Mannu ooso uullate aana hegerera heedhannota kulannoha dancha duduwo Qullaawu Maxaafi giddo borreessinoonni. (Faarso 37:29) Qullaawu Maxaafi giddo 66 shiimmaadda maxaaffa no. Maganu tenne maxaaffa mito 40 ikkannohu ammanamino manni borreessanno gede assino. Umire onte maxaaffa mitu 3,500 diri albaanni Muse borreessino. Jeefote maxaafa 1,900 saꞌꞌanno diri albaanni soqqamaasinchu Yohaannisi borreessino. Qullaawa Maxaafa borreessitinori aye hedo borreessitino? Maganu qullaawu ayyaanisinni Qullaawa Maxaafa borreessitinori ledo hasaawino. (2 Saamueeli 23:2) Insa borreessitinohu uminsa hedo ikkikkinni Maganu hedooti. Konni daafira Qullaawa Maxaafa qixxeessinohu Yihowaati.​—2 Ximootewosi 3:16; 2 Pheexiroosi 1:20, 21 nabbawi.

 Qullaawa Maxaafa Qixxeessinohu Ayeti? yitanno viidiyo lai.

 Qullaawu Maxaafi albillitte ikkannore mittoreno soꞌrikkinni tittire kulanno daafira giddosi borreessinoonni hedo Maganuwiinni dagginota anfoommo. Mannu ooso tenne assa didandiitanno. (Iyyaasu 23:14) Albillitte ikkannore soꞌrikkinni afa dandaannohu Duuchanka Dandaanno Magano callaho.​—Isayyaasi 42:9; 46:10 nabbawi.

 Maganu qixxeessanno Maxaafi baxxinoha ikkannoti wonanni egennantinote; konni garinni Qullaawu Maxaafi baxxinoho. Qullaawa Maxaafa batinyu afiira qolle tirre, lowo biliyoone ikkanno Maxaafa mannaho iillanno gede assinoonni. Qullaawu Maxaafi seeda yanna albaanni borreessinoonniha ikkirono sayinsete ledo sumuu yaanno. Qullaawa Maxaafa borreessitinori 40nku manni borreessitino hedo ise iseneewa sumuu yitannote. a Qullaawu Maxaafi Maganu baxille ikkinotano xawise kulannonke; hattono xaa geeshsha mannu heeshsho woyyeessate wolqa noosi. Kuni baalunkuri, lowo miliyoone ikkanno manni Qullaawu Maxaafi Maganu Qaale ikkinota ammananno gede assinonsa.​—1 Teselonqe 2:13 nabbawi.

 Qullaawu Maxaafi Halaale Ikkinota Mayinni Anfeemmo? yitanno viidiyo lai.

 Qullaawu Maxaafite qara sokka giddo mitte, Maganu mannu oosora hedinota dancha hedo kulanno duduwooti. Qullaawa Borro, hunda mannu ooso uullate aana gannatete heedhannota hoolloonnihu mayiraatironna albillitte uulla galagalte gannate ikkitanno gara kultannonke.​—Ajuuja 21:4, 5 nabbawi.

 Maganu Qaali giddosi higguwa, addi addi biddishshanna amaale amadino. Qoleno Qullaawu Maxaafi Maganoho mannu ooso ledo noosi aante hiittootero kulannonke; tini Maganu ayimma anfeemmo gede kaaꞌlitannonke. Konni daafira Qullaawu Maxaafi Magano afatto gede kaaꞌlannohe. Qoleno Maganu ledo jaalooꞌmatto gara kulannohe.​—Faarso 19:7, 11; Yaaqoobi 2:23; 4:8 nabbawi.

 Tini biroshere Yesuusi horoonsiꞌrino hayyo harunsite Qullaawa Maxaafa huwatatto gede kaaꞌlitannohe. Isi coyiꞌrannorira baalaho qummeeshsha horoonsiꞌrino; qoleno “Qullaawa Borro tiro” xawisino.​—Luqaasi 24:27, 45 nabbawi.

 Maganuwiinni dayino duduwi gede hagiirsiisannori woluri dino yaa dandiinanni. Ikkollana mitootaho kuni duduwi mittoreno dilawannonsa; wolootu kayinni kullanninsa woyite caaccaabbanno. Ati togoorinni hexxo mudhitooti. Hegere heeshsho afiꞌrattohu Magano seekkite affanni haꞌrittoro callaati.​—Yohaannisi 17:3 nabbawi.