1 Samuel 5:1-12
5 Na peko ti so aPhilistin amû Sanduku+ ti tâ Nzapa, ala mû ni na Ében-Ézer, ala gue na ni na Ashdod.
2 A-Philistin amû Sanduku ti tâ Nzapa, ala gue na ni na yâ ti da* ti nzapa ti ala Dagon; ala zia ni na terê ti Dagon.+
3 Na ndade ni, tongana azo ti Ashdod alondo hio na ndapre, ala bâ so Dagon atï na gbele Sanduku ti Jéhovah, lê ti lo na sese.+ Tongaso, ala mû Dagon na nduzu, ala kiri na lo na place ti lo.+
4 Na ndade ni encore, tongana ala londo hio na ndapre, ala bâ so Dagon atï na gbele Sanduku ti Jéhovah, lê ti lo na sese. Li ti Dagon nga yâ ti maboko ti lo use kue afâ atï tâ na yanga ti porte ti da ni. Gï terê ti lo ni so akpa susu* la afâ pëpe.
5 Ndani la juska laso, aprêtre ti Dagon nga na azo kue so alï na da ti Dagon ayeke yô gere ti ala na nduzu, si ala dö pëpe ndo so ayeke tâ gï na yanga ti porte ti da ti Dagon so ayeke na Ashdod.
6 Jéhovah asara ye ti ngangu na azo ti Ashdod, na lo sara si mbeto ahon ndö ti azo ti gbata ti Ashdod nga na tanga ti akodro ni na lege so lo pika ala na hémorroïde.+
7 Tongana azo ti Ashdod abâ ye so asi, ala tene: “Zia Sanduku ti Nzapa ti Israël angbâ na e ge pëpe, ndali ti so lo sara ye ti ngangu mingi na e nga na nzapa ti e Dagon.”
8 Tongaso, ala tokua ndo, na aseigneur ti aPhilistin kue abungbi, na pekoni ala hunda agbia ni, ala tene: “A yeke nzoni e sara nyen na Sanduku ti Nzapa ti Israël?” Ala tene: “Zia a gue na Sanduku ti Nzapa ti Israël na Gath.”+ Tongaso, ala gue na Sanduku ti Nzapa ti Israël kâ.
9 Na peko ti so ala gue na ni kâ, Jéhovah asara ye ti ngangu mingi na azo ti gbata ni, na mbeto ahon ndö ti azo ni. Lo sara si hémorroïde asara azo ti gbata ni, akete zo na akota zo.+
10 Tongaso, ala tokua Sanduku ti tâ Nzapa na Écron,+ me gï so Sanduku ti tâ Nzapa asi na Écron, azo ti Écron adekongo, atene: “A ga na Sanduku ti Nzapa ti Israël na e ge ti sara si e na azo ti e, e kui!”+
11 Ala tokua ndo, na ala bungbi aseigneur ti aPhilistin kue, ala tene: “Ala mû Sanduku ti Nzapa ti Israël ala hon na ni; zia a kiri na ni na place ni, si e na azo ti e, e kui pëpe.” Mbeto ti kuâ amû ndo na yâ ti gbata ni kue. Tâ Nzapa asara ye ti ngangu mingi na azo ni kâ;+
12 azo so akui pëpe, hémorroïde asara ala. Toto ti azo ti gbata ni ti tene a mû na ala maboko ague ngbii asi na yayu.
