1 Samuel 31:1-13
-
Tënë ti kuâ ti Saül na ti amolenge ti lo ti koli ota (1-13)
31 A-Philistin asara bira na azo ti Israël,+ na azo ti Israël akpe na devant ti aPhilistin. Gbâ ti azo ti Israël akui na ndö ti Hoto ti Guilboa.+
2 A-Philistin ayeke tomba Saül na amolenge ti lo, na ala yeke ga gï nduru nduru na ala. Ala fâ Jonathan,+ Abinadab na Malki-Shua, amolenge ti Saül.+
3 Bira ni aga tâ ngangu na Saül; azo ti pikango kokora apika lo na alê ti kokora ti ala na lo wara kä ngangu mingi.+
4 Tongaso, Saül atene na zo ti yongo aye ti bira ti lo: “Gboto épée ti mo, mo kpo mbi na ni si azo so afâ ganza pëpe so+ aga akpo yâ ti mbi na épée pëpe nga ala sara pasi* na mbi pëpe.” Me zo ti yongo aye ti bira ti lo ni aye pëpe, ndali ti so mbeto asara lo ngangu. Ni la Saül agboto épée ti lo, lo tï na lê ni.+
5 Tongana zo ti yongo aye ti bira ti Saül abâ so lo kui awe,+ lo nga kue lo tï na lê ti épée ti lo, lo kui.
6 Tongaso Saül, amolenge ti lo ota, zo ti yongo aye ti bira ti lo nga na azo ti lo kue akui na lango ni so.+
7 Tongana azo ti Israël so ayeke na ando so ayeke na terê ti popo-hoto* nga na terê ti Ngu ti Jourdain abâ so aturugu ti Israël akpe nga so Saül na amolenge ti lo akui, ala komanse ti zia agbata ni ti kpe.+ A-Philistin aga amû agbata ni na peko ti ala na ala sara kodro dä.
8 Na ndade ni, tongana aPhilistin aga ti mû aye ti azo so ala fâ ala so, ala wara kuâ ti Saül na ti amolenge ti lo ota na ndö ti Hoto ti Guilboa.+
9 Ala fâ li ti Saül, ala zi aye ti bira so lo yü na terê ti lo nga ala tokua azo na yâ ti akodro kue ti aPhilistin ti fa tënë ni+ na yâ ti ada* ti ayanda ti ala+ nga ti fa tënë ni na popo ti azo.
10 Ala zia aye ti bira ti Saül ni na yâ ti da ti astatue ti Ashtoreth nga ala kanga kuâ ti lo na terê ti gbagba ti Beth-Shan.+
11 Gï so azo ti Jabesh-Galaad+ amä tënë ti ye so aPhilistin asara na Saül,
12 angangu turugu ni kue alondo ala tambela na bï ni kue, ala gue ala mû kuâ ti Saül na ti amolenge ti lo so ayeke na terê ti gbagba ti Beth-Shan, ala kiri na ni na Jabesh si ala gbi ni kâ.
13 Na pekoni, ala mû abio ti ala,+ ala lu ni na gbe ti keke ti tamaris na Jabesh,+ nga ala mû jeûne lango mbasambala.
