Josué 24:1-33
-
Josué akiri na ndö ti mbaï ti Israël (1-13)
-
Lo wa azo ni ti sara na Jéhovah (14-24)
-
“Ti mbi nga na azo ti da ti mbi, e yeke voro ti e gï Jéhovah” (15)
-
-
Mbele so Josué ate na azo ti Israël (25-28)
-
Tënë ti kuâ ti Josué nga na lungo lo (29-31)
-
A lu abio ti Joseph na Sichem (32)
-
Tënë ti kuâ ti Éléazar nga na lungo lo (33)
24 Josué abungbi azo kue ti amara ti Israël, na Sichem, lo iri a-ancien ni, amokonzi ni, ajuge ni nga na akota zo ti kodro ni,+ ala luti na gbele tâ Nzapa.
2 Josué atene na azo ni kue, atene: “Jéhovah Nzapa ti Israël atene: ‘A ninga awe+ si akotara ti ala,+ so na popo ti ala a yeke wara Térah, babâ ti Abraham na ti Nahor, asara kodro ândö na mbage ti Ngu* na ala yeke voro lani ambeni nzapa nde.+
3 “‘Na pekoni, mbi mû kotara ti ala Abraham+ na mbage ti Ngu ti Euphrate kâ mbi sara si lo tambela na yâ ti kodro ti Canaan kue, mbi sara si ahale ti lo aga gbani.+ Mbi mû na lo Isaac.+
4 Na mbi mû na Isaac, Jacob na Ésaü.+ Na pekoni, mbi mû Hoto ti Séir na Ésaü ti tene aga ti lo;+ me Jacob na amolenge ti lo adescend na Égypte.+
5 Na pekoni, mbi tokua Moïse na Aaron+ si mbi ga na aye ti ngangu na ndö ti azo ti Égypte na lege ti aye so mbi sara na yâ ti kodro ni,+ na mbi sigi na ala na Égypte.
6 Tongana mbi sigi na ababâ ti ala na kodro ti Égypte+ na ala si na yanga ti ngu-ingo ni, azo ti Égypte amû apuse ti mbarata ti bira na azo ti kpengo na mbarata, ala tomba peko ti ababâ ti ala juska na yanga ti Kota Ngu-Bengba.+
7 Ala komanse ti toto na Jéhovah,+ tongaso lo sara si mbeni vukongo ndo aga aduti na popo ti ala na azo ti Égypte nga lo sara si kota ngu ni akiri na ndö ti azo ti Égypte na amene ala kue,+ ala bâ na lê ti ala wani ye so mbi sara na azo ti Égypte.+ Na pekoni, ala sara angu* mingi na yâ ti benyama.+
8 “‘Na pekoni, mbi gue na ala na sese ti azo ti mara ti Amori so ayeke sara kodro na mbage ti Ngu ti Jourdain ni, na azo ti mara ti Amori asara bira na ala.+ Me mbi zia azo ti mara ti Amori na maboko ti ala ti tene ala mû kodro ni na maboko ti azo ti mara ti Amori na mbi hunzi ala kue na devant ti ala, azo ti Israël.+
9 Na pekoni, Balak molenge ti Zippor, gbia ti Moab, alondo ti tiri bira na azo ti Israël. Lo iri Balaam, molenge ti Béor, ti deba azo ti Israël.+
10 Me mbi mä tënë ti Balaam pëpe.+ Tongaso, lo iri tufa na ndö ti azo ti Israël fani mingi,+ na mbi zi ala na maboko ti lo.+
11 “‘Na pekoni, ala fâ Ngu ti Jourdain+ ala si na kodro ti Jéricho.+ Amokonzi* ti kodro ti Jéricho, azo ti mara ti Amori, azo ti Périzzi, azo ti Canaan, azo ti mara ti Heth, azo ti mara ti Guirgashi, azo ti Hévi nga na azo ti mara ti Jébus asara bira na ala me mbi zia azo so kue na maboko ti ala.+
12 Tongaso, mbi sara si bê ti azo ni afun kue* kozoni si ala si, na a sara si azo ni akpe na devant ti ala,+ agbia use ti azo ti mara ti Amori. A yeke épée ti ala wala kokora ti ala la atomba agbia so pëpe.+
13 Na pekoni, mbi mû na ala mbeni sese so ala sara kua ngangu ndali ni pëpe nga na agbata so ala si aleke ni pëpe,+ na ala sara kodro dä. Fadeso ala yeke te alê ti vigne nga na ti olive so ala la alu ni lani pëpe.’+
14 “Tongaso, ala sara mbeto ti Jéhovah na ala voro lo na bê ti ala kue nga na lege ti tâ tënë,+ ala zia lege ti anzapa so akotara ti ala avoro lani na mbage ti Ngu ni* nga na Égypte,+ na ala voro gï Jéhovah.
15 Me tongana a yeke sioni na lê ti ala ti voro Jéhovah, zia ala soro laso zo so ala ye ti voro lo,+ wala a yeke anzapa so akotara ti ala avoro na mbage ti Ngu ni,*+ wala anzapa ti azo ti mara ti Amori ti ando so ala yeke sara kodro dä.+ Me ti mbi nga na azo ti da ti mbi, e yeke voro ti e gï Jéhovah.”
16 Azo ni akiri tënë, atene: “E pensé lâ oko pëpe ti dö Jéhovah ti zia ti gue ti voro ambeni nzapa nde.
17 A yeke Jéhovah Nzapa ti e la amû e nga na akotara ti e lo sigi na e na kodro ti Égypte,+ na gbe ti ngbâa,+ na lo sara akota fä na lê ti e+ nga lo bata e na ando kue so e tambela dä na popo ti amara kue so e hon lani na popo ti ala.+
18 Jéhovah atomba azo ti kodro ni kue, so na popo ti ala a yeke wara azo ti mara ti Amori so alango na yâ ti kodro ni kozo na e. Ni la, e nga kue e yeke voro gï Jéhovah, ngbanga ti so lo yeke Nzapa ti e.”
19 Na pekoni, Josué atene na azo ni, atene: “Ala lingbi ti voro Jéhovah pëpe, ngbanga ti so lo yeke Nzapa so ayeke nzoni-kue;+ lo yeke Nzapa so lo ye ti tene azo avoro gï lo oko awe.+ Lo yeke pardonné akengo ndia* ti ala nga na asiokpari ti ala pëpe.+
20 Tongana ala dö Jéhovah azia ti gue ti voro ambeni nzapa nde, lo yeke kiri na ndö ti ala ti hunzi ala biani biani atâa so lo sara aye ti nzoni na ala.”+
21 Me azo ni atene na Josué: “Ên-ën, e yeke voro gï Jéhovah.”+
22 Tongaso, Josué atene na ala, lo tene: “Ala yeke atémoin so afâ ngbanga na ndö ti ala wani ndali ti so ala wani la asoro ti voro Jéhovah.”+ Na azo ni atene: “E yeke atémoin so afâ ngbanga na ndö ti e wani.”
23 “Tongaso, ala zi ambeni nzapa nde so ayeke na popo ti ala, na ala mû bê ti ala kue gï na Jéhovah Nzapa ti Israël.”
24 Azo ni atene na Josué, atene: “E yeke voro Jéhovah Nzapa ti e, na e yeke mä yanga ti lo.”
25 Tongaso, Josué ate mbeni mbele na azo ni na lango ni so na lo lu mbeni ndia nga lo mû mbeni mbela ndali ti ala na Sichem.
26 Na pekoni, Josué asû atënë ni so na yâ ti mbeti ti Ndia ti Nzapa,+ lo mû mbeni kota tênë,+ lo kpo ni aluti na nduzu na gbe ti kota keke so ayeke na terê ti ndo so a zia ni nde ndali ti Jéhovah.
27 Na Josué atene na azo ni kue, lo tene: “Ala bâ, tênë so ayeke duti ande témoin so ayeke fâ ngbanga na ndö ti e,+ ngbanga ti so tênë ni amä atënë kue so Jéhovah atene na e; tênë so ayeke duti ande témoin so ayeke fâ ngbanga na ndö ti ala, tongaso si ala lingbi ti ke Nzapa ti ala pëpe.”
28 Na pekoni, Josué atene na azo ni ti kiri, zo oko oko na ndo so a mû na lo ti ga héritage ti lo.+
29 Na peko ti ye so, Josué, molenge ti Nun, wakua ti Jéhovah, akui na ngu 110.+
30 Tongaso, ala lu lo na sese so a mû na lo ti ga héritage ti lo na Timnath-Sérah,+ sese ni so ayeke na ndo so ahoto ayeke dä na sese ti Éphraïm, na mbage ti nord ti Hoto ti Gaash.
31 Azo ti Israël angbâ ti voro Jéhovah na yâ ti angu kue so Josué ade na fini nga na yâ ti angu kue so a-ancien so asara kua na terê ti Josué angbâ na fini, ala so ahinga tënë ti aye kue so Jéhovah asara ndali ti azo ti Israël.+
32 Abio ti Joseph+ so azo ti Israël amû ni lani na Égypte si ala ga na ni, ala lu ni na gbata ti Sichem na yâ ti mbage ti sese so Jacob avo ândö na maboko ti amolenge ti Hamor,+ babâ ti Sichem; lo vo ni na lê ti nginza 100,+ na sese ni aga héritage ti amolenge ti Joseph.+
33 Éléazar molenge ti Aaron nga akui.+ Tongaso, ala lu lo na yâ ti Kete-hoto-ti-Phinéhas, molenge ti lo,+ sese so a mû ni na lo na so ayeke na yâ ti ando so ahoto ayeke dä na sese ti Éphraïm.
Akete tënë na terê ni
^ So ti tene Euphrate.
^ Na Hébreu: “alango.”
^ A lingbi nga ti tene “Awa ti sese ni.”
^ A lingbi nga ti tene “mbeto ahon ndö ti ala.”
^ So ti tene Euphrate.
^ So ti tene Euphrate.
^ Wala “kpengba-li.”
