Na yâ ti ambeni semaine so ayeke ga, a yeke sara ande a-élection na yâ ti mingi ti akodro na yâ ti dunia. Azo ayeke mû akota desizion nga ala yeke soro zo so ala ye ti voté lo.

 Bible atene nyen na ndö ni?

 Bible afa so azo kue so ayeke komande ayeke na alimite.

•   “Zia bê ti mo na ndö ti amokonzi wala na ndö ti mbeni molenge ti zo pëpe, so lo lingbi ti sö zo pëpe. Pupu ti lo asigi, na lo kiri na sese; na lango ni so, apensé ti lo akui.”—Psaume 146:3, 4, kete tënë na gbe ni.

 Même azo so akomande so ayeke nzoni mingi ayeke kui. Na ndö ni, ala peut ti sara ape si azo so ayeke ga na peko ti ala acontinué ti sara anzoni kua so ala sara ni.—Zo-ti-fa-tene 2:18, 19.

 Ti vrai ni, Bible afa so a leke lani azo ti tene ala komande terê ti ala wani lâ oko ape.

•   “Zo so ayeke tambela, a yeke même na lo wani ti fa lege na gere ti lo pëpe.”—Jérémie 10:23.

 Eskê mbeni nzoni gbia ayeke laso dä?

 Bible afa so Nzapa asoro mbeni gbia so alingbi kue nga so zo apeut ti sara confiance na lo, so ayeke Jésus Christ (Psaume 2:6). Jésus ayeke Gbia ti Royaume ti Nzapa, mbeni gouvernement so akomande depuis na yayu.—Matthieu 6:10.

 Eskê mo yeke soro Jésus ti duti gbia ti mo? Bible afa ndani so question so ayeke kota ye:

•   “Ala ne molenge ni [Jésus Christ], tongaso pëpe Nzapa ayeke sara ngonzo, na ala yeke kui na lege, ndali ti so ngonzo ti lo ayeke londo hio. Ngia ayeke na azo kue so akpe na mbage ti lo ti bata terê ti ala.”—Psaume 2:12.

 A yeke fadeso la ngoi ti tene mo mû desizion. Aprophétie ti Bible afa so Jésus akomanse ti komande na ngu 1914, nga so na yâ ti kete ngoi Royaume ti Nzapa ayeke mû ande place ti agouvernement ti azo kue.—Daniel 2:44.

 Ti hinga ye mingi na ndö ti tongana nyen la mo lingbi ti soutenir komandema ti Jésus, diko article “Soro ti mû mbage ti Royaume ti Nzapa laso!”