Exode 12:1-51
12 Na kodro ti Égypte, Jéhovah atene na Moïse na Aaron, atene:
2 “Nze so ayeke duti ande kozo nze ndali ti ala. A yeke duti ande kozo nze ti ngu ni ndali ti ala.+
3 Ala tene na azo ti Israël kue, ala tene: ‘Na lango bale-oko ti nze so, fade ala mû taba oko+ ndali ti azo ti sewa ti akotara ti ala, taba oko ndali ti sewa oko.
4 Me tongana azo ti da ni ayeke mingi pëpe ti te taba ni gï ala oko, fade ala na azo ti da so ayeke nduru na ala* ayeke kangbi yâ ni na popo ti ala alingbi na wungo ti azo* ni. Tongana ala yeke kangbi yâ ni, ala kangbi yâ ni alingbi na morceau so zo oko oko alingbi ti te.
5 A lingbi ala mû koli-taba ti ngu oko so sioni ye oko ayeke na terê ti lo pëpe.+ Ala lingbi ti mû kete koli-taba wala kete koli-ngasa.
6 Ala bata nyama ni juska na lango 14 ti nze so.+ Na lango ni so, sewa oko oko ti azo ti Israël* ayeke fâ ti lo nyama ni na peko ti lindango ti lâ kozoni si ndo avuko.*+
7 Ala yeke mû ande mbage ti mênë ti nyama ni ala fi ni na terê ti akeke use ti cadre ti porte nga na terê ti li ti cadre ti porte ti ada so ala yeke te nyama ni na yâ ni so.+
8 “‘Ala yeke te ande nyama ni na bï ni so.+ Ala zö nyama ni si ala te ni na mapa so a sara na levure pëpe+ nga na asengo kugbe ti kasa.+
9 Ala te pëpe mbeni nyama ni so angbâ fini, wala so a kporo pekoni kporongo na ngu. Me ala zö ni zongo si ala te, ala zö li ni, agere ni nga na ayâ ni.
10 Ala zia mbeni alango juska na ndapre pëpe, me tongana mbeni alango juska na ndapre ala gbi ni.+
11 Ala yeke te nyama ni tongaso: Ala kanga ceinture ti ala,* ala yü poro na gere ti ala, keke ti ala na maboko ti ala. Ala te ni hio hio. So Pâque ti Jéhovah la.
12 Mbi yeke hon ande na yâ ti kodro ti Égypte na bï ni so, na mbi yeke fâ akozo molenge kue ti kodro ni, a londo na azo ti si na anyama.+ Mbi yeke fâ ngbanga na li ti anzapa kue ti Égypte.+ Mbi yeke Jéhovah Nzapa ti ala.
13 Mênë ni ayeke duti ande tongana mbeni fä na li ti ada so ala yeke na yâ ni. Mbi yeke bâ mênë ni na mbi hon na ndö ti ala, na ngoi so mbi yeke punir kodro ti Égypte, ye ti ngangu so ayeke tï na ndö ti ala pëpe.+
14 “‘Lango ni so ayeke ga mbeni lango so ala yeke girisa ni pëpe, mbeni lango so ala yeke sara matanga na Jéhovah, na ahale ti ala nga kue ayeke ngbâ ti sara ni. Matanga ni so ayeke ga tongana mbeni mbela so aninga, a lingbi ala sara ni.
15 Na yâ ti lango mbasambala, ala yeke te gï mapa so a sara na levure pëpe.+ Na kozo lango ni, ala zi na yâ ti ada ti ala mengo farine so akpi awe, ngbanga ti so ti londo na kozo lango ni ti si na lango mbasambala ni, zo kue so ate mbeni ye so a sara na levure, a yeke zi* ande zo* ni so na popo ti azo ti Israël.
16 Na kozo lango ni, ala yeke sara ande mbeni kota bungbi ti voro Nzapa; na lango mbasambala ni nga, ala sara mbeni kota bungbi ti voro Nzapa. Ala sara kua na alango ni so pëpe.+ Ye so amû lege na ala ti sara ni ayeke gï ti tene zo* oko oko atö kobe ti lo ti tengo ni.
17 “‘Ala sara Matanga ti mapa so a sara na levure pëpe,+ ngbanga ti so a yeke tâ na lango ni so si mbi yeke sigi ande na gbâ ti wungo ti ala so kue na kodro ti Égypte. A lingbi ala sara matanga so lakue, a ga tongana mbeni mbela so aninga na ahale ti ala nga kue ayeke ngbâ ti sara ni.
18 Na kozo nze ni, na lango 14 ti nze ni, na lakui ni, juska ti si na lango 21 ti nze ni na lakui, a lingbi ala te mapa so a sara na levure pëpe.+
19 Na yâ ti lango mbasambala, a lingbi a wara mbeni mengo farine so akpi awe na yâ ti ada ti ala pëpe, ngbanga ti so zo kue so ate mbeni ye so a sara na levure, atâa a yeke wande wala molenge ti kodro,+ a lingbi a zi* zo* ni so na popo ti azo ti Israël.+
20 Ala te pëpe mbeni ye so a sara na levure. Na ando kue so ala lango dä, ala te gï mapa so a sara na levure pëpe.”’
21 Moïse airi a-ancien kue ti Israël hio,+ lo tene na ala: “Ala gue ala soro ambeni kete nyama* ndali ti sewa oko oko, na ala fâ anyama ni ndali ti Pâque ni.
22 Ala mû mbeni hysope ala yôro li ni na yâ ti mênë so ayeke na yâ ti dû ti sembe na ala fi mênë ni na li ti cadre ti porte nga na terê ti akeke ti cadre ni use kue. Zo oko asigi na yâ ti da ti lo pëpe juska na ndapre.
23 Tongana Jéhovah ayeke hon na yâ ti kodro ni ti ga na ye ti ngangu na ndö ti azo ti Égypte, si lo bâ mênë ni na li ti cadre ti porte ni nga na terê ti akeke use ti cadre ti porte ni, Jéhovah ayeke hon ande hongo na ndö ti yanga ti da ni, lo yeke zia lege na ye ti sioni* so ayeke fâ zo ti lï na yâ ti da ti ala pëpe.+
24 “Ala sara matanga so, matanga ni so ayeke ga mbeni ndia so ayeke ninga ndali ti ala na amolenge ti ala.+
25 Na ngoi so ala yeke lï na yâ ti kodro so Jéhovah ayeke mû ande na ala, tongana ti so lo sara tënë ni lani, a lingbi ala ngbâ ti sara matanga so.+
26 Me tongana amolenge ti ala ahunda ala, atene: ‘Nda ti matanga ni so ayeke nyen?’+
27 Fade ala tene na amolenge ni: ‘So ayeke sandaga ti Pâque so a sara ni na Jéhovah la, lo so lani lo hon hongo na ndö ti da ti azo ti Israël na kodro ti Égypte na ngoi so lo ga na ye ti ngangu na ndö ti azo ti Égypte me lo zi azo ti da ti e.’”
Tongaso, azo ni akuku, na ala kpo li ti ala na sese.
28 Azo ti Israël ague ala sara gï ye so Jéhovah amû yanga na Moïse na Aaron ti sara.+ Ala sara gï tongana ti so a hunda.
29 Na bê ti bï, Jéhovah afâ akozo molenge kue na yâ ti kodro ti Égypte,+ a londo na kozo molenge ti Pharaon so aduti na ndö ti trône ti lo juska ti si na akozo molenge ti angbâa so ayeke na da ti kanga* nga na akozo molenge ti anyama kue.+
30 Tongaso Pharaon alondo na bï ni so, lo na azo ti kua ti lo kue nga na tanga ti azo ti Égypte kue. Kota toto alondo na popo ti azo ti Égypte, ngbanga ti so mbeni da oko angbâ senge pëpe, kuâ ayeke na yâ ti ada ni kue.+
31 Hio, Pharaon airi Moïse na Aaron+ na bï ni so, lo tene na ala: “Ala londo, ala sigi na popo ti azo ti mbi, ala na tanga ti azo ti Israël ni. Ala gue, ala sara na Jéhovah tongana ti so ala tene.+
32 Ala mû nga ataba ti ala nga na abagara ti ala tongana ti so ala tene, na ala gue.+ Me ala iri nga tufa na ndö ti mbi.”
33 Azo ti Égypte akomanse ti pusu azo ni ti sigi hio+ na yâ ti kodro ni; “ngbanga ti so” ala tene, “e kue e yeke tongana azo so akui awe.”+
34 Tongaso, azo ti Israël amû mengo farine ti ala so ade ala zia levure dä pëpe, ala mû aye* so ala yeke sara ka amapa ti ala na yâ ni, ala kanga ni na yâ ti abongo ti ala, na ala yô ni na ndö ti go ti ala.
35 Azo ti Israël asara ye so Moïse atene na ala, ala hunda na azo ti Égypte ti mû na ala aye ti argent, aye ti lor nga na abongo.+
36 Jéhovah asara si ala ga nzoni na lê ti azo ti Égypte, tongaso ala mû na azo ti Israël aye so ala hunda. Azo ti Israël aro ye kue na terê ti azo ti Égypte.+
37 Azo ti Israël alondo na Ramsès+ ti gue na Succoth.+ Wungo ti akoli so atambela na gere ayeke 600 000 tongaso, a diko amolenge dä pëpe.+
38 Gbâ ti azo nde nde*+ ague legeoko na ala, legeoko na ataba nga na abagara; anyama ayeke gbani.
39 Ala mû mengo farine so ala sigi na ni na Égypte ala sara na amapa so ayeke ronde ronde so a zia levure dä pëpe. A zia levure dä pëpe ndali ti so a tomba ala ti sigi hio na Égypte, ye so asara si ala mû pëpe ambeni kobe ti ala ti gue na ni.+
40 Ti londo na ngu so azo ti Israël asigi na kodro ti Égypte,+ azo ti Israël asara ngu 430 na kodro-wande.+
41 Na hunzingo ti ngu 430 ni, tâ na lango ni so, gbâ ti azo ti Jéhovah kue so ayeke na kodro ti Égypte asigi.
42 A yeke mbeni bï so ala yeke sara ande matanga ti sigingo ti ala so Jéhovah asigi na ala na kodro ti Égypte. Na bï ni so, azo ti Israël kue ayeke sara ande matanga ni so ndali ti Jéhovah, ala na ahale ti ala kue ayeke ngbâ ti sara ni.+
43 Jéhovah atene na Moïse na Aaron: “So ndia ti Pâque la: Wande alingbi ti te kobe ti Pâque ni pëpe.+
44 Me tongana mbeni zo ayeke na mbeni ngbâa so lo vo lo vongo na nginza, a lingbi a fâ lo na ganza.+ Na pekoni ngbâa ni alingbi ti te ni senge.
45 Wande nga na zo ti kua so a futa lo futango alingbi ti te ni pëpe.
46 A lingbi azo so abungbi ti te ni ate ni gï na yâ ti mbeni da oko. Zo asigi na mbeni nyama ni na gigi pëpe. Ala kungbi yâ ti bio ni pëpe.+
47 Azo ti Israël kue la ayeke sara matanga ni.
48 Tongana mbeni wande aye ti sara Matanga ti Pâque na Jéhovah, a lingbi a fâ akoli kue so ayeke na da ti lo na ganza si na pekoni lo lingbi ti sara matanga ni na lo yeke ga tongana molenge ti kodro. Me zo so afâ ganza pëpe alingbi ti te kobe ti Pâque ni pëpe.+
49 Ndia so ayeke ndali ti molenge ti kodro nga ndali ti wande so asara kodro na popo ti ala.”+
50 Tongaso, azo ti Israël kue asara gï tongana ti so Jéhovah amû yanga na Moïse nga na Aaron ti sara. Ala sara gï tongana ti so a hunda.
51 Tâ na lango ni so, Jéhovah asigi na gbâ ti azo ti Israël so kue na kodro ti Égypte.
Akete tënë na terê ni
^ Na Hébreu: “lo na azo ti da so ayeke nduru na lo.”
^ Wala “a-âme.”
^ Na Hébreu: “congrégation kue ti azo ti Israël.”
^ Na Hébreu: “na popo ti alakui use.”
^ Na Hébreu: “Ala kanga ye na gbe ti yâ ti ala.”
^ Wala “a yeke fâ.”
^ Wala “âme.”
^ Wala “âme.”
^ Wala “a fâ.”
^ Wala “âme.”
^ So ti tene akete taba wala akete ngasa.
^ Na Hébreu: “futingo ye.”
^ Na Hébreu: “da ti kota dû.”
^ Wala “adû ti sembe.”
^ So ti tene azo nde nde so ayeke azo ti Israël pëpe nga na azo ti Égypte.
