Nzapa aye si azo aduti na ngia na ndo ti sese. Lo leke sese nga na aye kue so ayeke na ndo ni teti so lo ye azo. Na yâ ti ngoi kete lo yeke sara si kekereke ti azo na ndo ti sese kue aga nzoni. Lo yeke zi aye so asara si azo ayeke bâ pasi.​—Diko Jérémie 29:11.

Mbeni ngorogbia ti azo so awara lege ti zi sarango ngangu, kobela wala kuâ ayeke pëpe. Me mbeni nzoni tënë ayeke dä. Na yâ ti ngoi kete, Nzapa ayeke zi angorogbia ti azo ti zia ti lo na place ni. Azo so ayeke na gbe ti ngorogbia ni ayeke duti ande na siriri nga na nzoni seni.​—Diko Ésaïe 25:8; 33:24; Daniel 2:44.

Pasi ayeke hunzi ande gi na ngoi so Nzapa azi asioni zo kue na ndo ti sese (Sophonie 2:3). Ye so ayeke si ande lawa? Asioni ye so ayeke si na azo laso so, Bible asara tënë ni kozo awe. Aye ti sioni so ayeke si na ndo ti sese afa so ngoi ti tene Nzapa asara mbeni ye aga nduru awe.​—Diko 2 Timothée 3:1-5.

A yeke nzoni e manda ye na ndo ti Nzapa na yâ ti Bible. A yeke tongana mbeni lettre so mbeni babâ so aye e mingi si atokua na e. A fa na e tongana nyen ti duti na fini so ayeke nzoni laso nga a fa na e tongana nyen ti wara fini ti lakue lakue na ndo ti sese ande. Biani, peut-être ambeni zo ayeke dä so aye pëpe si mo manda Bible. Me zia si nzoni gigi ti kekereke ahon mo pëpe.​—Diko aProverbe 29:25; Apocalypse 14:6, 7.