Tite 2:1-15
2 Me ti mo, ngbâ ti sara tënë ti aye so alingbi na nzoni fango ye.+
2 Zia sarango ye ti terê ti ambakoro-koli aduti lakue nzoni, ala ne terê ti ala, ala bata bibe ti ala nzoni, ala luti nzoni na yâ ti mabe, na yâ ti ndoye nga na gbungo ngangu.
3 Legeoko nga, zia akota-wali aduti azo so akpe mbeto ti Nzapa, ala duti azo ti pango zo pëpe, ala duti angbâa ti vin pëpe, ala duti awafango na azo ye so ayeke nzoni;
4 si ala lingbi ti wa amaseka-wali* ti ndoye akoli ti ala, ti ndoye amolenge ti ala,
5 ti bata bibe ti ala nzoni, ti duti nzoni-kue, ti sara kua ti da ti ala, ti duti anzoni wali, ti woko terê na gbe ti akoli ti ala,+ tongaso si a sara sioni tënë ti tënë ti Nzapa pëpe.
6 Legeoko nga, ngbâ ti wa amaseka-koli ti bata bibe ti ala nzoni.+
7 Na yâ ti aye kue, mo fa so mo duti tapande na lege ti sarango anzoni kusala. Mo fa ye so ayeke gï tâ tënë na yâ ti nengo terê,+
8 mo sara anzoni tënë so zo alingbi ti tene sioni tënë ni pëpe, tongaso si zo ti dengo kite+ na mo aduti na kamene, na lo yeke na mbeni sioni ye ti tene na ndö ti e pëpe.+
9 Zia angbâa awoko terê na gbe ti awa ti ala na yâ ti aye kue,+ ala gi ti sara ye so anzere na awa ti ala ni, ala changé tënë na ala pëpe,
10 ala nzi ye pëpe,+ me ala fa so ala yeke be-ta-zo na yâ ti aye kue, tongaso si na yâ ti aye kue ala lingbi ti sara pendere ti fango ye ti Nzapa, Sauveur ti e.+
11 Ndali ti so kota nzobe ti Nzapa so aga na salut na mara ti azo nde nde kue asigi polele awe,+
12 a fa na e ti ke asarango ye so ayeke nde na ye so Nzapa aye, ti ke anzara ti dunia so;+ a fa na e ti tene na lege ti dutingo ti e, e bata bibe ti e nzoni, e sara ye ti mbilimbili nga e voro Nzapa na bê ti e kue na yâ ti aye ti ngoi ti laso,*+
13 na ngoi so e yeke ku beku so amû ngia+ na e nga na pendere lege so kota Nzapa nga na Sauveur ti e Jésus Christ ayeke fa terê ti ala na gigi,
14 Jésus Christ so akä terê ti lo na kuâ ndali ti e+ si lo zi e+ na yâ ti mara ti asarango ye nde nde kue so akpe ndia pëpe, na lo sukula ndali ti lo wani ambeni zo so ayeke duti gï azo ti lo, so ala yapu ti sara anzoni kusala.+
15 Ngbâ ti sara tënë ti aye so, ti wa azo nga ti suku na ala na komandema kue so mo yeke na ni ti mû yanga na zo ti sara ye.+ Zia mbeni zo abâ mo tongana mbumbuse zo pëpe.
