2 Chronique 17:1-19
17 Molenge ti lo Josaphat+ aga gbia na peko ti lo, na lo sara si komandema ti lo aluti nzoni na ndö ti Israël.
2 Lo zia aturugu na yâ ti agbata ti Juda kue so ngangu gbagba ayeke na terê ni. Lo zia nga ambeni na sese ti Juda nga na yâ ti agbata ti Éphraïm so babâ ti lo Asa atiri bira si amû ni lani.+
3 Jéhovah ayeke lakue na Josaphat ndali ti so Josaphat asara ye tongana ti so kotara ti lo David+ asara lani nga lo gi peko ti aBaal pëpe.
4 Lo gi ti hinga Nzapa ti babâ ti lo,+ na lo bata* acommandement ti lo; lo sara ye tongana ti agbia ti Israël pëpe.+
5 Jéhovah asara si komandema ti lo angbâ ti luti nzoni.+ Azo ti Juda kue ayeke ga lakue na amatabisi na Josaphat, ye so asara si lo yeke lani na mosoro nga na gloire mingi.+
6 Lo luti nganganga na ndö ti ye so Jéhovah ahunda ti tene zo asara, na lo zi même na sese ti Juda ando so ayeke na nduzu+ nga na ayongoro yanda.*+
7 Na ota ngu ti komandema ti lo, lo tokua ndo ti iri amokonzi ti lo ti tene ala gue afa ye na azo na yâ ti agbata ti Juda. A yeke Ben-Haïl, Abdias, Zacharie, Néthanel na Micaïah.
8 Azo ti mara ti Lévi nga ayeke na terê ti ala. A yeke Shémaïah, Néthaniah, Zébadiah, Asahel, Shémiramoth, Jéhonathan, Adonijah, Tobijah, Tob-Adonijah nga na prêtre Élishama na prêtre Joram.+
9 Ala komanse ti fa ye na sese ti Juda. Ala mû mbeti ti Ndia ti Jéhovah+ ala gue na ni, ala tambela na yâ ti agbata ti Juda kue, ala fa ye na azo ni.
10 Mbeto ti Jéhovah ahon ndö ti agbia ti akodro kue so angoro sese ti Juda, na ala sara bira na Josaphat pëpe.
11 A-Philistin amû na Josaphat amatabisi nga na nginza so ala doit ti futa ni tongana impôt. Azo ti kodro ti Arabie amû akoli-taba 7 700 nga na akoli-ngasa 7 700 na popo ti anyama ti ala, ala ga na ni na lo.
12 Josaphat angbâ gï ti ga kota,+ nga lo ngbâ ti leke na sese ti Juda ando so angangu gbagba ayeke na terê ni+ nga na agbata so a yeke bata aye dä.+
13 Lo leke gbâ ti aye na yâ ti agbata ti Juda, na lo zia angangu turugu na yâ ti Jérusalem.
14 A zia ala na yâ ti abungbi nde nde alingbi na akotara ti ala: ti mara ti Juda, lo zia amokonzi ti azo saki oko saki oko. Adnah la ayeke mokonzi ni, na angangu turugu 300 000 ayeke na terê ti lo.+
15 Na gbe ti Adnah, a yeke wara mokonzi Jéhohanan, nga na angangu turugu 280 000 so ayeke na terê ti lo.
16 Na gbe ti lo, a yeke wara nga Amasiah molenge ti Zicri, so lo wani lo mû terê ti lo ti sara kua ti Jéhovah. Angangu turugu 200 000 ayeke na terê ti lo.
17 Ti mara ti Benjamin,+ lo zia Éliada so ayeke mbeni ngangu zo ti bira tongana mokonzi, na angangu turugu 200 000 so ayeke na akokora nga na avala+ ayeke na terê ti lo.
18 Na gbe ti lo, a yeke wara Jéhozabad, nga na angangu turugu 180 000 so ayü aye ti bira so ayeke na terê ti lo.
19 Azo so nga na ala so gbia azia ala na sese ti Juda kue na yâ ti agbata so ngangu gbagba ayeke na terê ni la ayeke sara kua na gbia.+
