RENÉE, mbeni ita-wali so ayeke na ngu 30 na ndo ni tongaso, akono na yâ ti mbeni sewa ti aTémoin so ayapu na fango tënë na Australie. Lo tene: “Fani mingi e yeke gue lani na ando so kota bezoin ti awafango tënë ayeke dä.” Lo kiri lo tene: “Papa na Mama asara si a nzere na mbi mingi ti gue na ando so kota bezoin ayeke dä. Na ngoi so mbi dü amolenge use, mbi ye lani ti tene ala sara mara ti ye so mbi sara so.”

 Aye so Renée na koli ti lo Shane so ayeke nduru na ngu 40 tongaso azia na gbele ala ti si dä na lege ti yingo ayeke oko. Koli ni atene: “Na peko ti so e dü use molenge ti e, e diko na yâ ti Tour ti Ba Ndo tënë na ndo ti mbeni sewa so ague lani na mbongo-do ti Pacifique na kete bateau ti ala wani ti fa tënë na azoa ti Tonga. * Article ni apusu e ti tokua mbeti na filiale ti aTémoin ti Jéhovah ti Australie nga na ti Nouvelle-Zélande ti fa na e ndo so bezoin ti awafango tënë ayeke dä mingi. * A hunda lani na e ti gue na Tonga; ndo so e diko lani tënë na ndo ni so.”

Na peko ti so Shane, Renée, na amolenge ti ala Jacob nga na Skye asara ngu oko tongaso na Tonga, akpale ti poroso so asi na peko ti tere asara si ala kiri na Australie. Teti so ala zia lani na gbele ala ti fa tënë mingi, ala girisa ni ape. Na ngu 2011, ala gue na Île Norfolk mbeni kete zoa ti Pacifique so ayo kilomètre 1500 tongaso na tö ti Australie. So ala gue kâ so ala wara ye ti nzoni na pekoni? Jacob so ayeke laso na ngu 14 atene “Jéhovah abâ gi lege ti e ape me lo sara nga si kua ti fango tënë anzere na e mingi.”

Legeoko tongana Shane, Renée nga na amolenge ti ala, asewa mingi amû tere ti ala wani ti gue na ando so bezoin ti awafango tënë ayeke dä mingi. Nyen la apusu ala ti sara ni?

Ita Burnett na wali ti lo Simone so ngu ti ala ayeke 30 na ndo ni tongaso, nga na amolenge ti ala Eston so ayeke fadeso na ngu 12 na Caleb so ngu ti lo ayeke fadeso 9, ague lani na Burketown, mbeni zoa so ayo na Queensland, na Australie. Burnett atene: “A-Témoin ayeke fa tënë kâ ngu ota wala osio awe si ala kiri ala gue kâ. Mingi ti azo ni kâ aye nzoni tënë mingi. E ye ti sara kue ti tene ala wani amanda Bible lakue.”

Mark na Karen so ayeke na ngu 50 tongaso asara kua na yâ ti acongrégation mingi so ayeke nduru na Sydney, na Australie kozo si ala na amolenge ti ala ota Jessica, Jim, nga na Jack ague lani na Nhulunbuy mbeni kodoro so ayo mingi na Territoire ti Banga so azo ni ayeke gi mosoro ti gbe ti sese. Mark atene: “Mbi ye azo ni kâ mingi, mbi ye ti duti na ndo so mbi yeke na aye mingi ti sara na yâ ti congrégation nga na fango tënë.” Ye oko, Karen asara mbeto ti guengo ni lani kete. Lo tene: “Na peko ti so Mark na aita adë bê ti mbi, mbi yeke lani nduru ti gue. Laso a nzere na mbi mingi so mbi gue lani.”

Na ngu 2011, Benjamin na wali ti lo Carolyn nga na akete molenge ti ala ti wali Jade na Bria so ade ti gue na ekole ape alondo lani na Queensland, na Australie ala kiri na Timor-Leste, mbeni kete kodoro so ayeke na Zoa ti Timor so ayeke na popo ti azoa ti Indonésie. Ben atene: “Mbi na Carolyn e sara lani kua ti pionnier spécial na Timor-Leste. Fango tënë kâ ayeke pendere mingi, na aita ayeke nduru ti mû maboko na zo. Vundu asara lani e mingi ti zia ndo ni kâ ti hon. E leke lani na bê ti e ti kiri kâ. Na ngoi so e dü amolenge ti e, e kiri na ye so e ye ti sara so na peko me e changé ni ape.” Carolyn atene: “E ye lani ti tene amolenge ti e asara kamarade na amissionnaire, aBéthelite nga na apionnier spécial tongaso si ala wara ngia na yâ ti kua ti Jéhovah.”

Jésus atene lani na adisciple ti lo, lo tene: “Zo wa na popo ti ala, tongana lo ye ti sara mbeni tour, lo yeke duti kozoni pëpe ti diko ngere ni, ti bâ wala ye so lo yeke na ni alingbi ti tene lo hunzi na tour ni?” (Luc 14:28). Legeoko nga, tongana mbeni sewa aleke ti gue na mbeni ndo, a yeke kota ye ti tene ala leke tere ti ala nzoni. Nyen la ala yeke na bezoin ti leke ni?

SONGO TI ALA NA JÉHOVAH: “Ben atene: “E ye lani ti sara kua ndali ti aita me pëpe ti ga mbeni kungba na ndo ti ala. Tongaso, kozo si e gue, e sara kue ti kpengba songo ti e na Jéhovah. E leke ti fa tënë mingi nga ti sara ambeni kua mingi na yâ ti congrégation.”

Jacob so e sara tënë ti lo fade atene: “Kozo ti tene e gue na Île Norfolk, fani mingi e diko gigi ti ambeni zo na yâ ti Tour ti Ba Ndo nga na Réveillez-vous ! so asara tënë na ndo ti asewa so ague na ando so bezoin ti awafango tënë ayeke dä mingi. E sara lisoro na ndo ti akpale so ala tingbi na ni nga tongana nyen la Jéhovah abâ lege ti ala.” Ita ti lo ti wali Skye so ayeke na ngu 11 atene: “Mbi wani mbi sambela fani mingi; mbi na Mama na Papa nga e sambela.”

 TËNË TI BÊ TI ALA: Renée atene: “Ndali ti so e lango nduru na afami nga na akamarade ti e nga e yeke na mbeni ndo so mbi ye ni mingi, mbi lingbi lani ti hon ape. Me, ahon ti tene mbi pensé na ndo ti aye so mbi dö mbi zia, mbi gbu li lani na ndo ti aye ti nzoni so sewa ti e ayeke wara tongana e hon.”

NGOBO TI AZO NI: Mingi ti asewa asara recherche ti leke tere ti ala ndali ti afini ndo so ala yeke gue dä. Mark atene: “E diko ye mingi na ndo ti Nhulunbuy. Aita ti kodoro ni atokua na e ambeti-sango so amû maboko na e ti hinga azo ti ndo ni nga na asarango ye ti ala.”

Shane so ague na Île Norfolk atene: “Ye so ayeke kota na mbi mingi ayeke ti gi ti duti na anzoni sarango ye ti aChrétien. Mbi hinga lani so tongana mbi sara ye na bê ti mbi kue, mbi sara ye na nzoni bê, mbi sara ye na lege ni, mbi sara kua ngangu, mbi yeke duti nzoni na ndo kue so mbi yeke gue dä.”

Ti sara kua nzoni na ando so bezoin ti awafango tënë ayeke dä mingi, a yeke kota ye ti duti nduru ti changé aye nga ti duti na nzoni bango ndo na ngoi so e tingbi na mbeni kpale so e ku tere ti e na ni ape. Zia e bâ ambeni tapande ni.

Renée atene: “Mbi manda lani ti sara ye na alege nde nde. Na tapande, tongana pupu asara mingi abateau ayeke ga ape, warango kobe aga ngangu nga ngere ni amonté. Tongaso, na ngoi so mbi yeke tö ye, mbi yeke sara ye na ndara.” Koli ti lo Shane atene: “E leke ti vo ye yenga oko oko alingbi na ti so e leke ti vo.”

Molenge ti ala Jacob afa ti lo mbeni kpale nde. Lo tene: “Fini congrégation so e gue dä so gi aita mbasambala la ayeke na yâ ni na ala kue ayeke akota zo. Tongaso, mbeni mba ti mbi ti tene e na lo e sara kamarade ayeke dä ape. Me na ngoi so mbi na ala e yeke fa tënë lani, hio e ga akamarade.”

Jim so ayeke fadeso na ngu 21 awara nga mara kpale ni so. Lo tene: “Congrégation so ayeke nduru mingi na e ayeke ti Nhulunbuy so ayo kilomètre 725 tongaso. E yeke sara mingi ti akota bungbi ti e kâ. E yeke si kâ kozo tongaso si e lingbi ti sara lisoro na aita. Angoi ni so ayeke kota mingi na lê ti e na yâ ti ngu so e sara kâ.”

Bible atene: “Tënë nzoni ti L’Éternel asara si zo awara mosoro, na Lo zia vundu dä pëpe.” (aProv. 10:22). Na yâ ti dunia kue, gbâ ti aita so ague na ando so bezoin ti awafango tënë ayeke dä mingi abâ so tënë so ayeke tâ tënë.

Mark atene: “Kota ye so ahon atanga ni kue ayeke ye ti nzoni so amolenge ti e awara na peko ti tambela ti e ni. Akozo molenge ti e use ahinga na bê ti ala kue so Jéhovah ayeke bâ lege ti azo so azia aye ti Royaume na kozo ndo. Zo apeut ti vo mara ti confiance so ape.”

Shane atene: “Mbi yeke nduru mingi na wali nga na amolenge ti mbi. Tongana ala yeke fa ye so Jéhovah asara na ala, a nzere na mbi mingi. Molenge ti lo Jacob atene: “Ngoi ni so ayeke lani mbeni pendere ngoi. A nzere na mbi mingi so e ga ge.””