Na yâ ti mbeni fango ye ti Jésus na ndö ti hoto so azo ahinga ni mingi, lo tene: “Ye kue so ala ye azo asara na ala, ala sara ni na azo ni nga.” (Matthieu 7:12; Luc 6:31). Mbeni Bible akiri nga peko ti tënë so tongaso: “Ye so kue ala ye ti tene azo asara ni na ala, ayeke nzoni ala wani asara nga aye ni na azo.”—Buku ti Nzapa, Fini Mbuki, 1995.

•  Nda ti tënë so aye ti tene nyen?

•  Ngbanga nyen la sarango ye alingbi na ni ayeke ga na aye ti nzoni?

•  Eskê aye gï ti sara tënë ti senge mungo ye na zo nga ti wara ye na pekoni?

•  Tongana nyen la mo lingbi ti sara ye alingbi na tënë so?

 Tënë ti Jésus so a-encouragé e ti sara ye na azo tongana ti so e ye ti tene ala sara na e. Na tapande, mingi ti azo aye ti tene a sara ye na ala na nengo zo, nzoni bê nga na ndoye. Tongaso, a lingbi e “sara tongaso” nga na azo ni.—Luc 6:31.

 E lingbi ti wara aye ti nzoni na sarango ye alingbi na ni na yâ ti aye kue. Na tapande, a peut ti . . .

•   Kpengba songo ti mariage.—aÉphésien 5:28, 33.

•   Aidé ababâ na amama ti fa ye na amolenge ti ala.—aÉphésien 6:4.

•   Aidé mo ti duti na nzoni songo na akamarade ti mo, avoizin nga na amba ti mo ti place ti kua.—aProverbe 3:27, 28; aColossien 3:13.

 Tënë ti Jésus so ayeke même mama-ndia so e wara ni mingi na mbage ti Mbeti ti Nzapa so azo mingi airi ni Ancien Testament. Tënë ti Jésus so “ayeke ye so Ndia [akozo buku oku ti Bible] na ambeti ti aProphète [abuku ti prophétie] aye ti tene la.” (Matthieu 7:12). So ti tene, tënë ti Jésus so aluti na ndö ti mama-ndia so ayeke na Ancien Testament: ndoye mba ti mo.—aRomain 13:8-10.

 Ên-ën. Tënë ti Jésus so andu kozoni kue tënë ti mungo ye na zo sân ti ku mbeni ye na pekoni. Na temps so Jésus asara lani tënë so, lo sara gï pëpe tënë ti sarango ye na mbage ti ambeni zo, me nga na awato ti e (Luc 6:27-31, 35). Tongaso, tënë ti Jésus so a-encouragé e ti sara nzoni na azo kue.

1.  1. Duti zo so abâ ye nzoni. Gi ti hinga ye nzoni na ndö ti azo so angoro mo. Na tapande, eskê mo bâ so ayeke ngangu na mbeni zo ti yô akungba so lo vo? Eskê mo mä so a gbanzi mbeni voizin ti mo na hôpital? Wala mo bâ so mbeni mba ti mo ti place ti kua adécouragé? Tongana mo ‘zia lê ti mo . . . na ndö ti aye ti amba ti mo’, peut-être mo yeke gi alege ti kpengba ala wala ti sara mbeni ye ti aidé ala.—aPhilippien 2:4.

2.  2. Duti zo so abâ mawa ti zo. Tara ti zia terê ti mo na place ti azo. Tongana mo yeke na yâ ti même situation ti ala, a yeke sara mo tongana nyen? (aRomain 12:15). Tongana mo tara ti comprendre sentiment ti amba ti mo ayeke pusu mo ti aidé ala.

3.  3. Duti zo so asara ye ahon ndö ni ape. Girisa ape so azo ayeke nde nde. Ye so azo aye ti tene a sara na ala apeut ti duti nde na ye so mo ye ti tene a sara na mo. Tongaso, na yâ ti aye mingi so mo peut ti sara ndali ti ala, soro ti sara aye so anzere na ala.—1 aCorinthien 10:24.