Exode 29:1-46
29 “Bâ ye so mo yeke sara na ala ti zia ala nde si ala sara kua ti prêtre na mbi: Mû kete koli-bagara oko, na akoli-taba use so mbeni mbage ti terê ti ala abuba pëpe,+
2 mapa so a sara na levure pëpe, mapa so ayeke ronde ronde so a sara na levure pëpe nga a mélangé ni na mafuta, makara so a sara na levure pëpe si a sara mafuta na ndö ni.+ Mo mû fuku ti blé si mo sara na ni kue,
3 mo zia ni kue na yâ ti mbeni sakpa na mo fa ni na yâ ti sakpa ni,+ legeoko na koli-bagara ni nga na akoli-taba use so.
4 “Mo yeke ga na Aaron na amolenge ti lo na yanga ti tente ti bungbi+ si mo sukula ala na ngu.+
5 Na pekoni mo mû abongo ni,+ mo yü na Aaron. Mo yü na lo yongoro bongo ni, kota bongo so maboko ni ayeke dä pëpe ti éphod ni, éphod nga na pectoral ni. Mo kanga ceinture ti éphod ni nzoni na gbe ti yâ ti lo.+
6 Mo kanga turban ni na li ti lo na mo zia na ndö ti turban ni plaque ti lor so ayeke nzoni-kue.*+
7 Mo mû mafuta so ayeke nzoni-kue*+ mo tuku ni na li ti Aaron ti soro lo.+
8 “Na pekoni, mo ga na amolenge ti lo na mo yü na ala ayongoro bongo ni.+
9 Mo kanga a-écharpe ni na yâ ti Aaron nga na yâ ti amolenge ti lo, mo zia akpoto ni na li ti amolenge ni. Kua ti prêtre ni ayeke ga ti ala, so ayeke mbeni ndia so ayeke ngbâ aninga.+ A yeke tongaso si mo yeke zia Aaron na amolenge ti lo na mbata ti kua ti ala ti sara kua ti prêtre.+
10 “Mo ga na koli-bagara ni na devant ti tente ti bungbi, fade Aaron na amolenge ti lo ayeke zia maboko ti ala na li ti lo.+
11 Mo fâ koli-bagara ni na gbele Jéhovah, na yanga ti tente ti bungbi.+
12 Mo mû mbeni mbage ti mênë ti koli-bagara ni na li ti maboko ti mo na mo zia ni na ndö ti adidi ti gbalaka ni,+ tanga ti mênë ni kue fade mo tuku ni na gere ti gbalaka ni.+
13 Mo mû mafuta kue+ so ayeke na terê ti akamba ti yâ ni, na ti so ayeke na terê ti foie ni, nga na arognon ni use kue na mafuta so ayeke na terê ni, mo zö ni agbi kue tongaso si guru ni alondo na ndö ti gbalaka ni.+
14 Me nyama ti bagara ni, poro ti terê ti lo nga na apuru ti lo, mo yeke gbi ni na gigi ti camp ni. A yeke sandaga ndali ti siokpari.
15 “Na pekoni, mo mû koli-taba ni oko, na Aaron na amolenge ti lo ayeke zia maboko ti ala na li ti lo.+
16 Mo fâ koli-taba ni na mo mû mênë ti lo mo fi ni na terê ti gbalaka ni angoro ni kue.+
17 Mo doroko koli-taba ni, mo sukula akamba ti yâ ti lo+ na agere ti lo na mo mû anyama ni so mo fâ yâ ni so, mo dö ni na terê ti terê na mo zia li ni na terê ni.
18 Mo zö koli-taba ni agbi kue tongaso si guru ni alondo na ndö ti gbalaka ni. A yeke sandaga so a zö ni agbi kue na Jéhovah, so fion ni afun nzoni na hôn ti lo.*+ A yeke mbeni sandaga so a zö ni na Jéhovah.
19 “Na pekoni, mo mû mbeni koli-taba ni so, na Aaron na amolenge ti lo ayeke zia maboko ti ala na li ti lo.+
20 Mo fâ koli-taba ni, na mo mû mbeni mênë ti lo mo zia ni na terê ti mê ti Aaron ti mbage ti koli, na terê ti mê ti amolenge ti lo ti mbage ti koli, na ndö ti kota li ti maboko ti ala ti koli nga na ndö ti kota li ti gere ti ala ti koli. Mo fi mbeni mênë ni na terê ti gbalaka ni angoro ni kue.
21 Mo mû mbeni mênë ni so ayeke na ndö ti gbalaka ni na mbeni mafuta so ayeke nzoni-kue,+ na mo fi ni na ndö ti Aaron na abongo ti lo, na ndö ti amolenge ti lo na abongo ti ala, tongaso si a zia lo na abongo ti lo nga amolenge ti lo na abongo ti ala nde ndali ti kua ti Nzapa.+
22 “Mo mû mafuta ti koli-taba ni, damba ni so ayeke mafuta, amafuta kue so ayeke na terê ti akamba ti yâ ni, ti so ayeke na terê ti foie ni, arognon ni use kue na mafuta so ayeke na terê ni,+ gere ni ti mbage ti koli, ndali ti so a yeke koli-taba ti sandaga so a mû ndali ti ziango prêtre na mbata ti kua.+
23 Mo mû nga morceau ti mapa oko so ayeke ronde ronde nga mapa oko so ayeke ronde ronde so a sara mafuta na terê ni; mo mû nga makara oko na yâ ti sakpa ti mapa so a sara na levure pëpe so ayeke na gbele Jéhovah.
24 Mo zia ni kue na yâ ti maboko ti Aaron na ti amolenge ti lo, na mo yengi ni mbage na mbage tongana sandaga so a yengi ni na gbele Jéhovah.
25 Na pekoni, mo mû ni na maboko ti ala mo gbi ni na ndö ti gbalaka ni, na ndö ti sandaga so a zö ni agbi kue so, tongaso si fion ni afun nzoni na hôn ti Jéhovah.* A yeke mbeni sandaga so a zö na Jéhovah.
26 “Mo mû kate ti koli-taba ti sandaga so a mû ndali ti ziango Aaron na kua ti prêtre,+ mo yengi ni mbage na mbage tongana sandaga so a yengi ni na gbele Jéhovah, na a yeke ga ti mo.
27 Mo mû kate ti koli-taba ti sandaga so a yengi ni nga gere ni so a zia ni nde ndali ti aprêtre so a yengi ni na so a mû ndali ti Aaron na amolenge ti lo ti zia ala na mbata ti kua,+ mo zia ni nde ndali ti mbi.
28 A yeke ga ti Aaron na amolenge ti lo. So ayeke mbeni ndia so ayeke ngbâ aninga, na azo ti Israël ayeke sara ye alingbi na ni ngbanga ti so mbage ni so a zia ni nde. A yeke ga mbeni mbage so a zia ni nde, so azo ti Israël ayeke ga na ni.+ So ayeke mbage so a zia ni nde si ala yeke mû ni ndali ti Jéhovah la; ala yeke zi ni na ndö ti asandaga ti ala ti beoko.+
29 “Abongo ti Aaron so a zia ni nde ndali ti kua ti prêtre,+ a yeke ga ande ti amolenge ti lo+ na peko ti lo na ngoi so a yeke tuku mafuta na li ti ala ti soro ala na ti zia ala na mbata ti kua ti prêtre.
30 Na popo ti amolenge ti lo, prêtre so ayeke mû place ti lo, na so ayeke lï na yâ ti tente ti bungbi ti sara kua na yâ ti ndo so ayeke nzoni-kue, lo yeke yü abongo ni so lango mbasambala.+
31 “Mo yeke mû koli-taba ti sandaga ti ziango prêtre na mbata ti kua ti lo, mo tö nyama ni na yâ ti mbeni ndo so ayeke nzoni-kue.+
32 Aaron na amolenge ti lo ayeke te+ nyama ti koli-taba ni na mapa so ayeke na yâ ti sakpa ni, ala yeke te ni na yanga ti tente ti bungbi.
33 Aye so a yâa ni fade na sandaga ti tene a zi na siokpari ti aprêtre ni tongaso si a zia ala na mbata ti kua ti ala nga si a zia ala nde ndali ti Nzapa so, fade ala yeke te ni. Mbeni zo nde* ayeke te ni pëpe, ngbanga ti so a yeke mbeni ye so a zia ni nde ndali ti Nzapa.+
34 Tongana mbeni nyama ti koli-taba ti sandaga ti ziango prêtre na mbata ti kua ti lo nga na mbeni mapa ni angbâ juska na ndapre, a yeke gbi ni.+ Zo ate ni pëpe ngbanga ti so a yeke mbeni ye so a zia ni nde ndali ti Nzapa.
35 “Mo sara na Aaron na amolenge ti lo aye kue so mbi fa na mo. Mo yeke mû ande lango mbasambala ti zia ala na mbata ti kua ti ala ti prêtre.+
36 Lango oko oko mo yeke yâa ande na sandaga koli-bagara ti zi siokpari, na mo zi sioni ye kue na terê ti gbalaka ni na mungo sandaga, mo tuku mafuta na ndö ti gbalaka ni ti zia ni nde ndali ti Nzapa.+
37 Mo yeke mû ande lango mbasambala ti yâa sandaga ti zi sioni ye kue na terê ti gbalaka ni, na mo zia ni nde si a ga mbeni gbalaka so ayeke nzoni kue kue kue.+ Azo kue so ayeke ndu gbalaka ni, a lingbi ala duti nzoni-kue kozoni si.
38 “Ye so mo yeke yâa ande na sandaga na ndö ti gbalaka ni ayeke so: lango oko oko, akete koli-taba use ti ngu oko; mo sara tongaso lakue.+
39 Mo yâa na sandaga kete koli-taba oko na ndapre, nga tanga ti kete koli-taba ni na peko ti lindango ti lâ kozoni si ndo avuko.*+
40 Ti kozo kete koli-taba ni, mo yeke yâa lo na sandaga legeoko na dixième ti épha* ti farine so a mélangé ni na quart ti hîn* ti mafuta ti lê ti olive so a pika ni si asigi, na quart ti hîn ti vin ti sandaga ti sämba.
41 Mo yeke yâa ande use kete koli-taba ni na sandaga na peko ti lindango ti lâ kozoni si ndo avuko.* Mo yâa lo legeoko na oko sandaga ti lê ti kobe nga na ti sämba tongana ti ndapre ni so. Mo yeke yâa ni tongana sandaga so a zö ni na Jéhovah, so fion ni afun nzoni na hôn ti lo.*
42 So ayeke sandaga so a zö ni agbi kue, a yeke zö ni lakue ti londo na ala ti si na ahale ti ala; a yeke zö ni na yanga ti tente ti bungbi na gbele Jéhovah, ndo so mbi yeke fa terê ti mbi na ala ti sara tënë na mo.+
43 “Mbi yeke duti dä ande na ndo so ti fa terê ti mbi na azo ti Israël, na gloire ti mbi ayeke sara si ndo so aga nzoni-kue.+
44 Mbi yeke sara si tente ti bungbi ni na gbalaka ni aga nzoni-kue; na mbi yeke zia Aaron na amolenge ti lo nde+ si ala sara kua ti prêtre na mbi.
45 Mbi yeke sara kodro na popo ti azo ti Israël, na mbi yeke ga Nzapa ti ala.+
46 Ala yeke hinga biani so mbi Jéhovah Nzapa ti ala la, mbi la mbi sigi na ala na kodro ti Égypte, tongaso si mbi sara kodro na popo ti ala.+ Mbi Jéhovah Nzapa ti ala la.
Akete tënë na terê ni
^ Wala “kete couronne so afa so a zia lo nde ndali ti Nzapa.”
^ A yeke mbeni mafuta so ayeke tuku na li ti mbeni zo ti fa so a soro lo polele ti sara mbeni kua.
^ Wala “adë bê ti lo.” Na Hébreu: “asara si lo wu terê ti lo.”
^ Wala “adë bê ti Jéhovah.” Na Hébreu: “asara si Jéhovah awu terê ti lo.”
^ Na Hébreu: “wande,” so ti tene mbeni zo so ayeke ti sewa ti Aaron pëpe.
^ Na Hébreu: “na popo ti alakui use.”
^ Na Hébreu: “na popo ti alakui use.”
^ Wala “adë bê ti lo.” Na Hébreu: “asara si lo wu terê ti lo.”
