▪ Na yâ ti article so, e yeke manda so mbeni kota tënë ayeke dä so abâ azo nga na a-ange kue: sarango si kota iri ti Jéhovah aga nzoni-kue. Mbeni mbage ti kota tënë ni ayeke so: Eskê fason so Jéhovah ayeke komande na ni ayeke nzoni mingi wala pëpe? Legeoko nga, tënë ti dutingo be-ta-zo ti zo na Nzapa ayeke mbeni mbage ti kota tënë ni.

Ngbanga ti nyen la fadeso e tene so kota tënë ni aluti mingi na ndö ti iri ti Jéhovah nga na sarango si a ga nzoni-kue? Zia e bâ araison ota so e tene tongaso.

Kozo ni, Satan agi lani ti buba iri ti Jéhovah na yaka ti Éden. Tënë so Satan ahunda na Ève aye ti fa so Jéhovah aye lani ti mû ye na zo ape nga aye so lo fa na Adam na Ève ti sara ayeke na lege ni ape. Na pekoni, ye so Satan atene ague nde na ye so Jéhovah atene. Ti tâ tënë ni, lo ye ti tene so Nzapa ayeke zo ti mvene. Tongaso, lo buba iri ti Jéhovah lani. Lo ga lani “Zabolo,” so ti tene, “Zo so atene mvene na ndö ti mba ti lo ti buba iri ti lo.” (Jean 8:44). So Ève amä na bê na mvene ti Satan, lo ke yanga ti Nzapa, lo fa so lo ye pëpe ti tene Jéhovah aduti gbia ti lo (Gen. 3:1-6). Juska laso, Satan angbâ ti tene amvene na ndö ti iri ti Nzapa nga na ndö ti mara ti zo wa la Jéhovah ayeke ni. A yeke ngangu ape na azo so ayeda na amvene so ti ke yanga ti Jéhovah. Tongaso, na lê ti awakua ti Nzapa, ti bi tënë ti mvene na ndö ti iri ti Jéhovah, so ayeke nzoni-kue, ayeke sarango ye so ayeke na lege ni oko ape. So ayeke kota raison so ndali ni pasi nga na sarango ye ti sioni ayeke mingi na yâ ti dunia so.

Use ni, ndali ti nzoni ti aye kue so Jéhovah acréé, mbilimbili azo nga na a-ange, nyen na nyen Jéhovah ayeke zi zonga kue so a bi na ndö ti iri ti lo. A yeke ye so ayeke kota mingi na lê ti Jéhovah. Ndani la lo tene: “Biani, mbi yeke sara ande si iri ti mbi, so ayeke kota mingi so, aga nzoni-kue.” (Ézéch. 36:23). Na Jésus afa polele ye so adoit ti duti kota ye mingi na yâ ti asambela ti awakua ti Jéhovah kue so ayeke be-ta-zo tongana lo tene: “Zia a sara si iri ti mo aga nzoni-kue.” (Mat. 6:9). Bible atene fani mingi so a yeke kota ye mingi ti mû gloire na iri ti Jéhovah. Bâ ambeni tapande ni: “Ala mû na Jéhovah gloire so alingbi na iri ti lo.” (1 Chron. 16:29; Ps. 96:8). “Ala he bia ti sepela iri ti lo so ayeke ye ti gloire.” (Ps. 66:2). “Mbi yeke gonda iri ti mo lakue lakue.” (Ps. 86:12). Mbeni ngoi so Jéhovah wani asara tënë ayeke na ngoi so Jésus ayeke na temple na Jérusalem, tongana lo tene: “Babâ, mû gloire na iri ti mo.” Jéhovah akiri tënë na lo, atene: “Mbi mû gloire na ni awe na mbi yeke kiri ti mû gloire na ni.”—Jean 12:28. a

Ota ni, a yeke ndali ti so ye so Jéhovah aleke na bê ti lo ti sara ayeke ti tene iri ti lo so ayeke nzoni-kue angbâ ti wara gonda lakue. Bâ tongana nyen la iri ti Jéhovah ayeke ga kota mingi na peko ti ndangba tara na ngoi ti hunzingo ti Komandema  ti ngu saki oko ti Christ. Na ngoi ni so, tongana nyen la a-ange nga na azo ayeke bâ ande iri ti Jéhovah? Ti aidé e ti kiri tënë na hunda so, zia e kiri e bâ aye use so e sara tënë ni fade: dutingo be-ta-zo ti zo na Nzapa nga na tënë ti zo so ayeke na droit ti komande dunia kue. Eskê azo so afa awe so ala yeke be-ta-zo ayeke ngbâ ti tiri ti duti be-ta-zo? Ên-ën. Ala yeke ga ande mbilimbili-kue nga ala sigi na yâ ti atara kue awe. Ala yeke ngbâ na fini lakue lakue. Nga Jéhovah ayeke duti ande na bezoin ape ti fa so fason so lo komande na ni ayeke nzoni mingi. Na ngoi ni so, a-ange nga na azo ayeke duti beoko nga ala yeke yeda na komandema ti Jéhovah. Ka ti iri ti Jéhovah?

Na ngoi ni so, azo kue ayeke hinga tâ tënë na ndö ti Jéhovah nga iri ti lo ayeke ga nzoni-kue. Me iri ti Jéhovah ayeke ngbâ ande ti duti ye so ayeke kota mingi na awakua ti lo kue so ayeke na yayu nga na sese. Ngbanga ti nyen? Ngbanga ti so Jéhovah ayeke ngbâ ande ti sara aye so apika bê mingi, na ala yeke bâ ni. Gbu li na ndö ti ye so: So Jésus ayeke sara terê ti lo kete lo kiri na komandema kue na Jéhovah, Nzapa ayeke ‘ga aye kue ndali ti zo oko oko kue.’ (1 aCor. 15:28). Na pekoni, azo na ndö ti sese ayeke wara “liberté ti gloire ti amolenge ti Nzapa.” (aRom. 8:21). Ye so Jéhovah aleke na bê ti lo ti sara ayeke ga tâ tënë: Lo yeke bungbi amolenge ti lo so ayeke na yayu nga na ala so ayeke na sese tongana mbeni sewa oko.—aÉph. 1:10.

Na peko ti so aye so asi, a yeke sara ande a-ange nga na azo tongana nyen? E yeke duti ande biani na kota nzara ti gonda iri ti Jéhovah. Yingo ti Nzapa apusu David, zo ti sungo psaume, ti tene: “Zia si a sepela Jéhovah Nzapa . . . Zia si a gonda iri ti lo, so ayeke ye ti gloire, lakue lakue.” (Ps. 72:18, 19). Teti lakue lakue, e yeke ngbâ ti wara afini raison so anzere na e mingi ti sara ni.

Iri ti Jéhovah afa ye kue na ndö ti lo. Mingi ni, iri ti lo adabe ti e na ndoye ti lo (1 Jean 4:8). E yeke dabe ti e lakue so ndoye la apusu Jéhovah ti créé e nga ti mû ye so a futa ti zi e. E yeke dabe ti e nga lakue so fason so lo yeke komande na ni ayeke mbilimbili nga afa ndoye ti lo. Me e yeke ngbâ ti bâ tongana nyen la Jéhovah afa so lo ye création ti lo. Teti lakue lakue, bê ti e ayeke pusu e ti ga nduru mingi na Babâ ti e nga ti he bia ti sepela iri ti lo so ayeke ye ti gloire.—Ps. 73:28.