Exode 24:1-18
24 Na pekoni, Jéhovah atene na Moïse: “Mo monté na ndö ti hoto ni, mo, Aaron, Nadab, Abihu+ nga na a-ancien 70 ti azo ti Israël me ala ngbâ ayo, ala kuku.
2 Gï mo Moïse la mo yeke ga nduru na mbi Jéhovah. Me ti ala, ala yeke ga nduru na mbi pëpe. Azo ti Israël kue ayeke monté legeoko na mo pëpe.”+
3 Moïse aga afa na azo ni peko ti atënë kue so Jéhovah atene nga na ambela kue so lo mû.+ Azo ni kue akiri tënë na yanga oko, ala tene: “Atënë kue so Jéhovah atene, e yeke nduru ti sara ye alingbi na ni.”+
4 Tongaso Moïse asara atënë ti Jéhovah so kue na mbeti.+ Lo londo na kota ndapre lo leke mbeni gbalaka nga na apilier 12 na gbe ti hoto ni. Wungo ti apilier ni alingbi na wungo ti amara 12 ti Israël.
5 Na pekoni, Moïse atokua ambeni maseka-koli ti Israël ala gue ala yâa asandaga so a zö ni agbi kue, ala yâa abagara na Jéhovah tongana asandaga ti beoko.+
6 Na pekoni, Moïse amû ndambo ti mênë ni lo zia na yâ ti adû ti sembe, na tanga ti ndambo ni lo fi ni na ndö ti gbalaka ni.
7 Lo mû mbeti ti mbele ni lo diko ni na kota go na mê ti azo ni.+ Na pekoni ala tene: “Aye kue so Jéhovah afa, e yeke sara ye alingbi na ni nga e yeke mä yanga ti lo.”+
8 Moïse amû mênë ni lo fi ni na ndö ti azo ni,+ si lo tene: “So mênë ti mbele so Jéhovah ate na ala la, a lingbi na atënë kue so lo tene so.”+
9 Moïse, Aaron, Nadab, Abihu nga na a-ancien 70 ti Israël amonté hoto ni,
10 na ala bâ Nzapa ti Israël.+ Mbeni ye ayeke na gbe ti gere ti lo, a kpa dalle so a sara na tênë ti saphir, a yeke tongana lê ti nduzu so ayeke polele.+
11 Lo sara sioni na akoli so ayeke fa lege na azo ti Israël so pëpe,+ me ala bâ tâ Nzapa na yâ ti vision, na oko ngoi ni ala te na ala nyon.
12 Jéhovah atene na Moïse: “Mo monté na li ti hoto na mbage ti mbi mo ngbâ kâ. Fade mbi mû na mo akete tableau ti tênë so mbi yeke sû andia na acommandement na ndö ni ti fa ye na ala.”+
13 Tongaso Moïse na wakua ti lo Josué+ alondo ague, na Moïse amonté na li ti hoto ti tâ Nzapa.+
14 Me Moïse atene na a-ancien ni: “Ala ku e na ndo so juska e kiri.+ Aaron na Hur+ ayeke na terê ti ala. Zo so ayeke na mbeni tënë ti tene a leke ni, lo gue lo bâ ala.”+
15 Tongaso, Moïse amonté na li ti hoto ni na ngoi so mbinda amû ndö ni.+
16 Gloire ti Jéhovah+ angbâ na ndö ti Hoto ti Sinaï,+ na mbinda amû ndö ti hoto ni lango omene. Na lango mbasambala ni, na yâ ti mbinda ni kâ, lo iri Moïse.
17 Na lê ti azo ti Israël, gloire ti Jéhovah ayeke tongana mbeni wâ so ayeke gbi ye na li ti hoto ni.
18 Moïse alï na yâ ti mbinda ni na lo monté na li ti hoto ni.+ Lo ngbâ kâ lâ 40 na bï 40.+
