Imaginé mbeni mama so aye kete molenge ti lo ti koli ayeke leke lo ti gue na ekole. Lo sara kue ti sukula lo nga ti yü na lo abongo so ayeke nzoni nga ayeke saleté ape. So lo sara tongaso ayeke bata seni ti molenge ni nga ayeke fa na azo so babâ na mama ti lo ayeke bâ lege ti lo. Legeoko nga, Babâ ti e so aye e, Jéhovah, aye ti tene e duti saleté ape, e pensé na asioni ye ape, e tene asioni tënë ape nga e sara ye na lege ni. Tongana e duti saleté ape, e yeke bâ nzoni dä nga e yeke mû gonda na lo.

1. Tongana nyen la e lingbi ti duti propre?

Jéhovah atene na e, atene: “A yeke nzoni ala ga nzoni-kue.” (1 Pierre 1:16). Ti duti nzoni-kue, a lingbi e duti propre, e pensé na asioni ye ape, e tene asioni tënë ape nga e sara ye na lege ni. E lingbi ti duti propre tongana lakue e sukula ngu nga e sara kue ti tene abongo ti e, ndo ti e, nga na oto ti e aduti nzoni nga na saleté ape. E lingbi nga ti mû maboko ti tene Da ti Royaume ti e aduti saleté ape. Tongana e yeke lakue propre, e yeke mû gonda na Jéhovah.—2 aCorinthien 6:3, 4.

2. Ti duti propre, a lingbi e kpe asioni sarango ye wa?

Bible awa e ti “sukula terê ti e wani ti zi aye kue so asara si terê na bibe aga sioni”. (2 aCorinthien 7:1). Tongaso, e yeke sara kue ti kpe aye so ayeke buba terê ti e nga na bibe ti e. Apensé ti e adoit ti nzere na Jéhovah, tongaso e yeke sara kue ti ke asioni pensé (Psaume 104:34). E yeke gi nga ti tene anzoni tënë.—Diko aColossien 3:8.

Ambeni ye wa la apeut ti sara si e duti saleté wala e ga sioni? Ambeni ye apeut ti buba terê ti e. Tongaso, e yeke kpe aye tongana manga nga na adrogue. Tongana e sara tongaso, e yeke duti na nzoni seni nga e yeke fa so e ne fini so e yeke na ni, so ayeke mbeni cadeau. E yeke sara nga kue ti ga sioni ape na lege so e yeke sara ngia pëpe na terê ti e ti koli wala ti wali nga e yeke bâ porno ape (Psaume 119:37; aÉphésien 5:5). A lingbi ti duti ngangu ti zia lege ti asarango ye so, me Jéhovah apeut ti aidé e ti zia ni.—Diko Ésaïe 41:13.

 GI TI HINGA AYE MINGI

3. Ti duti propre ayeke mû gonda na Jéhovah

Tongana e diko andia so Jéhovah amû na azo ti Israël ti ândö, e lingbi ti hinga bango ndo ti lo na ndö ti dutingo saleté ape. Diko Exode 19:10 nga na 30:17-19, na pekoni kiri tënë na ahunda so:

• Aversê so afa nyen na ndö ti bango ndo ti Jéhovah na ndö ti dutingo saleté ape?

• Aye wa la mo peut ti sara lakue ti duti propre?

Ti duti propre ahunda ngoi nga ahunda ti sara effort. Me e lingbi ti sara ni atâa ndo wa la e yeke dä, e yeke zo ti mosoro wala wayere. Zia VIDÉO ni, na pekoni kiri tënë na hunda so:

• Ngbanga ti nyen la azo so e yeke fa tënë na ala ayeke ne Jéhovah mingi tongana ala bâ so aye ti e ayeke propre?

4. Zia lege ti asioni sarango ye

Tongana mo yeke nyon manga wala adrogue gï ti tene terê ti mo anzere, mo peut ti bâ so a yeke ngangu ti tene mo zia lege ni. Nyen la apeut ti aidé mo? Gbu li na ndö ti aye so manga wala drogue ayeke sara na mo. Diko Matthieu 22:37-39, na pekoni sara lisoro na ndö ti ye so manga wala sarango kua kirikiri na adrogue alingbi ti sara na ndö ti . . .

• songo ti mbeni zo na Jéhovah.

• azo ti sewa ti mbeni zo nga na azo so ayeke na terê ti lo.

Leke mbeni ye so ayeke aidé mo ti zia lege ti mbeni sioni sarango ye. a Zia VIDÉO ni.

Diko aPhilippien 4:13, na pekoni kiri tënë na hunda so.

• Tongana lakue mbeni zo asambela, lo manda Bible nga lo gue na bungbi, tongana nyen la a yeke mû na lo ngangu ti zia lege ti mbeni sioni sarango ye?

 5. Tiri na asioni pensé nga na asioni sarango ye

Diko aColossien 3:5, na pekoni kiri tënë na ahunda so:

• E hinga tongana nyen so bango porno, tokuango amessage na ndö ti bungbingo koli na wali nga sarango ngia na terê ti zo ti koli wala ti wali ayeke sioni na lê ti Jéhovah?

• Eskê mo pensé so a yeke na lege ni so Jéhovah ahunda na e ti pensé na asioni ye ape, ti tene asioni tënë ape nga ti sara asioni ye ape? Ngbanga ti nyen?

Gi ti hinga tongana nyen la mo peut ti tiri na asioni pensé. Zia vidéo ni.

Jésus asara kua lani na mbeni toli ti fa na e so a yeke nzoni e leke na bê ti e ti ngbâ ti sara ye so e doit ti sara ti ga sioni ape. Diko Matthieu 5:29, 30, na pekoni kiri tënë na hunda so:

• Jésus ayeke tene lani na e ti sara sioni na terê ti e ape, me lo ye ti tene so e doit ti sara mbeni ye. Aye wa la mbeni zo apeut ti sara ti wara asioni pensé ape? b

Tongana mo yeke tiri ti hon ndö ti asioni pensé, Jéhovah abâ effort so mo sara na nene ni. Diko Psaume 103:13, 14, na pekoni kiri tënë na hunda so:

• Tongana mo yeke tiri ti hon ndö ti mbeni sioni sarango ye, tongana nyen la versê so akpengba mo ti ngbâ ti tiri?

 NA NDURU TËNË

Tongana e bata terê ti e propre, e pensé na asioni ye ape nga e sara ye na lege ni, e yeke zia ngia na bê ti Jéhovah.

Dango bê

• Ngbanga ti nyen la a yeke kota ye mingi ti duti saleté ape?

• Nyen la mo peut ti sara ti duti propre?

• Tongana nyen la mo peut ti ngbâ ti pensé na asioni ye ape nga ti sara ye na lege ni?