adalongwa pa ndima yakutoma wakuti aluza pyonsene mbasiyirwa mangawa makulu akuti cipo mbadakwanisa kualipa. Mbwenye Yahova atiphedza. Pinthu pyacinja thangwi ya kuphimbirwa kwa madawo athu na kulipwa kwa ciomboli. Kukhulupira kwathu Yezu Kristu kusaticitisa kusudzulwa ku madawo na kufa. Ife tinakwanisambo kulekererwa madawo athu, pontho Yahova angacita pyenepi pisakhala ninga nee tikhadadawa. Kusiyapo pyenepi, cincino tinakwanisa kukhala na uxamwali na Babathu waufuni, Yahova.

20. Tinapfundzanji mu nsolo unatowera?

²⁰ Ife tisapereka takhuta kakamwe kuna Yahova na Yezu tinganyerezera pinthu pyonsene pidaticitira iwo. (2 Akor. 5:15) Mbatidasowa ciphedzo cawo, ife nee mbatidakhala na cidikhiro. Mphapo kulekerera kwa Yahova kusabvekanji kuna m’bodzi na m’bodzi wa ife? Mu nsolo unatowera tinapfundza pyenepi.