ADE ti sara ngu mingi ape, Roald na wali ti lo Elsebeth, so ala ga nduru ti wara ngu 50 awe, ayeke duti nzoni na Bergen, use kota gbata ti kodoro ti Norvège. Ala na molenge ti ala ti wali Isabel na ti koli Fabian ayeke sara kua nzoni na yâ ti congrégation. Roald ayeke lani ancien na Elsebeth ayeke ti lo pionnier permanent, nga Isabel na Fabian ayeke lani anzoni wafango tënë.

Ye oko, na septembre ti ngu 2009, sewa so asoro ti fa tënë yenga oko na mbeni ndo so ayo, so ade a fa tënë dä ape. Ni la Roald na Elsebeth nga na Fabian, so na ndembe ni so ayeke na ngu 18, ague na Nordkyn, mbeni zoa so ayeke na kodoro ti Finnmark, na banga ti cercle arctique. Kâ na kete kodoro ti Kjøllefjord, ala fa tënë legeoko na aita so aga nga na ndo ni so ti fa tënë. Roald atene: “Na tongo nda ti yenga ni, tere ti mbi anzere ndali ti so mbi bâ so mbi leke tere ti mbi nzoni ti fa tënë na yâ ti yenga ni kue.” Me, na yâ ti yenga ni mbeni ye asi na asara si Roald agi bê ti lo. Nyen la asi nyen?

Roald atene so Mario, mbeni pionnier so ayeke na Finnmark, ahunda na ala mbeni tënë so ala ku tere ti ala na ni pëpe. Lo hunda ala ti hinga wala ala lingbi ti yeda ti gue na gbata ti Lakselv ti mû maboko na congrégation so awafango tënë ayeke dä 23. Hunda so adö bê ti Roald mingi. Lo tene: “Mbi na Elsebeth e pensé lani ti sara kua na ndo so bezoin ayeke dä mingi, me gi tongana amolenge ti e ayeke na gbe ti e mbeni ape si.” Me, même gi kete ngoi so Roald amû ti fa tënë na ndo so ade a fa tënë dä ape so, lo bâ so azo aye ti manda ye na ndo ti Jéhovah. Ala yeke na bezoin ti tene a mû maboko na ala fade fadeso, me a ku ape. Roald atene: “Mbi pensé mingi na ndo ti hundango ndo so, na a fâ lango na lê ti mbi teti alango mingi.” Na pekoni Mario ague na Roald na sewa ti lo na Lakselv so ayo kilomètre 240 na mbongo ti Kjøllefjord. Mario aye ti tene ala wani abâ kete congrégation so ayeke kâ so.

Na Lakselv, Andreas, mbeni oko ti a-ancien use ti ndo ni, afa na ala ndo ni nga na Da ti Royaume ni. Azo ti congrégation ni ayamba ala nzoni mingi nga ala tene na Roald na Elsebeth so ala ye ti tene ala na sewa ti ala aga amû maboko na ala na kusala ti fango tënë. Na ngia na yanga, Andreas atene so lo leke awe ti tene Roald na Fabian ague na mbeni ndokua ti tene a sara lisoro na ala ti bâ wala a lingbi ti mû ala na kua. Roald na sewa ti lo ayeke sara ande nyen?

Na ngoi so Fabian amä hundango ndo so kpâ, lo tene: “Mbi yeke na nzara ti ga ge ape.” Lo pensé lâ oko ape ti zia akamarade ti lo so lo na ala akono oko na yâ ti congrégation ti gue na mbeni kete kodoro. Nga, ade lo hunzi ekole ti lo na ndo ti lekengo wâ ti courant ape. Ye oko, ti Isabel (so ayeke na ngu 21) na ngoi so a hunda lo ti hinga bibe ti lo, lo tene: “A yeke tâ ye so lakue mbi yeke pensé dä la!” Me na pekoni lo tene: “Tongana mbi pensé mingi na ndo ni, mbi yeke hunda tere ti mbi, ‘A yeke nzoni mbi gue kâ? Nzara ti bango akamarade ti mbi ayeke sara ande mbi? A yeke nzoni mbi ngbâ gi na yâ ti congrégation ti mbi so aye ayeke tambela dä nzoni so?’” Elsebeth atene ti lo atene: “Mbi bâ so Jéhovah la amû na sewa ti e mbeni kua ti sarango ni so, me mbi pensé nga na ndo ti da ti e so e leke pekoni fini fini so, nga na aye kue so ayeke na yâ ni, so e wara ni na yâ ti angu 25 so ahon so.”

Tongana yenga ni ahunzi Roald na sewa ti lo akiri na Bergen, me ala ngbâ ti pensé na aita ti Lakselv so ayo na ala akilomètre 2100. Elsebeth atene: “Mbi sambela Jéhovah mingi, na mbi ngbâ ti wara sango ti akamarade ti e so e wara ala kâ, na e na ala e yeke tokua afoto na mba nga e yeke tënë na mba anzoni ye so asi na e.” Roald atene: “Lani mbi gbu li ti mbi ngbii awe si mbi ga ti yeda ti gue. Nga a lingbi mbi gbu li ti mbi ti bâ wala e lingbi ti bâ lege ti abezoin ti e kâ. E yeke sara ande nyen ti bâ lege ti abezoin ti e? Mbi sambela Jéhovah mingi na mbi sara lisoro na ndo ni na sewa ti mbi nga na aita so akpengba na lege ti yingo.” Fabian atene ti lo, lo tene: “Lani tongana mbi pensé lakue na ndo ni, mbi bâ so mbi yeke na mbeni nzoni raison oko pëpe ti ke. Mbi sambela lani lege mingi na Jéhovah, na yeke na yeke mbi bâ so nzara ti guengo ni akomanse ti sara mbi.” Ka ti Isabel? Ti mû lege na lo ti leke tere ti lo ti gue, lo mû kua ti pionnier na gbata so lo yeke dä. Na pekoni so lo sara kua ti pionnier ni nze omene, nga na ngoi ni lo mû ngoi mingi ti manda ye lo wani, lo bâ so lo lingbi awe ti gue.

Na ngoi so nzara ti gue na ndo so kota bezoin ayeke dä akomanse ti sara sewa so ngangu, ala sara lani aye so alingbi ti mû lege na ala ti gue. Roald ayeke na nzoni kua ti nginza so lo yeke sara, me lo hunda ti tene lo zia kua ni teti ngu oko. Ye oko, patron ti lo atene na lo ti sara kua ni yenga use na ti ngbâ na yanga-da yenga omene tongaso ti gue na ni juska ngu oko ni ahunzi. Roald atene: “Nginza ti mbi ti nze akiri na gbe ni ngangu, me mbi wara kpale ape.”

Elsebeth atene: “Koli ti mbi atene na mbi ti gi da na Lakselv na ti zia da ti e ti Bergen ti tene a loué ni. A hunda ngoi nga e sara ngangu mingi, me e wara ni. Kete na pekoni amolenge ti e awara mbeni kua so amû ngoi ti ala kue ape, na ala mû maboko na e ti vo kobe na ti futa lege.”

Isabel atene: “Teti so gbata so e gue dä ayeke kete, kota kpale ti mbi lani ayeke ti wara mbeni kua so alingbi ti mû maboko na mbi ti sara kua ti mbi ti pionnier. A si na mbeni ngoi mbi bâ so mbi lingbi ti wara kua ni  ape.” Me akete kua, gumbaya na yâ ti ngu oko, so Isabel awara lege ti sara amû lege na lo ti bâ lege ti abezoin ti lo. Ka ti Fabian? Fabian atene: “Ti mû lege na mbi ti hunzi mandango ye ti mbi na ndo ti wâ ti courant, a lingbi mbi manda ye na place so a yeke sara kua ti wâ ti courant dä. Mbi sara ni na Lakselv. Kete na pekoni, mbi wara diplôme ti mbi na mbi wara mbeni kua ti wâ ti courant so amû ngoi ti mbi kue ape.”

Marelius na wali ti lo Kesia nga kue aye lani ti gue ti fa tënë na mbeni ndo so bezoin ti awafango tënë ayeke dä mingi. Marelius so fadeso ayeke na ngu 29 atene: “Adiskur ti kota bungbi ti district nga na atënë so a hunda na azo na ndo ti kua ti pionnier apusu mbi lani ti pensé ti fa tënë mingi ahon ti kozo.” Me ti Kesia so fadeso lo yeke na ngu 26, ye so ayeke ngangu mingi na lo lani ayeke ti zia afami ti lo ti gue ayo. Lo tene: “Mbeto ti tene mbi zia azo so mbi ye ala mbi hon asara mbi mingi.” Nga Marelius amû lani ngoi mingi ti sara kua ti nginza ti futa na da ti ala so ala mû bon si asara na ni. Marelius atene: “Grâce na Jéhovah nga na asambela so e sara na lo ti hunda mungo maboko ti lo ti sara changement so, e wara lege ti gue.” Kozoni ala mû ngoi mingi ti manda Bible. Na pekoni, ala kä da ti ala, ala ke kua ti ala, na août ti ngu 2011 ala gue na gbata ti Alta, na banga ti Norvège. Kâ, Marelius asara kua ti comptable na Kesia asara kua na yâ ti mbeni magazin, ye so amû maboko na ala ti bâ lege ti abezoin ti ala na ti sara kua ti pionnier.

Knut na wali ti lo Lisbeth, so ayeke fadeso na ngu 35 tongaso, adiko na yâ ti Annuaire tënë ti aita so ague na ando so kota bezoin ti awafango tënë ayeke dä, na ye so andu bê ti ala mingi. Lisbeth atene: “Aye so e diko na ndo ti aita so asara si e pensé ti gue ti fa tënë na kodoro wande, me mbi gi bê ti mbi mbi tene ayeke ye so senge zo tongana mbi so alingbi ti sara ape.” Me ala sara ambeni ye ti si na ye so ala zia na gbele ala. Knut atene: “E kä da ti e, e bata nginza ni, na e gue e lango na da ti mama ti mbi. Na pekoni, ti mû maboko na e ti hinga wala fango tënë na kodoro wande ayeke tongana nyen, e gue na mbeni congrégation ti Anglais na Bergen e sara ngu oko, kâ e lango na ndo ti mama ti Lisbeth.” Kete na pekoni, Knut na Lisbeth abâ so ala leke tere ti ala awe ti gue na kodoro wande; ala gue na Ouganda, mbeni ndo so ayo na ala mingi. Ngu oko oko ala yeke kiri na Norvège ala sara nze use ti sara kua. Ye so amû lege na ala ti wara nginza ti bâ na lege ti abezoin ti ala na ti fa tënë na ngoi kue na Ouganda na yâ ti tanga ti anze ti ngu ni.

Nyen la aita so amû tere ti ala wani ti sara ye awara nyen? Roald atene: “E mû ngoi mingi ti duti ndo oko na sewa na ndo so bezoin ayeke dä so ahon so e sara na Bergen. E kiri e ga nduru mingi na mba na yâ ti sewa. Nga ti bâ so amolenge ti e akiri aye Jéhovah mingi ahon ti kozo anzere na e mingi.” Lo kiri lo tene: “E gi nga bê ti e fadeso mingi na ndo ti aye ti mitele ape. Aye ti mitele ni ayeke kota ye tongana ti so e pensé lani so ape.”

 Elsebeth abâ so lo yeke na bezoin ti manda mbeni yanga ti kodoro nde. Ngbanga ti nyen? Na yâ ti territoire ti congrégation ti Lakselv, a yeke wara nga kete kodoro ti Karasjok, ndo so a yeke wara mbeni mara so a iri ala aSami dä. Ala yeke na banga ti Norvège, Suède, Finlande nga na Russie. Tongaso, ti tene a duti ngangu na Elsebeth pëpe ti fa tënë na azo so, lo manda yanga ti Sami. Ti fadeso lo lingbi ti sara lisoro kete kete na yanga ti Sami. Fini territoire ti lo anzere na lo? Na ngia na bê, lo tene: “Mbi yeke sara étude na azo omene. Anzere na mbi mingi ti fa tënë ge.”

Fabian, so fadeso ayeke pionnier nga wakua ti mungo maboko, atene so na yâ ti fini congrégation ti ala lo na Isabel amû maboko na ambeni maseka ota so ayeke na bezoin ti tene a kpengba ala ti tene ala bi tere ti ala mingi na yâ ti akusala ti congrégation. Fadeso amaseka so ota kue ayeke fa tënë lakue. Use awara batême na ala mû kua ti pionnier auxiliaire na mars, ngu 2012. Mbeni oko ti amaseka so, so lani akomanse ti woko na lege ti yingo, akiri singila na Fabian na Isabel ndali ti mungo maboko so ala mû na lo ti kiri ti kpengba na lege ti yingo. Fabian atene: “Na ngoi so lo tene tënë so, a ndu bê ti mbi mingi. A nzere na mbi mingi ti mû maboko na mbeni zo.” Isabel atene: “Na yâ ti kusala so, mbi ‘tara Jéhovah, na mbi bâ so Lo yeke nzoni!’” (Ps. 34:9). Lo kiri lo tene: “Na ndo ni, sarango kua ge anzere na mbi mingi.”

Marelius na wali ti lo Kesia ayeke fadeso na aye mingi na yâ ti fini ti ala ape me ala sara nzoni ye na fini ti ala. Congrégation ti Alta so ala gue dä ayeke fadeso na awafango tënë 41. Marelius atene: “Tongana e pensé na fini ti e ti ândö e bâ so e changé aye mingi na yâ ti fini ti e na ye so amû ngangu na e. E mû merci na Jéhovah so e yeke sara kua ge tongana pionnier so. Mbeni ye ti mû ngia na e ti hon ni ayeke dä ape.” Kesia atene: “Mbi gi ti zia bê ti mbi kue na Jéhovah ahon ti kozo, na lo bâ lege ti e nzoni. Mbi bâ nga so dutingo ayo na afami amû maboko na mbi ti bâ na nene ni mingi angoi so e na ala e duti place oko. Desizion so e mû so mbi regretté ni ape.”

Ye ti nzoni wa Knut na Lisbeth so ayeke fa tënë fadeso na Ouganda awara? Knut atene: “A hunda lani ngoi ti tene e gi ti hinga ndo ni nga na sarango ye ti azo ti ndo ni. Ngoi na ngoi e yeke wara kpale ti ngu, na ti wâ ti courant, nga yâ ti e ayeke son. Me e yeke sara gbâ ti a-étude tongana ti so bê ti e aye.” Lisbeth atene: “Tongana e londo na da ti e e sara gi penze ngbonga bale-ota, e yeke wara aterritoire so ade a fa nzoni tënë dä ape. Me na ando ni so e yeke wara azo so ayeke diko Bible, ala yeke hunda e ti fa ye na ala. Fango tënë ti yâ ti Bible na azo so asara tere ti ala kete tongaso so anzere na e mingi.”

Christ Jésus, Mokonzi ti e, ayeke na ngia na yayu kâ ti bâ so kua ti fango tënë so lo zi yanga ni so, a yeke sara ni na yâ ti akodoro mingi. Awakua ti Jéhovah kue ayeke na ngia ti mû tere ti ala wani ti sara ye alingbi na commandement ti Jésus ti “sara si azo na popo ti amara kue aga adisciple.”​—Mat. 28:19, 20.