දෙවි කෙනෙක් ඉන්නවා කියන එකට බයිබලයේ ඕන තරම් සාක්ෂි තියෙනවා. ඒ නිසා අපි නිකම්ම දෙවි කෙනෙක් ඉන්නවා කියලා විශ්වාස කරන්නේ නැතුව අපේ ‘බුද්ධිය’ සහ “වටහාගැනීමේ හැකියාව” පාවිච්චි කරලා ඒ ගැන තියෙන සාක්ෂි හොඳට හොයලා බලන්න ඕනේ. (රෝම 12:1; 1 යොහන් 5:20) දෙවි කෙනෙක් ඉන්නවා කියන එකට බයිබලයේ තියෙන සාක්ෂි මොනවාද?

•   මේ විශ්වයේ තියෙන හැම දේම පිළිවෙළකට නිර්මාණය කරලා තියෙන එකෙන් පැහැදිලි වෙන්නේ නිර්මාතෘ කෙනෙක් ඉන්නවා කියන එකයි. ඒ ගැන බයිබලයේ කියන්නේ මෙහෙමයි. “සෑම ගෘහයක්ම සෑදීමට යම් කෙනෙකු සිටිය යුතු බව සියලුදෙනාම පිළිගනිති. එසේනම් සියලු දේවල් සෑදූ තැනැත්තාණන් දෙවිය.” (හෙබ්‍රෙව් 3:4) ඒක හරිම සරල උදාහරණයක් වුණත් උගතුන්ට නම් ඒක ලොකු බලපෑමක් වෙලා තියෙනවා. a

•   සාමාන්‍යයෙන් මිනිසුන්ට එදිනෙදා අවශ්‍යතා සපුරගන්න විතරක් නෙමෙයි ජීවිතේ අරමුණ ගැන දැනගන්නත් ආසාවක් තියෙනවා. බයිබලේ කියන විදිහට අපිට ඒ වගේ අවශ්‍යතාවක් දැනෙන්නේ ‘දෙවිගේ මඟ පෙන්වීම් ලබාගන්න මහත් ආශාවක්’ ඇතුව අපිව නිර්මාණය කරලා තියෙන නිසයි. ඒ කියන්නේ දෙවියන්ව දැනගෙන ඔහුට නමස්කාර කිරීමේ අවශ්‍යතාවක් ඇතුවයි. (මතෙව් 5:3; එළිදරව් 4:11) ඒකෙන් පේන්නේ දෙවි කෙනෙක් ඉන්නවා කියන එක විතරක් නෙමෙයි, ඔහුට ළං වෙන්න අවශ්‍ය දේවලුත් අපිට සපයන ප්‍රේමණීය දෙවි කෙනෙක් කියන එකයි.—මතෙව් 4:4.

•   බයිබලයේ අනාවැකියක් ගැන සඳහන් කරද්දී ඒ ගැන නිශ්චිත තොරතුරු සඳහන් කරලා තියෙනවා. ඒවා අවුරුදු ගාණකට කලින් ලියවුණත් සඳහන් කරලා තිබුණ විදිහටම ඒවා ඉටු වුණා. ඒකෙන් පැහැදිලි වෙන්නේ ඒ අනාවැකි වාර්තා කරන්න මිනිස්සුන්ට වඩා බලවත් කෙනෙක්ගේ මඟ පෙන්වීම් ලැබුණා කියන එකයි. —2 පේතෘස් 1:21.

•   එදා සමාජයේ හිටපු අය විශ්වාස කරපු දේවලට වඩා වෙනස් දේවල් තමයි බයිබල් ලේඛකයන් ලිව්වේ. උදාහරණයකට, ඒ කාලේ ගොඩක් අය හිතුවේ පෘථිවිය අලියෙක්, වල් ඌරෙක් නැත්නම් හරකෙක් උස්සන් ඉන්නවා කියලයි. හැබැයි ඊට හාත්පසින්ම වෙනස් දෙයක් තමයි බයිබලයේ තියෙන්නේ. ඒකේ කියන්නේ ‘පොළොව හිස් අවකාශයේ එල්ලා’ තියෙනවා කියලයි. (යෝබ් 26:7) ඒ වගේම පෘථිවියේ හැඩය ගැන බයිබලයේ කියලා තියෙන්නේ ඒක “ගෝලයක්” කියලයි. (යෙසායා 40:22) ඒ වගේ දේවල් පවා බයිබලයේ හරියටම වාර්තා කරන්න ලේඛකයන්ට පුළුවන් වුණේ දෙවියන් ඒ අයට තොරතුරු දැනුම් දුන්න නිසා කියලා ගොඩක් අය විශ්වාස කරනවා.

•   ජීවිතේ වැදගත් ප්‍රශ්නවලට බයිබලයේ උත්තර තියෙනවා. උදාහරණයකට, දෙවියන් බලවත් වගේම ප්‍රේමණීය කෙනෙක් නම් පොළොවේ දුෂ්ට දේවල් වෙන්නේ ඇයි, ආගමේ මුවාවෙන් දුෂ්ටකම් සිද්ධ වෙන්නේ ඇයි වගේ වැදගත් ප්‍රශ්නවලට බයිබලයේ උත්තර තියෙනවා. (තීතස් 1:16) හැබැයි ඒ ගැන නොදන්න ගොඩක් අය හිතන්නේ දෙවි කෙනෙක් නැහැ කියලයි.