Mbi kono na Warialda, mbeni kete kodoro na gbata ti Nouvelle-Galles du Sud. Na Warialda, azo ayeke fâ yaka nga ala yeke bata anyama; ala yeke bata ataba, abagara, nga ala yeke fâ yaka ti akobe nde nde. Ndo ni ayeke saleté ape nga abandii ayeke mingi ape.

A dü e kue bale-oko, na mbi yeke yaya ni. Ni la, na ngu 13, mbi komanse ti sara kua ti mû maboko na sewa ti e. Teti so mbi gue na ekole ayo ape, mbi sara kua lani na yâ ti aferme. Na ngu 15, mbi ga zo ti bango ndo na tere ti anyama, mbi yeke sara ti tene ambarata ahabitué na azo.

Sarango kua na yâ ti aferme ayeke lani nzoni mingi. Kua ni anzere na mbi nga ndo ni anzere na mbi mingi. Na bï, mbi yeke duti na tere ti wâ, mbi yeke bâ nze na gbâ ti atongoro, nga dede pupu so ayeke ya na lakui asara si mbi yeke mä pendere fion ti ndo ni. Tongana lani mbi bâ apendere ye ni so, mbi yeke pensé so mbeni Zo la adoit ti sara ni. Me na mbage, ambeni ye so apasêe kâ asara nzoni na ndo ti mbi ape. Mingi ni, mbi yeke mä abuba tënë, nga a yeke ngangu na mbi ape ti wara manga. A ninga ape, nyongo manga na tenengo abuba tënë ni aga mbeni ye ti tere ti mbi.

Na ngu 18, mbi gue na Sydney. Mbi gi ti lï turugu me a ke na mbi ndali ti so mbi gue na ekole ayo ape. Mbi wara kua kâ nga mbi sara ngu oko kâ. Na yâ ti ngoi ni so la mbi wara tere na aTémoin ti Jéhovah. Ala tisa mbi ti gue na bungbi ti ala na mbi yeda. Hio, mbi bâ so ye so ala fa ayeke tâ tënë.

Me kete na pekoni, mbi kiri na kodoro. Mbi gue na gbata ti Goondiwindi, na sese ti Queensland. Mbi wara kua, mbi sara mariage, me mawa ni ayeke so mbi mû kua ti nyongo sämba.

E dü amolenge use. So mbi wara amolenge awe, mbi komanse ti gbu li nzoni na ndo ti gigi ti mbi. Mbi dabe ti mbi  na ye so mbi mä lani na bungbi ti aTémoin ti Jéhovah na Sydney, na mbi mû desizion ti sara mbeni ye.

Mbi wara mbeni ngbene Tour ti Ba Ndo so adresse ti bureau ti aTémoin ti Jéhovah ti Australie ayeke dä. Mbi tokua mbeti na ala ti tene mbeni zo aga abâ mbi. Mo ye ti bâ, a tokua mbeni Témoin ti Jéhovah ti ga ti bâ mbi. Mbi bâ so lo yeke nzoni mingi. Lo komanse ti manda Bible na mbi.

Na mandango Bible ni, mbi bâ so mbi doit ti changé aye mingi na yâ ti fini ti mbi. Mbeni versê so andu mbi ngangu ayeke 2 aCorinthien 7:1 so awa e ti “sukula tere ti e wani ti zi aye kue so asara si tere na bibe aga sioni”.

Mbi bâ so mbi doit ti ke manga nga ti zia lege ti nyongo sämba ahon ndo ni. Me a yeke lani kete ye ape, ndali ti so mbi ninga na yâ ti aye ni so. Me mbi ye biani ti sara ye so azia ngia na bê ti Nzapa. Ye so amû maboko na mbi mingi ayeke versê ti aRomain 12:2 so atene: “Ala zia ti sara ye akpa ti aye ti ngoi so, me ala changé na sarango si bibe ti ala akiri fini ni.” Mbi bâ so tongana mbi ye ti changé asioni ngobo ti mbi so, mbi doit ti changé bibe ti mbi nga mbi doit ti bâ nga so sarango ye ti mbi ayeke sioni na lê ti Nzapa. Grâce na Nzapa, mbi ke manga nga mbi zia lege ti nyongo sämba ahon ndo ni.

Ye oko, kota kpale ti mbi lani ayeke ziango abuba tënë ni. Mbi hinga nzoni mingi wango so ayeke na aÉphésien 4:29, so atene “ala zia fungo tënë asigigi na yanga ti ala pëpe.” Atâa so kue, mbi changé na lê ni lê ni ape. Mbeni ye so amû maboko na mbi mingi ayeke so mbi gbu li na ndo ti Ésaïe 40:26. Na ndo ti gbâ ti atongoro so ayeke na lê ti nduzu, versê so atene: “I yä lê ti i na nduzu, i bâ Lo so acréé ye so, Lo so asara ye kue ti nduzu ti sigigi na lege ti wungo ti ala; Lo di iri ti ala oko oko kue na lege ti iri ti ala; na lege ti kota ngangu ti Lo, na teti Lo yeke na ngangu mingi, oko ti ala amanke pëpe.” Mbi gbu li ti mbi, mbi tene tongana Nzapa ayeke na ngangu ti sara kota lê ti nduzu so mbi ye mingi ti bâ ni, nyen na nyen lo yeke mû na mbi ngangu ti changé sarango ye ti mbi si anzere na lo. Grâce na sambela nga na effort so mbi sara, yeke yeke mbi zia lege ti tenengo abuba tënë.

So lani mbi yeke bata anyama, mbi wara lege ti sara lisoro na azo mingi ape, nga azo ayeke mingi ape na tere ti aferme so mbi sara kua dä. Ye oko, na lege ti ye so a yeke fa na bungbi ti aTémoin ti Jéhovah, mbi hinga tongana nyen ti sara lisoro na azo. Mbeni nga ayeke so fango ye ni so amû lege na mbi ti fa nzoni tënë ti Royaume na azo.​—Matthieu 6:9, 10; 24:14.

A sara angu mingi awe so mbi yeke ancien na yâ ti congrégation. Mbi bâ mungo maboko na amba ti mbi Chrétien tongana mbeni pasa. Nzoni ye so mbi wara, so ahon atanga ni kue, ayeke so mbi na wali ti mbi nga na amolenge ti e kue la e yeke voro Jéhovah.

Merci na Jéhovah so lo fa ye na mbi, mbi so mbi gue na ekole ayo ape so (Ésaïe 54:13). Na mbi, tënë ti aProverbe 10:22 so atene “tënë nzoni ti L’Éternel asara si zo awara mosoro” so ayeke tâ tënë. Mbi na sewa ti mbi, e yeke ku ti kiri ti manda ye mingi na ndo ti Jéhovah nga ti sara na lo lakue lakue.