Ti tâ tënë ni, na mbeni lege e peut ti tene so mbeni mara situation tongaso ayeke ku e kue laso. Jésus airi ni “kota ye ti vundu.” (Matthieu 24:21). E peut ti kpe ni ti gue na mbeni ndo ape. Me e peut ti sara mbeni ye so apeut ti bata e. Ye ni so ayeke nyen?

Na yâ ti fango tënë ti Jésus Christ na ndö ti hoto, lo mû wango so: “Ni la, ala ngbâ ti gi kozoni Royaume ti Nzapa nga na mbilimbili ti lo.” (Matthieu 6:33). E yeke sara ni tongana nyen?

Gi kozoni Royaume ti Nzapa. Ye so aye ti tene so e doit ti bâ Royaume ti Nzapa na nene mingi ahon aye kue (Matthieu 6:25, 32, 33). Ngbanga ti nyen? Ngbanga ti so azo apeut ti leke akpale ti dunia ape. Gï Royaume ti Nzapa oko la apeut ti sara ngangu ye so.

Gi mbilimbili ti lo. E doit ti sara kue ti sara ye alingbi na andia nga na amama-ndia ti Nzapa so ayeke mbilimbili. Ngbanga ti nyen? Ngbanga ti so tongana e wani la e soro ye so ayeke nzoni wala ye so ayeke sioni na lê ti e, ye ti pekoni ayeke duti ande sioni mingi (aProverbe 16:25). Na mbage, tongana e sara ye alingbi na afango lege ti Nzapa, e yeke zia ngia na bê ti Nzapa nga e yeke bâ nzoni na pekoni.​—Ésaïe 48:17, 18.

Ngbâ ti gi kozoni Royaume ti Nzapa nga na mbilimbili ti lo. Jésus atene lani so li ti ambeni zo apeut ti duti ande na ndö ti ambeni ye nde nga ala  pensé so ala yeke duti nzoni tongana ala wara gbâ ti nginza. Ti ambeni, agingo bê ti lâ oko oko ahon ndö ti ala a sara si ala yeke na temps ape ti gi Royaume ti Nzapa.​—Matthieu 6:19-21, 25-32.

Me, Jésus amû zendo so azo so amû mbage ti Royaume ti Nzapa ayeke wara ye so ala yeke na bezoin ni laso, nga na yâ ti ngoi so ayeke ga ala yeke wara gbâ ti aye ti nzoni.​—Matthieu 6:33.

Avundu nga na pasi ti adisciple ti Jésus ti ngoi ti akozo Chrétien ahunzi lani kue ape atâa so ala gi lani kozoni Royaume ti Nzapa nga na mbilimbili ti lo. Me, a bata ala lani. A bata ala tongana nyen?

Ala sara ye alingbi na andia ti Nzapa so ayeke mbilimbili, na ye so a bata ala nde na akpale so azo so asara sanka ti atënë ti Nzapa awara. Kpengba mabe so ala yeke na ni na Royaume ti Nzapa a-aidé ala même ti hon ndö ti angangu kpale ti gigi. Nga, Nzapa amû na ala “ngangu so ahon ti so zo ayeke na ni” tongaso si ala peut ti gbu ngangu.​—2 aCorinthien 4:7-9.

Akozo Chrétien asara ye alingbi lani na commandement ti Jésus, ala gi kozoni Royaume ti Nzapa. Ala fa lani nzoni tënë ti Royaume ti Nzapa na yâ ti ando kue so ala yeke dä (aColossien 1:23). Eskê ambeni zo ayeke sara nga tongaso laso?

En! A-Témoin ti Jéhovah ahinga so ngoi angbâ tâ mingi ape ti tene Royaume ti Nzapa afuti dunia so. Tongaso, ala sara kue ti sara ye alingbi na tënë ti Jésus so atene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”​—Matthieu 24:14.

Eskê mo yeke yeda ande na nzoni tënë so? E wa mo ti sara ye tongana ti akozo Chrétien so ayeke lani na Bérée. Na temps so bazengele Paul afa na ala nzoni tënë na ndö ti Royaume ti Nzapa, “ala yeke tâ nduru ti yeda na tënë ni.” Na pekoni, “ala yeke gi nda ti Mbeti ti Nzapa nzoni” ti bâ wala ye so Paul afa na ala ague oko na Mbeti ti Nzapa, na ala sara ye alingbi na ye so ala manda.​—Kusala 17:11, 12.

Mo kue mo peut ti sara mara ni. Tongana mo gi kozoni Royaume ti Nzapa nga na mbilimbili ti lo, mo yeke wara nzoni ndo ti batango terê laso nga ande mo yeke duti na siriri lakue lakue.