Mo na amolenge ti mo ayeke sara nzoni lisoro gï tongana ala use kue ayeke fa atënë ti bê ti ala na mba.

Ti sara lisoro na amolenge so aga maseka awe ayeke kete ye ape. Mbeni buku (Breaking the Code) atene so tongana amolenge ade kete, ala yeke tene ka atënë kue na ababâ na amama ti ala. Me tongana ala kono, ala yeke tene encore tënë mingi na ala ape, a sara si ababâ na amama ni ayeke hinga atënë ti bê ti amolenge ti ala ape. Même si na bango ni molenge ti mo ni aye ti sara tënë ape, ti tâ tënë ni na angoi ni so la lo ye mingi ti tene mo sara lisoro na lo!

Duti nduru ti sara lisoro na molenge ti mo na ngoi kue. Duti nduru ti sara lisoro na lo même si a hunda ti tene mo sara ni na bï.

“Mo peut ti duti na nzara ti tene: ‘Fadeso la mo ye ti causé na mbi? mbi la depuis fade na terê ti mo so ape?’ Me ngbanga ti nyen ti sara ngonzo tongana molenge ti mo aye ti sara tënë na mo? Ye so ababâ na amama kue aye la ape?”—Lisa.

“Atâa so mbi ye ka ti lango hio, mingi ti apendere lisoro so mbi na amolenge ti mbi e sara ayeke ati so e sara ni na bê ti bï.”—Herbert.

MAMA-NDIA TI BIBLE: “Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.”—1 aCorinthien 10:24.

Zia li ti mo ahon na ndö ti mbeni ye nde ape. Mbeni babâ atene: “Na ambeni ngoi, tongana amolenge ti mbi angbâ ti sara tënë na mbi, pensé ti mbi ayeke hon ayo. Ala kue ayeke bâ ni, na ala yeke tene ka ni na mbi!”

Tongana mara ti ye ni so asi na mo, si télé wala mbeni appareil nde la asara si pensé ti mo ahon ayo, kanga ni. Zia li ti mo gï na ndö ti tënë so molenge ti mo ayeke tene nga bâ gingo bê ti lo ni tongana ye so ayeke kota ye, même si na bango ni ye ni ayeke kota ye na lê ti mo ape.

“A lingbi e fa na amolenge ti e so atënë ti bê ti ala ayeke kota ye na lê ti e. Tongana ala bâ ni tongaso ape, ala yeke fa ande ni na e ape wala ala yeke gue ande ti fa ni na mbeni zo nde.”—Maranda.

“Même si tënë ti bê ti lo ni ayeke na lege ni oko ape, dö hio mo suku na lo ape!”—Anthony.

MAMA-NDIA TI BIBLE: “Ala sara hange na lege so ala yeke mä na tënë.”—Luc 8:18.

Gi alege nde nde ti sara lisoro. Na ambeni ngoi, amolenge ayeke fa atënë ti bê ti ala mingi na ababâ na amama tongana ala yeke sara ambeni kua ti da legeoko.

“Tongana e yeke fono na oto, e profité e sara lisoro. So e duti lê na lê ape, a sara si e yeke sara lisoro nzoni.”—Nicole.

Ti sara lisoro na ngoi ti tengo kobe ayeke nga mbeni lege ni nde.

“Na ngoi so e yeke te kobe, zo oko oko ayeke fa ye ti nzoni wala ye ti sioni so asi na lo na yâ ti lango ni. A sara si e ga nduru mingi na mba, nga zo oko oko ahinga so tongana lo wara kpale, mbeni zo ayeke lakue dä ti aidé lo.”—Robin.

MAMA-NDIA TI BIBLE: “A lingbi zo oko oko kue aduti nduru ti mä tënë [nga] ti sara tënë hio hio pëpe.”—Jacques 1:19.