ESKÊ MO YEKE NA NGIA? Tongana a yeke tongaso, nyen la asara si mo yeke na ngia? Eskê a yeke sewa ti mo, kua ti mo, bungbi ti nzapa so mo sara? Peut-être mo yeke ku mbeni ye so alingbi ti sara si mo duti na ngia, na tapande ti hunzi ekole ti mo, ti wara mbeni kua ti nginza wala ti vo mbeni fini oto.

Mingi ti azo ayeke wara kamême kete ngia tongana ala wara lege ti sara mbeni ye so ala leke na bê ti ala ti sara wala ala wara ye so ala ye ti wara. Me ngia so ala wara so ayeke ninga ka ngoi oke? Mingi ni, a yeke ninga gï kete, na ye so ayeke sara si bê ti ala ason.

Tâ ngia ayeke pëpe mbeni ye so tongana zo awara ni, kete na pekoni ahon. Me, a yeke mbeni ye so angbâ lakue, mbeni ye so afa nga so zo ayeke na ngia mingi ti duti na fini. Ti duti na ngia, e bezoin ape ti wara ye kue awe si, me e doit ti manda ti duti na ngia na aye so e yeke na ni. Tongaso, tongana e tene: “Mbi yeke duti ande na ngia tongana mbi wara ye tongaso si, wala mbi sara ye tongaso si,” e yeke duti ande na ngia lâ oko ape.

Ti fa nda ni, zia e haka ngia na dutingo na nzoni seni. Nyen la alingbi ti sara si e duti na nzoni seni? A yeke tongana e sara hange na akobe so e yeke te, e sara sport nga e sara ye ti kirikiri na yâ ti gigi ti e ape. Legeoko nga, e yeke duti na ngia gï tongana e yeke na ambeni nzoni sarango ye na yâ ti gigi ti e.

Ambeni sarango ye wa la tongana e duti na ni ayeke sara si e duti na ngia? Atâa so ambeni ayeke kota ahon ambeni, asarango ye so e yeke gue ti bâ so ayeke kota ye mingi:

• ZIA BÊ GÏ NA NDÖ TI YE SO MO YEKE NA NI NGA MÛ YE NA AZO

• DUTI NA NZONI SENI NGA GBU NGANGU

• DUTI NA NDOYE

• PARDONNÉ ZO

• HINGA NDANI SO MO YEKE NA FINI

• DUTI NA BEKU

Mbeni buku ti ndara, so azo mingi abâ ni na nene ni, atene: “Ngia ayeke na azo so tënë ayeke na li ti ala pëpe.” (Psaume 119:1). Zia e bâ aye so alingbi ti sara si e duti na ngia.