Bible wani afa aye so mo peut ti sara. Atâa mo yeke mara ti zo wa, atënë ti Nzapa so ayeke na yâ ti Bible “ahon ngangu ti mo pëpe, a yeke yongoro na mo pëpe.”​—Deutéronome 30:11.

Aye so mo peut ti sara ti tene mo mä yâ ti Bible

1.   Duti na nzoni bango ndo. Yeda so Bible ayeke tënë ti Nzapa. Sara terê ti mo kete, teti Nzapa ake azo ti baba (1 aThessalonicien 2:13; Jacques 4:6).Me, tongana mo diko mbeni ye wala mo mä mbeni ye, ye gï da tongaso na ni sân ti gi ndani ape; Nzapa aye si mo sara kua na “hingango ndo ti [mo].”​—aRomain 12:1, 2.

2.   Sambela ti wara ndara. Na aProverbe 3:5, Bible atene: “Zia bê ti mo pëpe na ndö ti hingango ndo ti mo wani.” Tongaso, “ngbâ ti hunda na Nzapa” ti mü na mo ndara ti mä yâ ti Bible.​—Jacques 1:5.

3.   Manda ni lakue. Tongana mo manda Bible lakue lakue mo yeke wara aye ti nzoni dä mingi ahon ti so mo peut ti wara tongana mo manda ni hio hio ape.​—Josué 1:8.

4.   Manda ye ni na ndö ti mbeni mbilimbili li ti tënë. Ti manda ye na ndö ti ye so Bible atene na ndö ti mbeni mbilimbili li ti tënë ayeke mbeni nzoni lege ti hinga afango ye ti Bible. Tonda ni na “akozo fango ye,” na pekoni gue na ati so ayeke ti “abiazo.” (aHébreu 6:1, 2). Mo yeke bâ ande so mo lingbi ti haka mbeni versê ti Bible na mbeni versê ni nde, nga mo yeke bâ so ambeni versê ti Bible ayeke fa nda ti ambeni versê ni, même aversê so “a yeke ngangu ti mä yâ ni.”​—2 Pierre 3:16.

5.   Hunda na ambeni zo ti aidé mo. Bible awa e ti yeda na mungo maboko ti ambeni zo so amä yâ ti Bible (Kusala 8:30, 31). A-Témoin ti Jéhovah ayeke manda Bible na azo senge senge. Tongana ti akozo Chrétien, ala yeke sara kua na Bible ti mû maboko na azo ti hinga ye so Bible afa biani.​—Kusala 17:2, 3.

Aye so mo bezoin ni ape

1.   Ti hinga mbeti mingi. Abazengele ti Jésus 12 amä lani yâ ti Bible na ala fa ni na ambeni zo, atâa so azo abâ so ala yeke “azo so amanda mbeti pëpe na ala yeke asenge zo.”​—Kusala 4:13.

2.   Nginza. Mo lingbi ti manda afango ye ti Bible sân ti futa ye. Jésus atëne lani na adisciple ti lo atene: “Ala wara ye senge senge, ala mû ni na azo senge senge.”​—Matthieu 10:8.