1. Ndi ntemo upi udapereka Yezu kuna anyakupfundzace? (Onani foto iri patsamba yakutoma.)

NAMASIKU Yezu mbadzati kufa, iye apereka ntemo kuna anyakupfundzace. Iye aapanga: “Ninga mudakufunani ine, imwembo mufunane unango na ndzace.” Buluka penepo iye athimiza: “Imwe mungafunana unango na ndzace, anthu onsene anadzindikira kuti ndimwe anyakupfundza anga.”​—Juwau 13:34, 35.

2. Thangwi yanji ndi pyakufunika kakamwe kufunana unango na ndzace?

² Yezu alonga kuti anyakupfundzace andimomwene mbadadziwika pakweca angapangiza ufuni ninga udapangiza iye. Undimomwene unoyu waoneka pakweca mu ndzidzi wa apostolo, pontho usaonekambo lero. Ndi thangwi yace ndi pyakufunika kakamwe kwa ife kufunana unango na ndzace maseze ndi pyakunentsa.

3. Tinapfundzanji mu nsolo uno?

³ Nakuti ndife akusowa ungwiro, pyenepi pisatipingiza toera kufunana kakamwe unango na ndzace. Ngakhale tenepo, tisafunika kuwangisira toera kutowezera Kristu. Mu nsolo uno, tinapfundza kuti ufuni unatiphedza tani toera kukhala anthu akukhazikisa ntendere, akusowa tsankhulo na akutambira alendo. Mu ndzidzi unapfundza imwe nsolo uno, bvundzikani: ‘Ndisapfundzanji na citsandzo ca abale na alongo akuti apitiriza kufunana unango na ndzace maseze athimbana na pinentso?’

4. Mwakubverana na Mateu 5:23, 24, thangwi yanji tisafunika kukhazikisa ntendere na m’bale wakuti atitsukwalisa?

⁴ Yezu atipfundzisa kufunika kwa kukhazikisa ntendere na  m’bale wakuti atitsukwalisa. (Lerini Mateu 5:23, 24.) Iye agomezera kuti khala tisafuna kukomeresa Mulungu, tisafunika kukhala pa ntendere na anango. Yahova asakomerwa tingacita pyonsene pinakwanisa ife toera kukhazikisa ntendere na abale athu. Iye nee anatawira ulambiri wathu tingakoya pinthu muntima mbatikhonda kukhazikisa ntendere.​—1 Juwau 4:20.

5. Ninji pikhapingiza Mark toera kukhazikisa ntendere?

⁵ Panango pinanentsa kwa ife kukhazikisa ntendere. Thangwi yanji? Onani pidacitika na Mark. * Iye aipirwa kakamwe thangwi m’bale unango ansumula, pontho amulonga mwakuipa kuna abale anango mu mpingo. Kodi Mark acitanji? Iye alonga: “Ndalonga mwaukali na mwakuipirwa kuna m’bale unoyu.” Mukupita kwa ndzidzi ndatsumbikika na pidacita ine, mbandiphemba kulekererwa kuna m’bale unoyu toera kukhazikisa ntendere. Mbwenye iye akhonda. Pakutoma ndanyerezera, ‘Nakuti iye nee asafuna tikhazikise ntendere, thangwi yanji ndisafunika kuwangisira kukhazikisa ntendere?’ Mbwenye Mark awangiswa na muyang’aniri wa cisa toera akhonde kubwerera nduli. Kodi Mark acitanji?

6. (a) Mark acitanji toera kukhazikisa ntendere? (b) Kodi iye aphatisira tani lemba ya Akolose 3:13, 14?

⁶ Pidanyerezera Mark pya makhaliro ace, aona kuti midzidzi inango asanyerezera kuti ndi wakufunika kakamwe kupiringana anango. Natenepa adzindikira kuti akhafunika kucinja makhaliro ace. (Akol. 3:8, 9, 12) Mwakucepeseka, iye aenda kuna m’bale unoyu mbaphemba pontho kulekererwa. Mark alemberembo matsamba m’bale unoyu, mbalonga kuti asaphemba kulekererwa na asafuna akhale pontho axamwali. Kusiyapo pyenepi, apereka muoni kuna iye mbanyerezera kuti mbadakomerwa nawo. Mwakutsukwalisa, m’bale unoyu apitiriza kukhala wakuipirwa. Ngakhale tenepo, Mark apitiriza kubvera ntemo wa Yezu mukufuna m’bale wace na kumulekerera. (Lerini Akolose 3:13, 14.) Maseze anthu anango akhonde kukhazikisa  ntendere, ife tisafunika kuafuna ninga pidacita Yezu, mbatipitiriza kualekerera na kuphembera thangwi ya iwo toera tikhazikise pontho ntendere.​—Mat. 18:21, 22; Agal. 6:9.

7. (a) Yezu atikulumiza toera kucitanji? (b) Ndi cinentso cipi cidathimbana na mulongo Lara?

⁷ Yezu atikulumiza toera kutsalakana anango ninga munafuna ife kutsalakanwa na iwo. Iye alongambo kuti nee tisafunika kufuna basi ene ale anatifuna. (Luka 6:31-33) Ndiye tani khala m’bale peno mulongo mu mpingo nee asakumwanyikani? Pyenepi nee pisacitika kazinji kene, mbwenye ndipyo pidacitikira mulongo Lara. Iye alonga: “Mulongo unango nee akhandimwanyika, pontho ine nee ndikhadziwa kuti thangwi yanji akhacita pyenepi. Natenepa ndatsukwala kakamwe, pontho nee ndikhakomerwa kuenda kumisonkhano.” Pakutoma, Lara anyerezera: ‘Ine nee ndacita cinthu cakuipa. Pontho anango mu mpingo akhaonambo kuti mulongo unoyu akhali na makhaliro akunentsa.’

8. Lara acitanji toera kukhazikisa ntendere, pontho pyenepi pisatipfundzisanji?

⁸ Kodi Lara acitanji toera kukhazikisa ntendere? Iye aphembera kuna Yahova, mbatonga toera kuenda kacedza na mulongo unoyu. Iwo acedza pya nkandzo ukhathimbana na iwo, akhumbatirana, mbakhazikisa ntendere. Pyonsene pikhaoneka ninga piri mwadidi. Lara alonga: “Mukupita kwa ndzidzi, mulongo unoyu atoma pontho kupangiza makhaliro ace akale. Pyenepi pyanditsukwalisa kakamwe.” Lara akhanyerezera kuti basi ene anakhala wakutsandzaya mulongo unoyu angacinja makhaliro ace. Mbwenye mukupita kwa ndzidzi, iye adzindikira kuti cinthu cakufunika kakamwe cakuti mbadacicita cikhali kupitiriza kutsalakana mulongo unoyu mwaufuni na “kumulekerera na ntima onsene.” (Aef. 4:32–5:2) Lara akumbuka kuti ufuni wa Akristu andimomwene “nkhabe kukoya pinthu pyakuipa muntima. Usaphimbira pinthu pyonsene, usakhulupira pinthu pyonsene, usadikhira pinthu pyonsene, usapirira pinthu pyonsene.” (1 Akor. 13:5, 7) Pyenepi pyaphedza Lara toera kukhala na ntendere wa m’manyerezero. Mukupita kwa ndzidzi, mulongo unoyu adzakhala xamwali wace. Mungakhazikisa ntendere na abale na alongo anu mbamupitiriza  kuafuna, munakhala na cinyindiro cakuti “Mulungu waufuni na wantendere anadzakhala na imwe.”​—2 Akor. 13:11.

9. Mwakubverana na Mabasa 10:34, 35, thangwi yanji tisafunika kukhala akusowa tsankhulo?

⁹ Yahova ndi wakusowa tsankhulo. (Lerini Mabasa 10:34, 35.) Natenepa tingakhala akusowa tsankhulo, tinapangiza kuti ndife anace. Ife tisabvera ntemo wakuti funa ndzako ninga iwe ene, pontho tisakhazikisa ntendere na abale na alongo athu.​—Aroma 12:9, 10; Tiya. 2:8, 9.

10-11. Kodi Ruth akunda tani mabvero akuipa akhali na iye?

¹⁰ Kukhala akusowa tsankhulo pisanentsa kuna anango. Mwacitsandzo, onani pidacitikira mulongo anacemerwa Ruth. Pikhali iye ntsikana, akhali na maonero akuphonyeka thangwi ya munthu anabuluka mu dziko inango. Kodi pyenepi pyankhuya tani? Ruth alonga: “Ine ndikhaida pinthu pyonsene pya dziko ineyi. Ndikhanyerezera kuti anthu onsene anabuluka mu dziko ineyi ali na makhaliro mabodzi ene, kuphatanizambo abale na alongo.” Kodi Ruth akunda tani mabvero anewa akuipa?

¹¹ Ruth awangisira kakamwe toera kumalisa mabvero anewa akuipa. Iye aleri mphangwa za dziko ineyi zinagumanika mu Anuário. Iye alonga: “Ndawangisira kakamwe toera kukhala na maonero adidi thangwi ya anthu a dziko ineyi. Ndatoma kuona kuti abale na alongo akhali aphinga m’basa ya Yahova. Pyenepi pyandiphedza kubvesesa kuti iwo asacitambo khundu ya abale na alongo athu pa dziko yonsene.” Mukupita kwa ndzidzi Ruth adzindikira kuti akhafunika kupangiza ufuni kuna anthu anewa. Iye alonga: “Mu ndzidzi ukhagumanikana ine na abale na alongo a dziko ineyi, ndikhawangisira kakamwe toera kucita uxamwali na iwo. Ndikhacedza na iwo toera kuadziwa mwadidi.” Mphapo pyenepi pyamphedza tani? Ruth alonga: “Mukupita kwa ndzidzi, mabvero akuipa akhali na ine adzamala.”

12. Ndi cinentso cipi cikhali na mulongo Sarah?

¹² Panango mwakukhonda dziwa, anthu anango anakwanisa kukhala na tsankhulo. Mwacitsandzo, Sarah akhanyerezera kuti ndi wakusowa tsankhulo thangwi iye nee akhasumula anthu thangwi ya ntundu wawo, mpfuma zawo peno mabasa ali na iwo mu gulu. Mbwenye iye alonga: “Ndatoma kudzindikira kuti ndikhali na tsankhulo.” Munjira ipi? Sarah pabodzi na anthu a pabanja pace apfundza ku universidhadhe, natenepa iye akhacedza basi ene na athu akuti apfundzambo ku universidhadhe. Ntsiku inango iye apanga xamwali wace: “Ine ndisacedza na abale na alongo adapfundza ku universidhadhe, tayu adakhonda kuenda ku universidhadhe.” Mwandimomwene, Sarah akhafunika kucinja makhaliro ace. Mphapo mbadacita tani pyenepi?

13. Tisapfundzanji na njira idacinja Sarah makhaliro ace?

¹³ Muyang’aniri wa cisa aphedza Sarah toera aone mwadidi makhaliro ace. Sarah alonga: “Iye andisimba thangwi yakukhulupirika kwanga m’basa ya Yahova, matawiro asapereka ine pa misonkhano na kudziwa kwanga Malemba. Buluka penepo iye alonga kuti mu ndzidzi unathimizirika cidziwiso cathu, tisafunikambo kukulisa makhaliro Acikristu ninga kucepeseka, kupfulika na ntsisi.” Sarah aphatisira uphungu udapaswa iye na muyang’aniri wa cisa. Iye alonga: “Ndadzindikira kuti cinthu cakufunika kakamwe ndi kukhala wakukoma ntima na waufuni.” Natenepa iye atoma kukhala na maonero adidi thangwi ya abale na alongo. Sarah alonga: “Ndayesera kuona makhaliro awo adidi anaacitisa kukhala akutawirika kwa Yahova.” Tisapfundzanji? Nee tisafunika kunyerezera kuti ndife akufunika kakamwe kupiringana anango thangwi tapfundza kakamwe. Ife tingafuna  kakamwe “nsoka onsene wa abale” tinacalira makhaliro akusankhulana.​—1 Ped. 2:17.

14. Mwakubverana na Ahebheri 13:16, ndi mabvero api asakhala na Yahova tingatambira alendo?

¹⁴ Yahova asakomerwa kakamwe tingakhala akutambira alendo. (Lerini Ahebheri 13:16.) Iye asaona kuti pyenepi pisacita khundu ya ulambiri wathu, makamaka tingaphedza ale akuti asafuna ciphedzo. (Tiya. 1:27; 2:14-17) Natenepa, Bhibhlya isatikulumiza toera tikhale “na nsambo wakutambira alendo.” (Aroma 12:13) Tingatambira alendo, tinapangiza anango kuti mwandimomwene tisaatsalakana, tisaafuna, pontho tisafuna kukhala axamwali awo. Yahova asakomerwa kakamwe tingacemera anango toera kudya nawo pabodzi, kucedza nawo na kupangiza ufuni kuna iwo. (1 Ped. 4:8-10) Mbwenye midzidzi inango pisanentsa toera kukhala akutambira alendo.

15-16. (a) Thangwi yanji anango asanyinyirika kutambira alendo? (b) Ninji pidaphedza Edit toera kukhala wakutambira alendo?

¹⁵ Panango tinanyinyirika kutambira alendo thangwi ya makhaliro athu. Onani citsandzo ca nzice anacemerwa Edit. Mbadzati kukhala m’bodzi wa Mboni za Yahova, nee akhacedza kazinji kene na anango. Edit akhanyerezera kuti anango athema kakamwe kutambira alendo thangwi ali na pinthu pizinji.

¹⁶ Pidakhala iye m’bodzi wa Mboni za Yahova, Edit acinja manyerezero ace. Iye atoma kukhala wakutambira alendo. Iye alonga: “Mu ndzidzi ukhamangwa Nyumba yathu ya Umambo, nkulu wa mpingo andipanga pya banja ibodzi ikhabwera kudzaphedzera basa ineyi yakumanga, pontho andiphemba khala pinakwanisika kuti iwo akhale masumana mawiri kunyumba kwanga. Ndakumbuka nkhombo zidapaswa nzice wa ku Sarefati na Yahova. (1 Ama. 17:12-16) Edit atawira kutambira banja ineyi. Ndi nkhombo zipi zidakhala na iye? Iye alonga: “Ndatsandzaya kakamwe thangwi iwo nee akhala na ine basi masumana mawiri, mbwenye miyezi miwiri. Mu ndzidzi unoyu, ife takhala axamwali a ponda ndipondembo.” Edit akhalambo na axamwali anango mu mpingo. Cincino iye asatumikira ninga mpainiya, pontho asacemera abale  na alongo anabuluka na iye mu utumiki toera kadya kunyumba kwace. Iye alonga: “Kupasa kusanditsandzayisa kakamwe! Pontho ndisakhala na nkhombo zizinji ndingacita pyenepi.”​—Aheb. 13:1, 2.

17. Luka na nkazace adzindikiranji thangwi yakutambira alendo?

¹⁷ Maseze tisatambira alendo, ife tinakwanisa kukulisa n’khaliro unoyu. Mwacitsandzo, Luka na nkazace asatambira alendo. Mbwenye iwo akhali na nsambo wakucemera acibale awo, axamwali awo na muyang’aniri wa cisa na nkazace. Natenepa Luka alonga: “Ife tadzindikira kuti tikhacemera basi ene ale anadziwana na ife.” Kodi Luka na nkazace akulisa tani n’khaliro wakutambira alendo?

18. Luka na nkazace akulisa tani n’khaliro wakutambira alendo?

¹⁸ Luka na nkazace acinja manyerezero awo pidamala iwo kunyerezera mwadidi mafala a Yezu akuti: “Kodi imwe mungafuna ale anakufunani, ndi nkhombo zipi zinafuna kutambira imwe?” (Mat. 5:45-47) Iwo adzindikira kuti akhafunika kutowezera Yahova wakuti asapasa mwakudzala manja kuna anthu onsene. Natenepa iwo atoma kucemera abale na alongo kunyumba kwawo akuti nee akhaacemera kale. Luka alonga: “Tonsene tisatsandzaya kakamwe m’midzidzi ineyi inakhala ife pabodzi. Pyenepi pisaticitisa kukhala cifupi unango na ndzace, pontho na Yahova.”

19. Tinapangiza tani kuti ndife anyakupfundza a Yezu, pontho muli wakutonga kucitanji?

¹⁹ Tinganyerezera kufunika kwa kufunana kakamwe unango na ndzace, pinatiphedza toera kukhala akukhazikisa ntendere, akusowa tsankhulo na akutambira alendo. Tisafunika kukunda mabvero onsene akuipa, mbatifuna kakamwe abale na alongo athu. Tingacita pyenepi, tinakhala akutsandzaya, pontho tinapangiza kuti mwandimomwene ndife anyakupfundza a Yezu.​—Juwau 13:17, 35.