Minaanninna minaama ooso ilanno wote hagiidharano yaadarano dandaanno. Haaro annanna ama ikkitinoonni daafira, roore yannaꞌnenna wolqaꞌne qaaqqoꞌne towaaxxate horoonsidhinannita huwattinanni wote, dhagge ikkaꞌnera dandaanno. Goxichu anjenna caaccaawa aanteꞌnera qarra kalaqqara dandiitanno. Qaaqqoꞌne towaaxxatenna maateꞌne hagiirraame assiꞌrate lamunku mito coye biddi assiꞌra hasiissannoꞌne. Qullaawu Maxaafi amaale togoore dandiitine heeꞌrate kaaꞌlitannoꞌnehu hiittoonniiti?

QULLAAWU MAXAAFI MAYYAANNO? “Baxillu cincahonna shaqqadoho.” Qoleno baxillu “umisi horo dihasiꞌranno, hattono dihifatamanno.” (1 Qorontoosi 13:4, 5) Umi qaaqqokki ilatta wote, gudisidhe qaaqqokki towaaxxate widira higakki nooreentilla. Ikkirono, minaannikkira hawoottasihu gede ikke macciishshamasira dandaanno; konni daafira isono towaaxxa hasiissannoheta deꞌooti. Cincatenninna shaqqillunni iso deoottasikkitanna qaaqqoꞌne towaatate isino kaaꞌlamanni nooti macciishshantannosi gede assi.

“Minaannuwa, insa ledo egennotenni heeꞌraꞌne agurtinoonte.” (1 Pheexiroosi 3:7) Minaamakki roore wolqase qaaqqoꞌne towaattanni guddannota huwati. Ise konne haaro loosu qeechase wonshitanno daafira hifatantara, daafurtara hakkiino saꞌe yaaddara dandiitanno. Mito wote atera hifatante coyidhannoha ikkara dandaanno; ati kayinni hakkawote kaajjishshe qoltooti; korkaatuno “rahe hanqannokki manchi wolqaataamo mancho rooreho.” (Lawishsha 16:32) Coye wodanchate woꞌnaali, hattono hasiisannore assite kaaꞌlise.—Lawishsha 14:29.

MAA ASSA DANDIITINANNI?

• Annuwa: Qaaqqoꞌne hashsha nafa awuuttanni minaamakki kaaꞌli. Minaamakkinna qaaqqiꞌne ledo roore yanna sayisa dandaatto gede, wolere assatto yanna ajishi

• Amuuwa: Minaannikki qaaqqoꞌne towaata kaaꞌlahera hasiꞌranno wote, kaaꞌlo gibbooti. Assannore garunni assa hoogiro nafa, loonsanni gara kulisi ikkinnina mishshootisi

QULLAAWU MAXAAFI MAYYAANNO? “Lamunku mitto maala ikkitanno.” (Kalaqo 2:24) Maateꞌnera haaru miili lexxinoha ikkirono, kiꞌne lamunku “mitto maala” ikkitinoonnita deꞌinoonte. Mereeroꞌne noo jaaloomi kaajjanno gede assiꞌrate dandiitinannire baala asse.

Minaama, minaannikki maateꞌne kaaꞌlatenna irkisate assannorira galatisi. Iso galatate coyiꞌratta qaali “hurre” ikkasira dandaanno. (Lawishsha 12:18) Minaanna, minaamakki lowo geeshsha baxattosetanna naadattoseta affanno gede assi. Maateꞌne towaattanno gara lowo geeshsha naadattota kulise.—Lawishsha 31:10, 28.

“Mittu mittunku manchi ayewoteno umisi horo ikkikkinni woleho horoomannore haso.” (1 Qorontoosi 10:24) Ayewoteno galteꞌnera danchare asse. Minaannanna minaama ikkitinoonni daafira hasaawate, mimmito macciishshatenna galatate yanna gaaꞌme. Siimu xaado lainohunni umoꞌne baxxinannire ikkitinoonte. Galteꞌnetano hedde. Qullaawu Maxaafi togo yaanno: “Lamunku sumuu yitineenna mite yanna geeshsha ikkiro ikkinnina kuꞌu kuꞌuyira hasiisannore hooltinoonte.” (1 Qorontoosi 7:3-5) Konni daafira, tenne hajo daafira lamunku giddoꞌneta fushshitine hasaabbe. Cincanna mimmitiꞌne hedo huwataꞌne jaaloomaꞌne kaajjishshanno.

MAA ASSA DANDIITINANNI?

• Lamunku calla sayissinanni yanna gaaꞌma deꞌinoonte

• Galteꞌne baxxinannita leellishannore mitore asse; lawishshaho, borrote sokka borreessitine uyiyye woy shiimare hirtine uyiyye

QULLAAWU MAXAAFI MAYYAANNO? “Gato afiꞌratto gede assitannohe hayyo heedhannohe gede kaaꞌlitannoheta qullaawa borro muꞌru qaaqqi heedhenni afootto.” (2 Ximootewosi 3:15) Qaaqqoꞌne ma garinni rosiissinanniro soma fushshidhe. Qaaqqiꞌne ilamara albaanni nafa rosate dandoo afiꞌrino. Godowa heeꞌrenni qaaqqiꞌne qoonqoꞌne badara hattono hagiirreꞌnenna dadilleꞌne huwatara dandaanno. Qaaqqiꞌne anje heeꞌreenna borro nabbabbesi. Nabbabbinanniri leella hoogisirono, hatto assaꞌne lophanno wote nabbawa baxannoha ikkanno gede kaaꞌlitasira dandiitanno.

Qaaqqiꞌnera kiꞌne Yihoware coyidhinanna macciishshate diru diꞌꞌiillinosi yaa dihasiissannoꞌne. Isi macciishshanna huuccatto assidhe. (Marro 11:19) Godoshshiishshinanni wote nafa, Yihowa kalaqore kullesi. (Faarso 78:3, 4) Qaaqqiꞌne lophanni haꞌranno wote, kiꞌne Yihowa baxxinannita huwatanno, hakkiinni isino Yihowa baxanno.

MAA ASSA DANDIITINANNI?

• Yihowa qaaqqoꞌne qajeelsate kaaꞌlitannoꞌne hayyo aannoꞌne gede baddine kultine huuccidhe

• Qaaqqu afara hasidhinannita qara qara qaalla anjesinni hanaffine marro marro higgine kullesi