MINGI ni, bateau ti yongo gï azo ayeke lani dä ape na ngoi ti Paul. Ti voyagé na bateau, azo ti voyage ayeke hunda azo wala ala mä tënë ti mbeni bateau ti yongo kungba ti kango ni so aye ti hon na ndo so ala ye ti gue dä na so aye ti yô azo (Kus. 21:2, 3). Même tongana bateau so zo ti voyage amû ni ayeke gue pëpe na mbilimbili ndo so lo ye ti gue dä, na ngoi so bateau ni aluti na ando nde nde na ngoi ti voyage ni, lo lingbi ti gi mbeni bateau nde so ayeke gue na lo nduru na ndo so lo ye ti gue dä.​—Kus. 27:1-6.

A yeke sara lani avoyage na lê ti ngu-ingo na ambeni mbilimbili ngoi na yâ ti ngu me abateau ayeke lani na mbilimbili kapa ti voyage ape. Azo ti bateau ni alingbi ti kiri na lango ti voyage ti ala na peko tongana sioni pupu aya ngangu nga ndali ti ambeni ye so ala mä na bê na ni so asara ala mbeto, na tapande tongana mbeni corbeau aduti na li ti voile ti bateau na lo yeke toto, wala tongana ala bâ mbeni bateau so atuku na yanga ti ngu. Tongana pupu aya nzoni, azo ti bateau ayeke quitté port ti hon. Tongana mbeni zo ti voyage awara mbeni bateau so aye ti mû lo, lo yeke gue na akungba ti lo na port ni na lo yeke ku ti tene a tene bâ bateau ni ayeke hon fafadeso.

Lionel Casson, mbeni wasungo mbaï, atene: “Gbata ti Rome asara lani si a yeke ngangu ape na azo ti wara mbeni bateau ti voyagé na ni tongaso si azo ni wani agi bateau gingo ape. Port ti Rome ayeke lani na yanga ti Ngu ti Tiber. Na kete gbata ti Ostie so ayo na port ni ape a yeke wara mbeni kota ndo so gbâ ti abureau angoro ni. Mingi ti abureau so ayeke ti azo so ayeke tokua akungba na yâ ti abateau so ayeke gue na aport nde nde: Azo ti tokuango akungba ti Narbonne [so laso ayeke France] ayeke na mbeni bureau kâ, azo ti tokuango akungba ti Cartage [so laso ayeke Tunisie] ayeke na mbeni bureau kâ, . . . nga na ambeni nde. Zo so ayeke gi mbeni bateau ti voyagé na ni adoit ti gue na abureau ti agbata so ayeke na lege so lo ye ti gue dä.”

Lani tongana zo avoyagé na lê ti ngu-ingo lo yeke mû ngoi mingi ape, me akpale ayeke lani dä. Fani mingi, bateau atuku na Paul na ngoi ti avoyage ti lo ti missionnaire.​—2 aCor. 11:25.